Iiñ 2 na psoof kak mez
22
Joswe du borubenita, bogadita na psoof kiiñ ksi Manases . 2 Antom jak boko: "Nde dol uzuuz ŋun Moises, ntihun NYEEK, zui nde, nde siinkin ze kzoŋo uzuuz, nji huli nde 3 Ze nkil ŋnsumŋi anjau hankri nde zi hutun pzaro nde, nde zu ŋnzaafu antom te un NYEEK, Uzi nde, huli nde. 4 Ze krankanki NYEEK hul nde pzaro nde phyooŋ zu hilunk jak boko. Hunkran nde hilun pkak ŋnku nde zosaak phij osi Moises ntihun NYEEK huli nde zojirun krik Jordoŋ. 5 Nde zun ŋnzaafu pbaap ŋun nde uloŋi na ŋiimna ŋnsi Moises ntihun NYEEK hilŋi nde antom nde fundar NYEEK, Uzi nde, nde yaanz ze book wolo, nde dolun un ujaki nde bup olo na mnjona nde tihunar wolo na ijuuns nde uzuuz na ŋyek nde uzuuz .6 Hunkran Joswe zuun boko mnjona antom taas na boko, bo sol ya ze nku boko. 7 Zonkont Moises hilunk hul psoof kiiñ ksi Manases phij ze Basan, ka Joswe hul kiiñ kndaakun psoof osaak ze psoof pliin boko zojirun krik Jurdoŋ ze phyour onuu. Kero Joswe hil boko bo ya nku boko azu mnjona duzu boko, 8 a jak baka: "Nde pkak ze nku nde na pliin nde pnsumpi na ŋnsaam ŋsumŋi, ŋun ŋnzak praata, mhuru, un onaami na iferu okndwoi metal, iferu na yun itiimo insumhi. Ŋun ŋnsi nde punuŋi zosaak bobir nde, nde phairo ŋa na pzaro nde.
9 Hunkra borubenita, bogadita, na psoof kiiñ ksi Manases , botaas na bowk Israel ze Silo zosaak osi Kanaan, pkak ze Jileadi, zosaak bo huloi ze mi NYEEK ladomunk ze mntum Moises.
Pkak ze kwaŋ Jordoŋ
10 Kero borubenita, bogadita na psoof kiiñ ksi Manases , jau ze Jeliloti, ze kwaŋ Jurdoŋ zolo zosaak Kanaan, bolemp pkak phyeek ze kwaŋ krik antom baña iin uzuuz . 11 Kero bowk Israel te bo lemp pkak pminzpun ze klil ksi Kanaan, ze kwaŋ Jordon, zojir Israel, 12 Bozoklor uzuuz ze Silo phya pgut na boko.
13 Hunkran bowk Israel hildun Fineyas, awk nmpenen Uzi Eleazar zosaak osi Jileadi, ze borubenita, bogadita na psoof kiiñ Manases . 14 Boyeek 10 bo ya na yaa, kana ña loŋ ze kiiñ ksi Israel; kana ña loŋ hil o nyeek phwk pliin ze psoof baña Israel.
15 Kero bo jau ze borubenita, bogadita na psoof kiiñ ksi Manases, zosaak osi Jileadi, bo jak baka: 16 Uzoklor uzuuz usi NYEEK bo phyep nde: Ezi ka nde do pjwa pndaapi zurun Uzi Israel, ze hankri nde hhutun pzal NYEEK, nde lemp pkak pñankun na NYEEK? 17 Ka pjwa Peora pozi liiŋ nja? Ŋanun okiŋo jet duzu uzoñnor usi baña NYEEK anjau hankri njazi jiinz ze pjwa pminzpun. 18 Hankri nde hutun NYEEK! Ze nde nazoo pñankun na NYEEK hankri, faan Apdeuzar uzoñnor usi Israel uzuuz . 19 Zosaak nde kaunk ampjiinz, nde phaño phya osaak osi NYEEK, zun oku NYEEK oonze, nde kseh phij ze psoof nde, nde ika nazoo ñankun na NYEEK, nde ika telman ñankun na ndo antom plemp pkak pani pho pkak psi NYEEK. 20 Ka Akaŋb, awk Zera, azi juwi kero kajek ŋun ŋnsi Uzi neeŋi? Oreu ozi bi duzu uzoñnor usi bowk Israel? Hunkran, mbaza akezun nkolo zonkont pjwa lo.
21 Ka bowk Rubeŋ, bowk Gadi na psoof kiiñ ksi Manases seemb boko jaa, boyeek phwkpliin Israel: 22 " NYEEK, Uzi unkai philun uzuuz! NYEEK, Uzi unkai philun uzuuz! Umee! Israel ka pme uz! Ze un ondai oun ja, nja nazo ñankun na NYEEK, osa oko nja dilm NYEEK, ika a hutun nja phila. 23 Ze nja lemp pkak antom pkulan NYEEK ofez, antom pdo wojun unturoi ze duzu polo, mbar nja lemp pkak psi wojun usi ŋun ŋnde, mbar pdo wojun usi phyooŋ, NYEEK opkiŋ nja.
24 Mbaza hunkranda! Nja pdola na mnkalo mnsi faa bowk nde bo bi phyep bowk ndo: El nde kaun na NYEEK, Uzi Israel? 25 Nde bowk Ruben na bosi Gadi, NYEEK zu Jurdoŋ in jaka klil ze psoof ndo. Nde zi ka kfah ze NYEEK. Hunkra bowk nde hilnu pzu bowk ndo bo kak ofez bo hutun NYEEK. 26 Un ominzi kaun ka ndo jaa: Nde biir nja lemp pkak. Pozi o psi un onhaloi ka pozi o psi un onturoi ze wojun. 27 Ka oka pho mnjaaŋzin mndolomi ze psoof ndo na nde, ze psoof bowk ndo na bowk nde zurun mnjaaŋzin antom bo hilun ptihunar NYEEK na ŋnsaam ndo wojun na un onhaloi osi phyooŋ, zonkont bowk nde bobi pja faan: Ndezi ka kfah zurun NYEEK.
28 Un ominzi kaun ndo jaa: "Ze bobi jak ndo hunkran ka mbar bojak kiiñ ndo, ol ndo seembun boko: Nde tenun mnlunki mnsi pkak boliin ndo lempi psi NYEEK; ozi o osi un onhaloi ka ozi o zonkont wojun unturowi ohilun pho mnjaŋzin ze psoof ndo na nde."
29 Ndozi hilun pdo un ominzi pnazo pñankun na NYEEK, antom phutun lo, plemp pkak psi un onhaloi osi ŋun ŋnde ŋnsi wojun booulobi ze mbaza pkak pa psi NYEEK phopi zurun oku lo.
30 Kero ntihun Uzi aknduoi Fineias na boyeek uzoñnor boilunk onalo bowkun iieen bowk Israel te un bowk Ruben, Gadi na Manases jaki, bodukoo lilni. 31 Fineias, awk nmpenen Uzi aknduoi Eleazar, jak bowk Ruben, Gadi na Manases : "Hankri ndo mee NYEEK o ze psoof nja zonkont ndezi kit oiimna. Ze krankanki nde burburun bowk Israel ze kñen NYEEK.
32 Fineyas awk Eleazar nmpenen Uzi na boyeek bokak zuzoñnor, bo hutun bowk Rubeŋ, na Gadi zosaak Jileadi, kak phya osaak osi Kanaan phya pzuup baña Israel. 33 Bowk Israel liilni na mnseembr, bozah Uzi, bozi pot hutnor phya pgutun psok osaak osi bowk Rubeŋ, Gadi hili ooni.
34 Bowk Rubeŋ na Gadi du ktiim pkak "Mnjaaŋzin" jaa: Uni o pho mnjaaŋzin ze psoof nja zonkont NYEEK a o Uzi.