Bo Dol Olado 6

Pjuuk zeu bomidianita

Bouk Israel pot do pjua zurun NYEEK. NYEEK zu baka ziñen bomidianita ŋnlur jaand. 2 Bomidianita bi ka kpe duzu Boisraelita zonkont boko bowk Israel ber ir ze nkuŋ, na ir ze zun ze zesi ulaak antom pbet zolo. 3 Ze ŋnkil bo laali ksepru, bomidianita, boamalekita na baña bosi pmair onu, ba kbi kseh baka ŋun bo laal ŋi. 4 Bomidianita ak zoñnor ze kwaŋ ksok isepru isi bojari ankint kjau ze Gaza; ka boza kduklan un ode ze Israel, osi ŋmpalalu, ŋiit, na osi ŋhuru. 5 Bo ila kbi na ŋnsaam boko, na nku boko, bak sum injaka ŋgula; boko uzuuz na ŋnsuntuklun boko sum an bozi hilun pfino ba kbi psok osaak. 6 Hunkran Israel hilun duko ñagani zonkont bomidianita, ze minzmi bo deŋ irim antom du NYEEK.

7 Kero bo du NYEEK, zonkont bomidianita, 8 NYEEK hul bowk Israel nhurun, ankuri boko nkuni kndaaki ksi NYEEK, Uzi usi Israel: "Nji bina nde ze Ejitu, nji punu nde zun ze zesi pjuuk, 9 nji burburun nde ze kñen baña Ejitu, ze kñen baña uzuuz bondoki nde ŋun ŋnjozŋi, nji dook baka zurun nde antom hul nde osaak boko. 10 Nji jak nde: Njoun NYEEK, Uzi nde, nde ze ka pŋupr ŋnzi ŋnsi boamoreu nde dukoi zosaak boko. Nde ze di pte un nji jaki nde."

Jidion duoo

11 Oiili NYEEK bi ze Ofra, zeu bun uieek bu hili o busi Joás, abiezrita. Auk lo Jidion hil ze pol trigu ze zun bo kpolunzi mhuba, antom pmenun molo, bomidianita ki kiij molo. 12 Oiili NYEEK bi zurun lo, jak lo: NYEEK ona wi, ñiinz nnsi kziu. 13 Jidion seemb olo: "Ai NYEEK nin, ze NYEEK ona ndo, zonkontee kaun ka ŋun ŋndaŋi uzuuz bi duzu ndo? "Ŋun ŋyeek ŋndaŋun uzuuz ŋnsi boliindo hili zuup ndo jaa NYEEK bina ndo ze Ejitu ŋoŋon? Ze krankanki NYEEK hutun ndo antom zu ndo ze kñen bomidianita." 14 NYEEK tena, jak lo: " Solun philun psi ukapunk wo pburburun boisrael ziñen bomidianita. Mbaza nji hilun wi? 15 Jidion yepa: " Ai NYEEK nin! Oyeke njou pburbur nin boisrael? Boukonini peun pñagan ze kiiñ ksi Manases; nji uz nji peun pozo ze mez nliini. 16 NYEEK jaka: Ze mi njoi pho na wi, wo ptom na bomidianita injaka bo ze ñaloŋ. 17 Jidion jaka: Zulindarin uzuun khulin mnjaŋzin ja wi a, NYEEK, ukladoun na nji. 18 Njo pñau nu uki kpun zi, ze njam pkak ze wi, mbi na un on haloy nzu zurunu." NYEEK jaka: Njo phioŋu zo kakru.

19 Jidion neej ze mez lo, ya juŋ ouk opi, jek ŋlitru ŋntaaj ŋmpuguz ŋnsi ifor lemp opoŋ ani pka ptiil, azu oiemz ominzun ze pnturu, azu utiip ze futu ya hul oiili Uzi zeu bunu. 20 Ko iili Uzi jak lo: "Jekun oiemz na opoŋ ani pka ptiil antom uzu ŋolo ze plaak pndapi uhas utiip duzu polo. " Hunkran alempdun. 21 Oiili NYEEK solun ptoomiplaŋraobupi ze kñen olo antom pemt zoiemz, opoŋ ani pka ptiil na ptoomiplaŋraolo. Uroo bi pun ze plaak, tur oiemz na opoŋ uzuuz . Hunkran oiili NYEEK meiun zurun lo. 22 Jidion ikran ja oiili NYEEK ka. Ajaka: An, NYEEK, Uzi ! Nji iin oiili un pkil na pkil. 23 NYEEK jaka: "UZUUN hilun pka phioŋ! Ika kalo, zonkont uzo pkez." 24 Jidion lemp pkak zolo psi NYEEK, adu pkak pminzpun NYEEK o nnsi phioŋ." Pho ze Ofra dsi boabiezrita ter hankri.

Jidion sok pkak psi baal

25 Zurim onu ominzun NYEEK jak Jidion: Jekun oiit okal osi aliinu, opugzanu onkaunk ŋnlur jaand uat pkak pminz pun psi baal phopi psi aliinu, falun psap piimna pminz pun phopi mnjaŋzin uzi usi Aserá, uobi ze kwaŋ pkak. 26 Ulemp pkak ploŋ psi NYEEK, Uzi un ze duzu zunz ze minzun ze nlinszi injaka mi pkak NYEEK klempomi. Wo pjek oiit okal opugzanu usond olo injaka wojun unturobi, na imul psap piimumpunk psi uoi pfal. 27 Jidion jek baña bondisiñene ze botihun lo, lemp ze mi NYEEK hilunk jak lo. Ze mi akalo munk bowkoni aliin na boiinz bosi kmbau kminzkun, azi lempa ze pnak alempa zurim.

28 Ze khanan, kero boiinz kmbau nazoon bo iin pkak psi baal atoo, na psap piimna psi Aserá na phili o ze kwaŋ polo pfaloo; oiit okal opugzan uz ofiŋo ze pkak phalu plemp popi. 29 Bododo uyepro: " Nonzi lemp un ondai? " Bo yepro-yepro, ka bo zupoo jaa Jidion a, awk Joás, a lempun olo. 30 Boiinz bosi kmbau kminzkun jak Joás: Punan awku zuri antom afiŋo, zonkont ahat pkak psi baal, pot sa fal uz psap psi Aserá phopi ze kwaŋ pkak. 31 Joás yep baka uz bombikunk ñankun na lo. " Ka nde okun pzoknar baal? Ndeukun burburun lo? Ña ze nde aknzoknari lo apfiŋo ze nfami. Za o uzi akzoknar ween lo ze mi bohatmunk pkak lo. 32 Zonu ominzun bo du Jidion ktiim Jerubaal, zonkont bojaa: " Baal ka pzoknar ueene lo, ze mi bohatmunk pkak lo."

33 Bomidianita uzuuz , boamalekita na baña bosi pmair onu, bo boflori antom año Jordon, lemp zun ze zesi uzoñnor zunjir Jizreel. 34 Oieek NYEEK timnor Jidion. Jidion luul ptin boabiezrita bi ze ya. 35 A hilan nkuni ze iiñ uzuuz isi Manases; boko uz bo sa ya ze ya. Asa hilan nkuni uz ze iiñ isi Aser, zebulon na Naftali, bo sol ya pjik na lo.

36 Jidion jak Uzi: "Uja wo burburun Israel na kñen ni ze mi ujakmi. 37 Nji kzuink kfalar okui zun zi kpolunzi ksepru knduoki trigu. Zo pool on zokui, kozee kai uzuuz , njo pme wo pzu kñen ni antom burburun Israel, ze mi ujak munk." 38 Hunkran odolodun, zonkont anazounk ze khanan zonu oloŋ, apoñ okuia; Ko pool pun ze olo ankint sum ptisel na mnzup." 39 Jidion jak Uzi: "Ika deuzarin, uyas undabi njoun plado. Nji ñaunu uot udo mnjaŋzin mnloŋ na okuia. Nji ñaunu antom okuia duko okai zuias bi, antom opool ñoiun ozee uzuuz . 40 Hunkran Uzi lemp dun zurim uminzun, okuia kaiun onkona olo, ozee uzuuz oñoi opool.