Sansan zu uroo zun bofilisteu
15
Zurun, zokil ikit isi trigu. Sansan iana ouk opi phya pten ahar. A jak aliin ahar: " Nji jeu pneej ze kuarti ksi nharin: "Ka nen lo pneej, ze kuarti ksi ahar." 2 Ka a jak lo: Nji jaŋzan ubira kbir oloŋ ; Un ominzun kaun ka nji hul asinzu lo, ka aza azi pea pnuro? Ujek lo zonkont lo. 3 Sansan jaa: Mbazo pka pjua uias bi ze nji do bofilisteu un onhuzi. 4 Ka ya bup ŋnsarsar ŋnsent ŋgajinz, ka tan itaant ŋolo, ŋmpuguz, ŋmpuguz, ka tan pkau ze psoof itaant ŋmpuguz; 5 Azu uroo ze pkau, hutun ŋnsarsar zisaal bofilisteu. Hunkran a turdun uzuuz iñene trigu inkitoi, injaka ika ani po kitoo; ka atur uz uzaanz mhuba na mmul mnkduomi olivera. 6 Kero bofilisteu yepro nonzi dol un ondai? ka bo zupo jaa Sansan aa, zonkont aliin ahar, ñiinz nnsi Timnat, ajek ahar hul asinz. Bofilisteu bo ya turñaazamizun na aliin. 7 Ka Sansan jak boko: Hunkran nde kdodun! Mbazo phioŋ ze njamp botun nde pko. 8 A jetun baka makri, afiŋ baña bonsumki. Zo tomi ka ya dukoo zuir zonkuŋ osi Etaŋ.Sansan ka kpee duzu bofilisteu
9 Bofilisteu ya zun uzoñnor ze Judá, bo ya ankint jau ze Leí. 10 Baña bosi Juda yep baka: "Ezi kaa nde bi pgut na ndo?" Ka bo seemb boko: "Ndo bili zonkont ndo bi ptan Sansan, antom ndo dolo ze mi adolunk ndo." 11 Hunkran boiinz nkunt ŋgajinz bosi Juda bo ya zuir osi Etaŋ, bo ya jak Sansan: Ka uzi mee uz bofilisteu ka kpee duzu nja? Tenun un udolin ndo! Ka Sansan seemb boko: Ze mi bo domunk nji hunkran nji sa do boko. 12 Bo jak lo: Ndo bi ptanu antom phian, phya phul bofilisteu. Sansan jak baka: Nde bisron mbaza ndeukun fiŋi. 13 Ka bo jak lo: Ona mnjona; ndo oko ptanu antom phya phul bofilisteu, ka ndo zo fiŋu. Ka bo tan lo na itala ipuguz ialo, bo sona ya.
14 Kero ka jau ze Leí, bofilisteu ya pjik na lo, boka kiik na mnlina, ka oiek NYEEK bi duzu lo na philun ; Ka itala isi bo tanunk lo ziñene ioko injaka mmuz munturomi zuroo. Hunkran ifaloiun ziñen lo. 15 Ka iin pmoon psi kmbam ksi ohuru ozi jon makri osi okezi; kajek kolo, antom fiŋn baña onkunt. 16 Ka Sansan ieh khiz:
Na pmoon psi kmbam ohuru Nji zu onkuŋ duzu onkuŋ!
Na pmoon psi kmbam ohuru Nji fiŋ baña onkunt! a
17 Kero ka toom pieh, alis kmbam ksi ohuru; zun ze minzun bi duoo Ramate-Leí,b
18 Ze minzmun kero aka olof makri, ka du NYEEK jak lo: Ntihun un ka kpe kyeek. Ka njo bi pkez zonkont olof osi mnzup, mbi njet zeñen baña bani phya pleke? 19 NYEEK aul uir bobi ze Leí; ka mnzup pun ze wolo.Sansan dani; Ofoz lo kaki; ka asink phila. Un ominzun kaun plik pminzpun zuo ktiim plik Hakoré; Pho ze Leí anjau hankri.c 20 Sansan zoŋ Israel ŋlur ŋntaaj ŋmpuguz ze nkil bofilisteu.