Bo dol olado
Boisraelita gut na bokananeu
1
Kero Joswe kezi, baña Israel yep NYEEK, kiiñ kon opho ogut na bokananeu urun? 2 NYEEK sembi: "Judá oun pya. Nji zu osaak ominzi ze kñen boko." 3 Baña bosi Juda jak baña bosi Simeoŋ ze pzaro boko:" Nde bi na ndo zosaak osi ndo uloi." Hunkran bosimionita soldun na boko. 4 Kero Juda ya ogut, NYEEK zu bokananeu na boperizeu ze kñen boko; kabo fiŋ boiinz ŋnkunt ŋndisiñene ze Bezeki. 5 Ka bo iin Adoni-Bezeki zolo gut na lo. Antom fiŋ bokananeu na boperizeu. 6 Adoni-Bezeki zii; ka bo dooklo, bup lo, antom falo ikoñ ieek isi iñene na isi izima 7 Adoni-Bezeki jaa: "Bolin ŋntaaj jaand bonfaloki ikoñ ieek isi iñene na isi izima, bo hil aka sinz mnduklar zeu omes ni. Ze mi nji falunk boko ikoñ, hunkran Uzi dolun nji uz." Bo iana ya ze Jerusalen akezun da.8 Bouk Juda gut na baña Jerusalen, seh dolo, fiŋ baña dolo na keje, ñuz uroo ze kmbau. 9 Hunkran bowk Juda uglodun zojir zeu osaak, antom pghutun na bokananeu bhoki zonkuŋ na zun zeliŋnorzi. 10 Juda sol uz ya gut na bokananeu bo hili o ze Ebron, ze hili ka ktiim Kiriati-Arba zotepi bo ka kpe duzu baña Sesai, bosi Aiman na bosi Talmai.
Kaleb ka kpe duzu Debir
11 Ze zolo bo ya gut na baña boouki ze Debir, bo hil duo Kiriati-Sefer. 12 Kaleb jaa: "Ña nkai kpe duzu Kiriati-Sefer seh dolo njo phula nmbukinn Aksa antom amar, 13 Otniel, awk Kenas, aza Kaleb, aseha. Hunkran Kaleb, uldun lo awk lo Aksa antom amar. 14 Kero Aksa ya zolo abuŋ aina antom añaun aliin lo Kaleb ksaal kloŋ. Aksa ieto zo ouru. Kaleb yepa: "Oiel uzuun kaun?" 15 Ka seemb lo: " Dolan pña. Ze mi uzuun hulmunk nji osaak onkaink, ulan mlik mnsi mnzup. Kaleb ula mlik mnsi duzu na mnsi zeu.
16 Bouk Keneu bo minzkun, aliin ahar Moises, bo pun ze Jerikó, kmbau ksi mnkem, na bowk Judá, bo ya zolaal osi Juda oi ze zeu osaak Aradi, bo ya o na baña bonhoki zolo. 17 Baña Juda ya na baña Simeoŋ, boza boko, ka kpe ze bokananeu bo hili o ze Zefat, bosok kmbau uzuuz . Bo bi Hugul ktiim kmbau kminzkun du kolo Orma. 18 Juda seh Gaza, Askelon, Ekron na ozee boko uzuuz . 19 NYEEK hil o na baña bosi Juda bopunun baña bonhoki uzuuz ze nkuŋ ka bozi punun bonhoki zunjir, zonkont bo ika ka nkaru ŋnzak. 20 Ze mi Moises ilmi boko bo hul Kaleb Hebroŋ. Zolo ka bo punun bowk Anak boajinz.a
21 Bouk Benjamiŋ bozi punun bojebuseu bo hili o ze Jerusalen. Hunkran bojebuseu odun na bowk Benjamiŋ ze Jerusalen ankint jau hankri.
22 Iiñ isi Joswe ya gut na Betel. NYEEK hil o na baka. 23 Bo hil baña ka bo ya ten kmbau kminzkun ksi Betel ki hili ka ktiim Luz. 24 Bo ten osaak ominzun iin ñiinz a hili pun ze kmbau bo jaka: "Zu jaŋ ndo bum kmbau ndo pdolu na mnjona." 25 Hunkran asondun boko bum kmbau; bofiŋ baña za uzuuz na keje, antom hutun ñiinz anjaŋunk boko kmbau na baña lo ka bosoli. 26 Ñiinz aminzun ya zosaak osi boeteu, lemp kmbau, du kolo ktiim Luz, khokun ktiim kolo anjau hankri.
27 Kiiñ ksi Manases kozi punun baña bosi Beti-Sean, bosi Taanak, bosi Dor, bosi Ibleon, ka boza punun bosi Mejidu, na ŋntank uzuuz ŋhoŋi zimbau indai. Bokananeu zu kuaz pduko zosaak ominzun. 28 Kero Israel ka philun ze boko, bozu bokananeu botihunar boko, ka bozi punun baka uzuuz .
29 Kiiñ ksi Efrain kozi punun bokananeu bo hili o ze Jezer, ka bokananeu zañ ze psoof boko.
30 Kiiñ ksi Jebulon kozi punun baña bosi Kitron ka boza punun bosi Naalol; hunkran bokananeu zañdun duko na boko, antom ptihunar boko.
31 Kiiñ ksi Aser kozi punun baña bosi Ako, Sidoŋ, Alab, Akzib, Elba na Afeka ka koza punun bosi Reob. 32 Ka boaserita boduko bozañ ze psoof bokananeu bo hili o zosaak ominzun, zonkont bozi punun baka.
33 Kiiñ ksi Naftali kozi punun baña bosi Beti-Semes, ka boza punun bosi Beti-Anat; kozi doko, bozañi ze psoof bokananeu hili o ze osaak ominzun, bo zu baka utihun pjuuk.
34 Boamoreu uz bo luñun bowk Daŋ kakun boko kfez, anjau zonkuŋ, bozi hutun baka pieto zojirun psoof nkuŋ. 35 Boamoreu uz bozu ŋnzafu pduko ze nkuŋ ŋnsi Eres , Aijalon na Saalabin, Kero iiñ isi José bi ka philun, antom zu boko utihun pjuuk. 36 Klil ksi Boamoreu tep ze pnkunten psi Akrabin, khia ze Sela; ze zolo kzip ya zurun duzu osaak.