Pjuuk zeu Jabin, nliinKanaan
4
Kero Eudi tom pkez, bowk Israel pot do pjua zurun NYEEK. 2 NYEEK bi zu baka ze kñen Jabin, nliinKanaan, an hili lioo ze Azor. Nieek boghutun lo aduo Sísera, an hili o ze Aroseti-Hagoin. 3 Bouk Israel deŋ irim du NYEEK, zonkont Jabin hil ka ŋnkaru ŋnsent kñenkloŋ ŋnsi iferu, apot sa ka kpe duzu Israel makri ŋlur ŋntaaj ŋmpuguz.Debora na Baraki bo burburun ndo
4 Debora, ahar Lapidoti an hili o nhurun Uzi ze Israel zokil ominzun. 5 A hagzo pzoo zeu ukeme usi Debora, ze psoof Ramá na Betel, zonkuŋ osi Efrain, bowk Israel hil a khia pdol olado ze kñen lo. 6 A hilan pdu Barak, awk Abinoan, nnsi Kedes dsi Naftali, a jaka: "NYEEK," Uzi usi Israel uzuun ilu uzuun ya jek boiinz ŋnkunt ŋndisiñene bosi iiñ isi Naftali na Zebulon uzuun ya na boko zonkuŋ osi Tabor. 7 Njo pkuru Sísera, nyeek boghutun, bosi Jabin, na nkaru lo na knzoŋ baña lo boghutun ze kruz kntik njo pzua ziñen nde. 8 Barak jaka: "Ze wo phya nan nji, njo pya, zuam po phya nan nji, nji uz mbazi sa opya." 9 Ajaka: "Na mnjona; Njo phya na wi, ka ŋun uoink phya plemp, mbaza uou pzaho, zonkont NYEEK o phul Sísera ze kñenñaazaloŋ." hunkran Debora nazodun, sol na lo phya Kedes. 10 Ze zolo Barak du baña bosi Jebulon na Naftali; baña ŋnkunt ŋndisiñene ya ze kfez lo. Debora sa ya na lo uz.
11 Eber, keneu hutun bokeneu boloŋ, boouki ze kiiñ ksi Obab, aiotun Moises a ya zu oku lo ze kwaŋ bunu bukndwobi karvaju usi Zaananin, bhobi ze kwaŋ Kedes.
12 Kero Sísera zupoo ja Barak, awk Abinoan, ya onkuŋ osi Tabor, 13 abi koulan nkaru ŋnsent kñenkloŋ ŋnsi lo ŋnsi iferu, na boghutun uzuuz bonhoki na lo, asona baka ptep ze Aroseti-Hagoin an jau ze krik kntik ksi Kison. 14 Debora jak Barak: "Nazon usol, zonkont hankri o onu NYEEK huli Sísera ze kñen nu. Ka NYEEK azo ya zurunu? Hunkran Barak hietodun zonkuŋ Tabor na baña ŋnkunt ŋndisiñene ze kfez lo. 15 NYEEK zu Barak ka ka kpe duzu Sísera na keje, nkaru lo na boghutun lo uzuuz , ka Sísera pun duzu okaru kreta lo antom zii. 16 Barak ya ze kfez nkaru na boghutun Sísera anjau ze Aroseti-Hagoin. Boghutun Sísera uzuuz fiŋo na keje, ka ña aloŋ azi buri.
Jael fiŋ Sísera
17 Sísera zii ya zoku osi Jael, ahar Eber, keneu, zonkont o ika ka phioŋ ze psoof Jabin, nliinAzor na bowkoliin Eber, nnsi keneu. 18 Jael pun sol ya jik na Sísera, jak lo: "Nieek uzuun hilun pneej , neejun ze mezu; Ika linki Sísera neej zoku lo; Jael lera na knoŋt. 19 Sísera jaka: Halan mnzup ndaan; nji ka olof. "Ñaz haul olaku knjand oiili ka mntau ulo ka dani, antom ler lo uz." 20 Sísera jaka. "Nazun ze plumun psi oku. Ze ña bi yepro men ña ozi uk jak lo ah." 21 Ze mi anormunk, abi zip na uŋoi. Jael ahar Eber, jek preglu phieek psi oku kdiŋnopi; Ajek omartel joptar lo mpozmi-mpozmi, diŋlo polo zueene ankint futli iu zozee. Hunkran akezdun. 22 Kero Baraki bi pber Sísera, Jael pun ya jik na lo, Jak lo: "Biri, njo pjaaŋu ñiinz uk beri." Ka neej na lo iin Sísera piinz kezi na preglu pminz pun zueene. 23 Zonu ominzun Uzi hul bowk Israel kpe duzu Jabin, nliin nnsi Kanaan. 24 Bouk Israel zañi zogut na Jabin nliin nnsi Kanaan, ankint toom na lo.