Jidion ka kpee duzu bomidianita
7
Jerubaal, aknduoi Jidion, nazoon ze nfah lis, boiinz uzuuz bo hili o nalo; bo zoñnor ze kwaŋ plik psi Arodi. Ze minz mi uzuñnor bomidianita hil duko ze duzu osaak, ze kwaŋ onkuŋ osi Moré.2 NYEEK jak Jidion: "Boiinz boouki na wi bosum makri, antom nilun phul bomidianita ze iñen boko. Boilun bi phieel phulin ulujl, antom bo ja philun boko plipr pun boko. 3 Antom ol uzupun boko olado ondai antom boilun pte: "Ña nlali sink mnkalo, apun osar zonkuŋ osi Jileadi, akak mez." Hunkran boiinz nkunt ŋntaaj ŋmpuguz kakdun duko ŋnkunt ŋndisiñene.
4 NYEEK jak Jidion: "Baña sumi. ya na baka ze mnzup, zolo njo phailu baka. Ña nji jaki wi: Aminzi aphia; aphia na wi, asi nji jaki wi: Azo phya na wi, azo phia." 5 Jidion ieto na baña lo ze mnzup. NYEEK jaka: "Ze ña laj mnzup na premte lo, ze mi ohul klaj munk wo pdiitun na, injaka bonsawkun ŋupi antom pdaan mnzup. 6 Boiinz ŋnsent ŋgajinz lik mnzup na kñene pzu ze mntum; baña bonduklokunk bo ŋupi antom pdaan mnzup. 7 NYEEK jak Jidion: "Njo pburburun nde na boiinz ŋnset ŋgajinz bonlajki mnzup; njo pzu bomidianita ze kñen un hunkran baña boloŋ, ña hilun phya ze mez lo. 8 Jidion hil boiinz bominzku bosi Israel bo ya ze nku boko, ka duko na boiinz ŋnsent ŋgajinz ukun, bo jekun pre na ŋntilaz ze iñen boloŋ. Uzoñnor bomidianita hil o za ze psoof nkuŋ.
9 Zurim uminzun, NYEEK jak Jidion: "Zazoon, uya ghutun ze zun uzoñnor, zonkont nji ulu za ze kñen nu. 10 Zu kalo pghutun, ukya na ntihun un Purá ze zun uzoñnor. 11 Ze zolo wo phya pte un boi, pja. Hunkranda wo pka kziu pgut na boko. "Jidion ya na ntihun lo Purá an jau ze kwaŋ nieŋ zun uzoñnor hili oni. 12 Bomidianita, bomalekita na baña uzuuz bosi pmair onu, bo hil o zunjir injaka knzoŋ ksi ngula; ŋnsuntunklun boko sumi ŋozi hilun pfino, injaka mbool ze kfar. 13 Kero Jidion jaui, o ika ka ñiinz aknzupi asinz ozafi ajaka: "Nji zaafi, ozaafi, njiin poŋ pnhipi ze pu polo, psi ksepru knduoki sevada phil kil-kili ze zun uzoñnor bomidianita, ankint jaui ze nku hat ŋolo. Ŋku uglo, jeti, piinz lis zozee." 14 Asinz seemb lo: Uni ozo pho un oloŋ ze mbaza kej Jidion ka, awk Joás, ñiinz aminzun nnsi boisrael. Uzi zu bomidianita ze kñen lo na zun boko uzuuz ze zesi uzoñnor."
15 Kero Jidion te ozaafi ominzun zupoo, na mnamzin olo aŋupr Uzi, kak zun uzoñnor ze zesi boisraelita jaa." Nde nazoonn zonkont NYEEK hul zun uzoñnor bomidianita ziñen nde." 16 Abi ai boiinz ŋnsent ŋajinz bominzkun zinzoŋ iajinz, zu ze kñen ñiinz aloŋ-aloŋ kornet, na kmbalu ksil knkaki osaru osi uroo ze mezu. 17 A jak baka: Nde duka ten ze nji, nde pdo ze mi nji domi. Ze nja jau ze kwaŋ zun uzoñnor nde pduka do ze mi nji kdo munk. 18 Ze nji na baña boouki na nji ze ndo luul itin, nde uz, uzuuz ze kwaŋ zun uzoñnor, nde kluul kja: NYEEK sa ona Jidion uz.
19 Jidion jaui, na boiinz onsent ukun bon hili ya na lo, ze kwaŋ zun uzoñnor, kero bozo o ze psoof ujuuŋ kero boieŋ ba ze lutnor kieŋ na bosinz boko. Boluul itin fom imbalu bo hili bup ziñene. 20 Hunkran inzoŋ iajinz uzuuz luul dun itin, fom imbalu. Bo bup ŋnsaru uroo ziñen imai, ziñen boko irei bo bup itin bo hili ze luul isi NYEEK, makri jaa:" Lej ndo io isi NYEEK, na Jidion uz." 21 Ña ka pduko ze zun lo antom bo foio boko zun ze zesi uzoñnor. Boghutun bomidianita bominzkun uzuuz bo zii ze kiik. 22 Kero boghutun ŋnsent ŋajinz ukun ka bo luul itin, NYEEK zu baña uzuuz ze zun uzoñnor bomidianita bojesro na ieje ze ŋleef boko. Boghutun zii phya Zererá, zip anjau ze Beti-Sita, ya ze klil ksi Abel-Meolá, ze kwaŋ Tabat.
23 Boisraelita bosi Naftali, bosi Aser, na bosi Manases bo duo uzuuz , dimpoo ze kfez bomonianita. 24 Jidion hilan nkuni uz, ze baña uzuuz boouki ze nkuŋ ŋnsi Efrain, a jaa: Nde ieton phya pjik na bomidianita, nde tunk boko krik Jordon amp jau ze Beti-Bara. Hunkran, boiinz Efrain uzuuz dwoun, bo ya tunk krik anjau ze Beti-Bara. 25 Bo bup boyeek bopugz bosi bomidianita, boknduoki Oreb na Zeeb. Bo fiŋ Oreb, ze plaak pieek psi Oreb, bo sa fiŋ Zeeb uz ze zun ze poñi mhuba mnsi Zeeb. Bo zañ ze pdook bomidianita, antom ka bo bina ieen Oreb na Zeeb hul Jidion a hil o ze kwaŋ krik Jordon.