Ozaŋu osi Joswe
23
Ozip nkil ŋnsumŋi ze mi NYEEK huli Israel phyooŋ ze bobir boko uzuuz ze kwaŋ boko; Joswe hil o zafi ka ŋnlur ŋnloŋi. 2 Adu bowk Israel uzuuz , boyeek boko; bonlipkunk na botihun jak boko: Njo zafi an zipzipni. 3 Nde iin uzuuz ŋun NYEEK, Uzi nde lempŋi ŋnsaak ŋndaaŋi zonkont nde, Uzi nde hil gutnar nde. 4 Nde sa pot iin ze mi nji haimunk nde ŋnsaak zoneejo, ŋndukloŋi, antom ŋho phij iiñ nde, na ŋnsaak uzuuz ŋnsi nji toomnŋi ptep ze Jurdoŋ ampjau ze krik Mediteranyu ze phyour onuu. 5 NYEEK, Uzi nde o punun baka zurun nde. Nde pseh osaak boko ze mi NYEEK, Uzi nde jamunk nde .6 Nde, ndelinsu, nde zu kuaz antom pdo un ompisoi zoliuri oiimna osi Moises, pham pzil olo ze kñen krei, pham pzil olo ze kñen kmai. 7 Nde ika koulan na ŋnsaak ŋndaaŋi ŋndukloŋi ze psoof nde; nde ika du itiim ŋnzi boko, ndera pbisro ŋa; nde ika tihunar ŋa; nde ika ŋup zurun ŋolo. 8 Nde bupna NYEEK, Uzi nde ze mi nde domunk anjau hankri.
9 "NYEEK punun zurun nde ŋnsaak ŋieek; ŋnlinsŋi anjau hankri ñazi naz zurunde. 10 Ñinz aloŋ nkonalo ze psoof nde ap dook baña onkunt, zonkont NYEEK, Uzi nde ba kgutnar nde, ze mi ujakmunk nde. 11 Hunkran, nde zun ŋnzafu antom nde fundar NYEEK, Uzi nde.
12 "Ze nde, kulan NYEEK ofez, koulor na baña ŋnsaak bonduklokunk ze psoof nde ze nde mado na boko, nde dol uhido na boko, 13 nde me ja NYEEK, Uzi nde, bozo pzañ ze punun ŋnsaak ŋi zurun nde. Hunkranda bo bi pho plufe na ontene antom bup nde, pho ptislu zifez nde na ijuan zikil nde, an nde kint nde tom uzuuz zosaak ooi na mnjonan osi NYEEK, Uzi nde, huli nde.
14 Ndjo ze book usi baña uzuuz kai phya zonu oloŋ. Nde sapot me na mnjonan ze ijuuns nde, ozi ka olado oloŋloŋ onhani pham pho uzuuz zo lado onuroi osi NYEEK, Uzi nde jaki zonkont nde. Ŋun uzuuz ŋnjakoŋi, ŋndolo, ozi ka oloŋ onzili. 15 Ze mi adomunk ŋun uzuuz ŋhoŋi na mnjona ŋnsi ajaki nde, hunkran uz NYEEK, Uzi nde oun pdo pkalan amp pkint ptom na nde zosaak onuroink osi a hulink nde. 16 Ze nde kit phuuz psi NYEEK, Uzi nde huli nde, ka nde bi ya ptihunar ŋnzi ŋloŋo, nde ŋup zurun ŋolo, oreu NYEEK o pbi duzu nde; zolo nde pmei zosaak onhoi na mnjona osi a huli nde.