Bo Dol Olado 9

Elimeleki

Abimelek, awk Jerubaal, a ya ze bowkoliin aniin ze Sikeŋ, jak bowkoliin aniin uzuuz : 2 "Nji ñau nde, nde yep baña uzuuz bhoki ze Sikeŋ men o na mnjona bowk Jerubaal ŋntaaj jaand ukun uzuuz liho duzu boko? Bar o na mnjona ñaloŋ nkolo lio; antom bolel ja njo ze pñak ploŋ na nde." 3 Pzaro boko psi aniin bo ya potlan ŋun ajaki boko uzuuz zurun baña uzuuz ze Sikeŋ. Ka ijuuns boko ya zojir Abimelek, zonkont bo jaa: "A o pzaro ndo." 4 Ka bo ulo ŋntaaj jaand zonsaam osi prat osi ku ksi baal-beriti. Bo jeka, ya luñ boiinz boloŋ kñen kzee, bombinkranki bondafki ieene, bonsolki na lo. 5 Ka ya ze mez aliin ze Ofra, a ya fiŋ bowkoliin, bowk Jerubaal ŋntaaj jaand ukun, duzu plaak. Ka Jotan, ampeunk pozo ze bowk Jerubaal, aburi zonkont a hil menoo. 6 Baña uzuuz bosi Sikeŋ na bosi Beti-Milu bozoklani, ya zu Abimelek nliinpñog ze bun wyeek boobi ze pñog Sikeŋ.

Mnjaŋzin mnsi Jotan

7 Kero bozup Jotan un ominzi ka paio duzu onkuŋ osi Jerizin, ka deŋ prim kiik jak boko: " Nde biri baña bhoki ze Sikeŋ, antom Uzi hilun pte nde uzuuz . 8 Onua, mun ya dat nliinmolo; mnjak bun bundwobi olivera: Lion duzu ndo. 9 Olivra seemb ma: Ka njo phutun phul mnsitidos ni mkhulmi ulujul ze ŋnzi na boiinz, nduko nlio duzu mun mloŋo? 10 "Mun ya jak ulimpun: Biri, ubi liho duzu ndo. 11 Kulimpun seemb molo: Njo phutun phul mbuk ni mbalirmi ba iali, antom nhia nlio duzu munu? 12 Mun ya jak mhuba: Biri, antom ulio duzu ndo. 13 Ka mhuba seemb molo: Ka njo phutun phul baña pkem pknzupi mnlina ze ŋnzi na boiinz, antom nhia nlio duzu munu? 14 "Ka, mun uzuuz ya jak usumplu: Bi liho duzu ndo. 15 Usumplu jak munu: Un onjinzi nde jeu nlio nde, nde bi beti zeu ulimbi ni, ze nde ampdo pjaunk, uroo o pun zusumplu, bo ptur munu mknduomi sedru mnsi Líbanu. 16 "Un ondai o iri, ba jali ze mi nde zumunk Abimelek nlin? Nde do ŋun na mnjona zojir Jerubaal na bowkonliin? Nde lempa ze mi akami plempoo? 17 Zonkont nliini zu phila lo ze khuzin, agutnar nde, burburun nde ze kñen bomidianita, 18 Hankri nde nazoon gut na bowkoliin nliini, nde fiŋ bowk boiinz ŋntaaj jaand duzu plaak, nde zu Abimelek, awkñaazninjuk lo, antom alio duzu baña Sikeŋ zonkont a oi pzaro nde. 19 Ka, un ondai nde dolink hankri zonkont Jerubaal na bowk oliin, nde dola zouadadi na ijuuns injinzii nji jeu nde ka milina na Abimelek; alo uz asa ka milina na nde, 20 Zo ampho molo, uroo opun ze Abimelek antom utur baña bosi Sikeŋ na Beti-Milu; Uroo sa opun uz ze baña bosi Sikeŋ na Beti-Milu antom utur Abimelek. 21 Kero antom plana boko, azii ya Beer, ka ya duku dolo, zonkont akalounk amak lo Abimelek.

Gaal agut na Abimelek

22 Hunkran Abimelek zoŋdun Israel ŋlur ŋgajinz duzu Israel, 23 Uzi zu oyek ouzina ze psoof lo na baña Sikeŋ. Ka baña Sikeŋ bi foio lo kfez. 24 Un omizi bi o ze pjua pminzpun kero bowk Jerubaal ŋntaaj jaand ukunk hilun pkak ze awk aliin boko aknduoi Abimelek an fiŋi boko antom pñak boko uz jet duzu baña bosi Sikeŋ bo ika kunk zinkun lo fiŋ bowk boliin. 25 Baña Sikeŋ zu baña duzu onkuŋ antom bo ya limo bo gut na Abimelek. Bo ka pseh ŋun ziñen baña bokn zipki ze book. Ka ña ya zuup Abimelek.

26 Gaal, awk Ebed, abili na bowkoliin, bo ya o ze ozee Sikeŋ. Baña Sikeŋ bi azi, ze lo. 27 Onua boyaa zuzaanz , bosinz mhuba poñ pkem, ya dol onah ze ibol boko, bo dee, daani, lado kjozi ze ktiim Abimelek. 28 Gaal, awk Ebed, ayepro:" Ka nonzi o Abimelek? Ka nja bosi Sikeŋ nja iri oko baña? Un ominzun kaun ka nja pduko zeu Abimelek? Mbaza awk Jerubaal a? Mbaza Zebul oun ojaŋu lo? Nde ka pduko zeu boiinz bosi Amor, aliin Sikeŋ. Ezi ka nja pduko zeu Abimelek? 29 Oil o pho na mnjona baña ki o ze kñen ni. Ol nji punun Abimelek, antom njak lo: Bundaran bo ghutun un antom bo bil ogut. 30 Kero Zebul, nyeek ze kmbau, tee olado ominzun osi Gaal, awk Ebed, ka deuzi makri. 31 Ka hil baña ze kmeno boyaa zuup Abimelek: "Gaal, awk Ebed, na pzaro boko, bo bi ze Sikeŋ, bo ukran baña na wi. 32 Nazoon zurim, na baña uon ki, nde ya bet ze ksaal. 33 Nazoon ze nfa, zomair onu, uzuun ya ghutun ze kmbau. Zoyar Gaal na baña a on ki pun pgut na wi, ukdo boko ze mi wilumi."

Abimelek ka kpe duzu Gaal

34 Abimelek nazoon na boghutun lo uzuuz zurim, boyaa meno ze pñog Sikeŋ na inzoŋ iuakr. 35 Gaal, awk Ebed, pun naz ze plumun kmbau. Abimelek na baña uzuuz pun zun bo menozi. 36 Gaal iin baña bomizkun jak Zebul: "Baña kieto kunk ze nkuŋ. "Zebul jaka:" Olimzan nkuŋ uzuun iinu, namzan boiinz ka. 37 Gaal pot jako lo: "Baña kietokunkZojirun ze psoof; boghutun boloŋ ka bi ze book usi bun oieek usi bozup ŋnzafi." 38 Zebul yep lo: Mntum un onzon krankanki, ukyeproi nonzi o Abimelek antom nja hilun pduko zeu lo? Mbaza baña bo minzkun uzuun hilun dafdafni? Punun phya pgut na boko!" 39 Gaal jek baña Sikeŋ, ghutun na Abimelek. 40 Abimelek dook lo; kazii. Baña bosumuki disoo, ze psoof plumun kmbau. 41 Abimelek duko ze Aruma. Zebul punun Gaal na bowkoliin bo ki kpot kho ze Sikeŋ.

42 Onu oloŋ Abimelek bi mee baña ya isaal. 43 Ka jek boghutun lo hai boko ze inzoŋ yajinz ya limo ze ksaal. Ka iin baña ka pun ze kmbau, ka nazoon phya pjetun boko ogut. 44 Abimelek na knzoŋ lo bo pun osar, ya duko ze plumun kmbau. Ka inzoŋ ipuguz indaiun nazoon osar ya ze bo hilunk o ze ksaal, ka bo fiŋ boko. 45 Abimelek gut na baña kmbau zonu ominzun uzuuz , seh kolo, ka fiŋ baña boouki zolo, sok kolo uzuuz , antom gur ptila ze kolo.

46 Kero baña uzuuz boouki zun ze betnozi ze Sikeŋ te un ominzi, bo neej ze zun ze nlinszi ze bol psi Beriti. 47 Ka ña zuup Abimelek jak lo baña uzuuz bon burki ya zun ze nhalzunk ze Sikeŋ ya beti zolo. 48 Abimelek paio phya onkuŋ osi Zalmon, alo na boghutun lo uzuuz . Ka jek ptii, ka fal knah bunu, jekolo zu ze ksak lo; jak baña booukunk na lo: "Zosar! Nde dolun un nde iini njaka do." 49 Baña bominzkun uzuuz uz, ña kfal knah kloŋ; bo ya ze kfez lo, bo zu inah iminziun zekwaŋ zun ze nlinszunk, ka bo tur zolo, na baña booukunk ze mezu uzuuz . Hunkran baña uzuuz boouki zun ze nhalzunk ze Sikeŋ bo kez uzuuz , baña onkunt boiinz na bohaz.

Pkez psi Abimelek

50 Abimelek ya ze Tebez, kund zolo antom seh zolo. 51 O ika kaa, ze psoof kmbau kminzkun zun ze nznhalzi antom linsi. Baña uzuuz ze kmbau kminzkun boiinz na bohaz bozidar zun ze minzun neej zolo dis plumun, paio unkaŋ zun ze nznhalzi. 52 Abimelek ya gut na baña ze zun ze nznhalzi antom pzu uroo, 53 Ñazan jek plaak pndizpi at polo zueene lo tau lo kfukru ueene. 54 Antom ka du nmpoz nzala anjaunk ka diŋulo igutnin, jak lo: "Puna keje un ufiŋni, zonkont baña nin oi bi pjañaazfiŋun nji." Nmpoz nzala punun keje fiŋ lo. 55 Kero boiinz Israel iin Abimelek ka kezi, kana ña puni ya ze mez lo. 56 Hunkran Uzi lukdun Abimelek pjua psi adopiZojir bowk aliin, mnsi afiŋmunk baña ŋntaaj jaand bowk aliin. 57 Khuzin uzuuz ksi boiinz Sikeŋ doki uz, Uzi botun ka duzu ieene boko. Khuzin ksi Jotan awk Jerubaal, bili duzu boko.