Ibol isi Mika
17
Oka ñiinzan aknduoi Mika, zonkuŋ osi Efrain. 2 Ka jak aniin: Ulel onkunt na onsent oloŋ onsaam osi prat bo hili kiji. Nji teu uzuun ka ladar ninkij aminzun khuzin. Nji bup onsaam ominzun; Njilun sehu olo. Aniin jaka: NYEEK opzu mnjona duzu nu, nmbukinn. 3 Hunkran abotnun aniin onkunt na onsent oloŋ osi onsaam prat, ka aniin jak lo: Na ujuunsni uliŋ, njo piimnan osaami ze NYEEK antom o osi nmbukinn, antom alemp uzi unfejowi na uloŋ usi prat. Njo, botnu a. 4 Ka Mika botun aniin onsaam ominzun. Ka aniin jek ŋnsent ŋmpuguz ŋnsi onsaam prat, antom hul nzaki, ka niu lo uzi, ka pot sa ialan prat antom niu uzi uloŋ. Ŋnzuoo ze ku Mika. 5 Ka ñiinz amizun Mika a ika ka ku kntik ksi bol. Ka lemp kmbaru kienki, na ŋnzi ŋnloŋo; ka zu awk aloŋ antom a o nmpenen ŋolo. 6 Zokil ominzun ozi ika ka ña zoŋi Israel; ña kdo un ajeui.Nlevita ze mez Mika
7 Oka nmpoz nzala, nlevita anhoi ze kmbau ksi Belen na osaak osi kiiñ ksi Judá. 8 Ka pun ze Belen dsi Juda phya pber zun ai phona. Ze book ka jau ze ku ksi Mika, zonkuŋ osi Efrain. 9 Mika yep lo: "Upun zon?" Ka seemb lo:" Njoko nlevita nnsi Belen dsi Judá. Nji pun antom pber zun njilni phona. 10 Ka Mika jak lo: "Dukon na nji, antom wo injaka nliini na nmpenen ni. Zo lura njo phulo ipesu indisiñene zonsaam osi prat, yun itimo, na ŋun ŋnde. 11 Nmpoz nzala nlevita digzan pduko na Mika, ka duko na lo injaka awk. 12 Ka Mika imnan lo; ka nlevita amizun bi o nmpenen lo, ka duko ze mez lo. 13 Mika jaa: "Ze krank nji me ja NYEEK opdolin na mnjona zonkont nji ka nlevita injaka nmpenen ni."