Jefte gut na Efraiŋ
12
Boiinz bosi Efraiŋ zoklan boghutun boko, año krik phya Safoŋ, bo yep Jefte: "Ezi ka ku ya gut na baña Amoŋ, uzi du ndo, ndo ya na wi? Ndo ptur mez nu hankri duzu nu." 2 Jefte semb baka: "Nji na baña ni ndo ika olado oyeek na bowk Amoŋ. Nji du nde, nde ze bi burburun ndo ze kñen boko. 3 Kero nji me nde zo burburni nji zu olef ni ze khuzina nji ya gut na bowk Amoŋ. NYEEK zu baka ze kñen ni. Ezi ka nde bil hankri bi pgut na nji?" 4 Boefraimita jaa: "Nde bojileadita nde o baña bonziiki ze Efraiŋ na Manases." Jefte zoñun boiinz bosi Jileadi uzuuz, gut na Efraiŋ. Bojileadita bo ka kpe duzu baka. 5 Bo kund ohañnoi osi Jordoŋ. Zoyar ña nnsi eframita ak nzi antom pbur, jau antom phaño, boiinz bosi Jileadi ak yepa: "Wi wo nnsi Efraiŋ?" Zaja. "Ah," 6 ba kjaka: "Jakunk Siboleti." Ak ja "Siboleti," zonkont azi hilun pdu na mnjona. Ba kbupa, kfiŋ lo zohañnoi osi jordoŋ. Zokil ominzun bo fiŋo baña ŋnkunt ŋntaaj ŋuakr na ŋnkunt ŋmpuguz boiinz bosi Efraiŋ.7 Jefte njileadita, alio ze Israel ŋnlur 6 kezi moio ze kmbaau Jileadi.
Ibsan, Eloŋ na Abdom
8 Kero Jefte kezi, Ibsaŋ nnsi Beleŋ zoŋ Israel. 9 A ika kaa bopoz ŋntaaj ŋgajinz boiinz, na bohaz ŋntaaj ŋgajinz. A hul bowk bohaz 30 unima ze baña bani pho na lo ze kiiñ; abi na bompili 30 antom phul bowk boiinz bonim. Ibsaŋ zoŋ Israel ŋlur jaand, 10 akezi, moio ze Beleŋ.
11 Kero ka Ibsan kezi, Elon, nnsi kiiñ ksi Zebuloŋ zoŋ Israel ŋnlur 10. 12 Eloŋ kezi, moio ze Aijaloŋ zozee osi Zebuloŋ.