Kmar ksi Sansan
14
Sansan ya Timnat, ka iinñaazaloŋ da ninfilisteu. 2 Ka kaki, ya zuup aliin na aniin, jak boko: Nji iinñaazninfilisteu ze Timnat. Nde ya bera antom mmar ." 3 Ka aliin na aniin yep lo: "Ozi ka bohaz ze psoof bowkoniinu na baña bosi osaak uzuuz ? Ezi kaa wo phya pjekñaazninfilisteu, baña bomizkun banun phato pleke?" Sansan jak aliin: "Nde ya berin na, alei nji jeun." 4 Ka aliin na aniin bozi mee NYEEK ktihunu un ominzun, zonkont a ika ber pgut na bofilisteu, zonkont bo ika kpe duzu boisraelita zokil ominzun.5 Sansan na aliin na aniin bo ya Timnat. Kero ka jau zuzaanz usi mhuba usi Timnat, ouk olioŋ pun bi pjik na lo, oka ur. 6 Oyeke NYEEK neej Sansan na philuŋ, an kakint tau olioŋ duzu ankint jau zeu, ka azi bup un oloŋ zeñene, injaka ña oun ptau ouk opi, ka azi zuup aliin na aniin un adoli. 7 Ka ya lado na ñaz, antom fundar lo. 8 Kero ŋnu ŋmpozŋi zipi, ka kak phya pmado na lo. Apant ze ksaal phya pten olioŋ afiŋunk. A ya kero ŋnou zu pnou duzu olo. 9 Ka punun pnou na iñen lo, aka dee polo ze book, phya zun aliin na aniin oonzi, ya hul boko pnou; ka bo dee. Azi zuup baka ja apunun pa ze olioŋ afiŋunk.
Ontuntlan osi Sansan
10 Ka aliin ya ze mezñaazaminzun. Sansan dol onah dolo, ze mi bopoz bozala agzomi pdo. 11 Kero bo iin lo, bo bina bopoz bozala ŋntaaj ŋgajinz antom bo o na lo. 12 Sansan jak baka: "Njo phul nde ujemro. Ze ña mee wolo zonu kmar, njo phul nde imbisa ŋntaaj ŋgajinz isi mmuz miknjilmi isi onah na inoŋnt ŋntaaj ŋgajinz isi onah ; 13 Ze nde amp mee olo nde phulin imbisa ŋntaaj ŋgajinz isi mmuz miknjilmi isi onah na inoŋnt ŋntaaj ŋgajinz isi onah. "Ka bo jak lo: "Zuapan ndo ujemro umizbun; ndo jeu pte ua. 14 Ka seemb boko:
Un ode pun ze un okndei;
un onliili pun ze un onjiiji.
An jau ze ŋnu ŋgajinz bozi hilun psemb ujemro.
15 Zonu ouakna bo jak ahar Sansan: "Buŋun ahinu antom azuup ndo ujemro antom ndo mee wolo.Zo ampho un ominzun, ndo pturu na bowk boliinu uzuuz . Nde du ndo zunzi antom pseh ndo ŋun ndo, mbaza hunkran nda?" 16 Ahar Sansan ya ur zurun lo, jak lo: "Wi uzi jewin; ka uzi ka kfundar ze nji, zonkont hul bowkoliini ujemro, ka uzi zuupin ua." Ka jak lo: Mbazi zuup nliini na niini. Wi njou bi pzuup ua? 17 Ka udar lo ŋnu jaand ŋnsi onah ominzun osi kmar. Zonu ojaandun ka bi zuup lo zonkont afuptana un onsumi. Hunkranda, ka ya zuup bowk liin ujemro. 18 Zonu ojaandu, kero konu ozo iowi, boiinz bosi kmbau kminzkun yep Sansan:
Ezi pe pliil ampe pnou?
Oezi ka philun injaka olioŋ?
Ka jak boko:
Ze nde ampjar na oiit ni,
nde zopme ujemro bi.