Khiz ksi Debora
5
Zonu ominzun Debora na Barak, awk Abinoan, bo yeh khiz kndaaki:2 Nde zahun Uzi, NYEEK! zonkont boyeek bamni ogut;
baña uz bo hul ieene boko na mhiuknin.
3 Nde siinkun, nde boliin! Nde kaunan iwaz, nde bo huli!
Njo phyeh, njo phyeh ze NYEEK;
Njo phyeh khiz ze NYEEK, Uzi usi Israel.
4 NYEEK, kero upun zokun osi Seir,
kero ku dimpo book ptep zosaak osi Edon,
kozee bi likliki,
an ka duzu as mnzup,
inzun uz sa hutun olur yolo.
5 Nkuŋ bi likliki zurun NYEEK,
ankit jau ze Sinai, zurun NYEEK, Uzi usi Israel.
6 Ze ŋnu ŋnsi Sangar, awk Anat,
na ŋnu Jael uz, baña hutun phyanz zorwa;
boouki phya paat, bozip ze yaanz ze yook intuntoi.
7 Ze Israel, ŋntank duko ŋnsil, ŋozi ka ña,
ŋhutun anjau zonu, nji Debra,
nji nazooni, nji nazoon injaka nmbukl ze Israel.
8 Kero bo dat ŋnzi ŋhalu,
zolo kogut sa jawi ze plumun phyeek psi kmbau,
ka ozi hil iinoo ouel na kñako,
ziñen baña ŋnkunt ŋntaaj ŋuakr ze Israel.
9 Ujuuns ni o na boyeek Israel,
na bosi baña bo hul kunk ieen boko na mnjona phinzar.
Nde zahun Uzi, NYEEK!
10 Nde bonzoki duzu knoŋt, jijoo duzu ŋhuru ŋfasla, nde bok yanzki ze book na izima, nde ika ka plado ze un ominzi.
11 Nde hilun pte mntiŋzan mnsi baña ze zun ze liki mnzup, bo ze lado ze ŋun ŋnuroŋi ŋnsi NYEEK doŋi, ŋun ŋnuroŋi ŋminzŋun ŋi Adoŋi ze ŋntank ŋnsi Israel. Hunkran baña bosi NYEEK soldun ya ze iku boko.
12 Bambu, bambu, Debora!
Bambu, bambu, iehun khiz! Barak awk Abinoan, nazoonn! Iana bojuuk bosi ubupki.
13 Bonduklokunk bo yaanz na boyeek boko; baña NYEEK bi ze nji, bamni ogut.
14 Baña Efrain yetoo zunjir, Benjamiŋ ika o na baña boki phya ze kfezu. Boyeek ogut bi ze Makir, ze Zebulon uz osa pun baña bo hili ka ilaŋra boyeek boghutun.
15 Boyeek Israel ya na Debora, ka Isakar hil o na Barak uz, bo zii ieto na ya ze psoof nkuŋ. Ze baña Ruben oka oñankni oieek ze psoof boko.
16 Zonkontee kaun ka uloo kme antom psink bo iafna boka du ŋnsaam boko? Ze mi baña Ruben kisromunk, o ika ka mene mieek zijuns boko.
17 Baña bosi Jileadi duko zojirun Jordon. Zonkontee kaun ka Daŋ dukoo ze kwaŋ ŋmpur? Aser zoo ze zunz ze lami, aduko ze kwaŋ ikiŋ isi krik.
18 Kiiñ ksi Zebulon zu phila boko ze khunzin ksi pkez, injaka Naftali zunaam usi ogut.
19 Bolin bi guti, boliin Kanaan bi ghutun ze Taanak, ze kwaŋ krik ksi Mejidu, ka bozi iin prat antom psona.
20 Ŋhuzu ghutun duzu inzun, kero ŋi ka yaanz ze book ŋolo ze duzu inzun ŋin zee gut na Sísera.
21 Krik ksi kison puul baka, krik kndiima, kminzkun krik ksi Kison. Oieek ni yaanz phya urun na philun!
22 Ŋnsumpliz ze zi, ŋ ze zi; Izim ŋolo ze pol zozee na mntiŋza;
23 Oiili NYEEK jaa: Ladaran Meroz khuzin; Ladaran khuzin makri ze baña boki zolo, zonkont bozi bi pzinkun NYEEK; bozi bi injaka boghutun antom pzikun lo.
24 Jael, ahar Eber, keneu, apka oneejo duzu bohaz bonhoki ze nku.
25 Sísera ñauna mnzup, ka ulo mntau, ahala mumplar ze ptisel pnuropi injaka psi boyeek.
26 Ka solunk kñen lo kmai antom pjek preglu psi oku; ajek omartel na kñen lo krei osi botihun antom tau lo beene, kero ka diŋlo ankint futul lo beene.
27 Ajuuz ze izim Jael, ajet piinzi, ajuzi ze izim lo, ajeti; ze zun ajuzunzi zoz ajentunzun kezi.
28 Aniin Sísera aten zuir ze kfez kdeki uir deŋ prim lo yeproo. Zonkontee kaun kokaru lo jon pjau? Zonkontee kaun nja pjon pte mntiŋzan okaru lo?
29 Bohaz bompeki plip ze bokntihunar kunk lo bo psemba; alo uz asa o psemb ween lo.
30 Un onjinzi bo ber ŋun bosheŋi zogut antom phai boko. Ñiinz aloŋ, opseh nmpili aloŋ o bompili bopugz. Sísera hilun pjek yun itimo inkai mbau msumi, yun itimo inlutoi na mbau mnsumi (Bordadu), ze ŋnjir ŋmpuguz, ŋun ze kzuz ni, ŋnjeko uzuuz zogut.
31 NYEEK, hunkran odun na mnjona, antom bombirki wi kez uzuuz ! Bonfundarki wi bo o injaka onu zoyar olo punz ze philun olo.
Osaak bi ka phioŋ ŋnlur ŋntaaj ŋuakr.