Jefte
11
Jefte a oko ñiinz nŋghutun nnsi kziu, Jefte jileadita, a ika o nŋghutun ankai kziu; aniin hil o ñaaz nhap oleef; Jileadi bukun Jefte. 2 Jileadi ika ka bopoz na har asi amari. Kero ka bo bi o boyeek, bo dook Jefte ze mez, bo jaka: Uzo piij un oloŋ osi aliin ndo zonkont o awk ñaaz ampazi. 3 Jefte zi bomaka ya duko zosaak okndwounk Tobi. Boiinz bodaf yeen ukun ya boflor na lo ze yaanz na lo.4 Ozip ŋias, bowk Amon ya gut na Israel, 5 Boyeek bosi Jileadi ya ber Jefte zosaak Tob. 6 Jaklo: Biri antom wo nyeek ndo zogut zonkont nja pgut na bowk Amon. 7 Hunkran Jefte jakun boyeek bosi Jileadi: Ndezi ika deuzarin andookin ze mez nliini? Zonkontee kaun ka nde bi ze nji ze krank ze mi nde peŋmink? 8 Boyeek bosi Israel jak Jefte: Un onkai ndo bi ze wi zonkont ubi na ndo antom nja gut na bowk Amon; antom wo nyeek ndo duzu baña uzuuz boouki ze Jileadi." 9 Jefte yep boyeek Jileadi: Ze nde kakni nji ya gut na bowk Amon, ze nyeek zu boko ze kñen ni, zowadadi njo pho nyeek duzu nde? 10 Boyeek bosi Jileadi jak Jefte: NYEEK o pho ze psoof nja; apzu ndo khuzin ze ndo am pdo ze mi uladomunk. 11 Hunkran Jefte yadun na boyeek Jileadi, ka baña Jileadi; zu lo injaka nyeek boko na nyeek boghutun. Apootlani zurun NYEEK ze Mispa ŋun uzuuz ŋi a hili jaa.
12 Jefte hil baña boyaa lado na nliin bowk Amon antom phyep lo: El nja kaun ze psoof nja ubi pgut na nji zosaak ni? 13 Nliin bowk Amon jak baña Jefte: Kero Israel ka bi ze Ejitu bo seh osaak ni ze ptep ze krik Arnoŋ ampjau ze krik Jabok, uz ampjau ze Jordoŋ. Botnan osaak ni, nja o ze pgut. 14 Jefte pot hil baña ze kñen nliin bowk Amon. 15 Antom boyaa jak lo hunkran Jefte jakdun: "Israel bozi seh ŋnsaak ŋnsi bomoabita ka boza seh osaak bowk Amon, 16 zonkont, kero boisraelita pun ze Ejitu, boyaanz zolaal anjau ze krik kjenkle, ka bo jau ze Kades. 17 Bo hil baña ze kñen nliin Edon a hutun boko bo zip zosaak lo, ka nliin azi digzani. Ka bo sa hil baña ze nliin bomoabita, bo sapot hil mbuz baña ze kñen nliin Moabi, Ka alo uz a sa pot yeeli. Hunkran Israel dukodun ze Kades. 18 "Antom ka boyaanz zolaal, bo foyo osaak osi bodomeu na osi bomoabita, bo jau zojir osi Pmair onu osi bomoabita, bozo zojirun krik Arnoŋ, ka bo neej zosaak osi bomoabita, zonkont krik Arnon ko klil boko. 19 Boisraelita bi hil baña ze kñen Syoŋ nliin boamoreu anlioi ze Esboŋ, antom boñaun lo añago boko antom baña bozip zosaak lo ampjau ze zun boouki phya. 20 Ka Syoŋ azi hutnori phutun baka bozip zosaak lo; akoulan boghutun lo uzuuz phya pzoñnor ze Jaza, pgut na Israel. 21 Uzi usi Israel hul Syoŋ na boghutun lo uzuuz ze kñen Israel, ka bo ka kpe duzu boko. Boisraelita seh ŋnsaak boko uzuuz ze kñen bo boamoreu bonzokunk zolo. 22 Bo seh osaak uzuuz ptep ze Arnon ampjau ze Jabok, ptep zolaal ampjau ze Jordoŋ. 23 " Hunkran NYEEK, Uzi usi Israel punun boamoreu zurun baña Israel. Wi uz wo bi pseh ndo osaaki? 24 Ka uza kbaap un uzi nu Kemos huli wi? Hunkran ndoukun pbaap ŋnsaak uzuuz ŋnsi NYEEK, Uzi ndo huli ndo. 25 Ka wi uz, upekpe Balaki pho na mnjona, awk Sipor nliin bomoabita? Ka añankun na boisraelita, Kambar ya gut na baka? 26 Ka Baña Israel hil zoo da ŋnlur ŋnsent ngajnz ze Esboŋ, Aroer na ŋntank ŋolo uz na imbaau inloyunk Arnoŋ. Zonkontee kaun uzi seh a zokil ominzun? 27 Mbazi dolu un ani pdek ze book, ka wi wo pdolin khuzina, ze mi ugutmunk na nji. NYEEK anhoi ndol olado, a pdol olado hankri ze psoof bowk Israel na bosi Amoŋ." 28 Nliin nnsi Amoŋ azi digzan pte nkuni ksi Jefte hilani lo.
Phuz Jefte
29 Oyek osi NYEEK o bi duzu Jefte. Ka zip zosaak osi Jileadi na Manases, pot sa zip ze Mispa dsi Jileadi, sol ya anjau zun bowk Amoŋ hilunk zoñnori. 30 Jefte hul prim zurun NYEEK, jaa: " Zu hulin bowk Amoŋ ze kñen ni, 31 ze nji kak na phyoŋ ze mez ni, ña ampuni urun ze plumun ku ni bi pjik na nji, ña aminzun apho nnsi NYEEK; Njo phula injaka wojun unturubi." 32 Hunkran Jefte añodun krik phya ogut na bowk Amoŋ. NYEEK zu baka ze kñen lo. 33 A ka kpe kyeek duzu boko, ka fiŋ baña bonsumki, seh imbaau ŋntaaj 2, ze ptep ze Aroer ampjau ze Miniti; Ka ya zurun ankint jau ze Abel-Keramiŋ. Hunkran bowk Israel zudun bowk Amoŋ zeu boko.
34 Kero Jefte jau ze mez lo ze Mispa, awk nmpili pun, ze ki, phya pjik na lo, na ontamboriŋ. Alei abukun nkolo; azi hil ka nmpoz aloŋ, azi ka nmpoz ñiinz, ka aza ka nmpili. 35 Kero ka iin lo, apas yun atiimoi, jaa:" Aa nmbukin! Utaawin ujuuns! Woun pzuin nduko na kjozi. Njo hul prim zurun NYEEK, mbazi hilun pkak ofez." 36 A seemba: " Nliini, uhul NYEEK prim. Dolan ze mi ujakmunk zonkont NYEEK zinkunu ubotun pko ze bo bir nu, bowk Amoŋ. 37 Ka dolan kñago. Hutnan kli kpugz 2, antom nhya, ze nkuŋ na bosiinzi, antom nhur mnsi njo pkez pam pmaro." 38 Ka jaa: " Solun." Ka hutun lo ka ya kli 2; Ka sol na bosiinz ya ze nkuŋ, ka huri mnsi ai bi pkez pam pmaro. 39 Kero kli 2 kun toomi, ka kaki ze mez aliin. Ka aliin dolo ze mi a hilunk ko jaa. Hunkran akezdun azi maroo. Ko o bi o mhagzinz ze Israel, 40 zolura, bompili bosi Israel baka pun ŋnu 4 pdo mnlelnin mnsi awk Jefte nnsi Jileadi.