Olado otoomi osi Joswe
24
Ka Joswe zoklan iiñ uzuuz isi Israel ze Sikeŋ; adu boyeek bosi Israel na boyeek boko bo dol olado na botihun bo bi sondo zurun Uzi.2 Joswe jak baña uzuuz : "Hunkran NYEEK, Uzi Israel jakun: "Zokil ondiiman boliin nde, injaka Tera, aliin Abroŋ na aliin Naor, bo hil o zojirun krik ksi Boeufrate; bo hil aka tihunar ŋnzi ŋnloŋo, 3 ka nji jek aliin nde Abroŋ zojirun krik, nji zwa antom a yaanz zosaak kanaan uzuuz, nji bundar kiiñ lo, nji hula Jaki. 4 Nji hul Jak, Jako na Esau. Nji hula onkuŋ osi Seir antom o osi Esau, ka Jako na bowk bo sol ya Ejitu.
5 Nji bi hil Moises na Aroŋ, Nji zu okiŋo ze Ejitu, nde me un nji doli ze psoof boko antom punun nde zolo. 6 Kero nji punun boliin nde ze Ejitu, nde bil anjau ze krik; bojipsyu dookun boliin nde na nkaru ireta ŋndiiman ŋnsi ogut, na bogutun bondapoki ŋnsumpliz anjau ze krik kjeenkle. 7 Bo du NYEEK antom aziinkun boko; alo azu urimrim ze psoof nde na boejipsyu abi na mnzup ler boko. Ikil nde iin un nji lempi ze Ejitu. Antom ka nde o zolaal jon zolo.
8 Nji bina nde zosaak boamoreu bonhoki zojirun krik Jordoŋ. Bo gut na nde, ka nji zu boko ziñen nde, nji toomna baka zurun nde. Antom nde seh osaak boko. 9 Kero Balaki, awk Zapor, nliin nnsi bomoabita, nazo pgut na Israel a hilan pdu Balaoŋ, awk Beor, abi zu nde khuzin. 10 Mbazi di pte Balaoŋ. Hunkran adukoun zu nde mnjona. Ze mi nji burburumunk nde ze kñen Balaki.
11 Kero nde haño krik Jurdoŋ jau ze Jeriko. Baña bonhoki ze Jeriko bogut na nde, bonhoki uz injaka boamoreu, boperiseu, bokananeu, boeteu, bojirgaseu, boeveu, bojebuseu, nji zubaka ze kñen nde. 12 Nji hil ŋntislu zurun nde, ŋndookŋi boko injaka boliin 2 bondaakun uz bosi boamoreu. Mbaza yeej nde, ka mbaza insaaŋen nde ipunuyun boko. 13 Nji hul nde osaak osi nde ani ptihun na imbaau nde oonhi ndezi lemphya, nde de mhuba na mungwa nde ani plaal.
14 "Hunkranda, nde zuun NYEEK pña nde tihunara naa, na ijuuns injiinzhi, na un onjiinzi, nde lisun zuri ŋnzi ŋnsi boliin nde hilunk tihunar kero bo o zojirun krik Eufrates, ze Ejitu uz, nde tihiunaran NYEEK. 15 Ze nde ampdigzan ptihunar NYEEK, nde datunk hankri ña nde kai ptihunar, ze or ŋnzi boliin nde hilunk tihunar ŋa zojirun krik ka men ŋnzi boamoreu nde oi zosaak boko. Nji na mez ni, ndo ptihunar NYEEK."
16 Ka baña seemb lo jaa: Ndozo pbir NYEEK, antom phya ptihunar ŋnzi ŋnloŋo. 17 Zonkont NYEEK o Uzi ndo, upunun ndo na boliin ndo zosaak Ejitu. Udolunk ndo mnjaaŋzin myeek zurun ikil ndo, ubap ndo ze book uzuuz ndo yaanznbi. Na psoof baña uzuuz ndo zipki. 18 NYEEK dook baña bondaaki uzuuz zurun nja, na boamoreu uzuuz bo hili o zosaak; ndo uz ndo sa o ptihunar NYEEK, zonkont a oi Uzi ndo.
19 Joswe jak baña: Ndezo philun ptihunar NYEEK, zonkont a o Uzi unjiinzwi unkabi kjoozi ze nja zal ŋnzi ŋmpazŋi bozo pjour udilm nja, pjour pjwa nde. 20 Ze nde hutun NYEEK, ya tihunar ŋnzi ŋani pmeo, Uzi opdo nde un onjoozi. Utoom na nde, ŋanun udo nde mnjona urun.
21 Baña jak Joswe: Mbaza hunkranda. Ndo ptihunar NYEEK.
22 Joswe jak baña: Nde o mnjaaŋzin ñankun na yeen nde, nde ja, nde pdat NYEEK antom, ka bo seemb lo: "Ol ndo jakun."
23 Joswe jak baka: Nde lisun zuri ŋnzi ŋani pmeo ze psoof nde, nde hulun NYEEK, ijuuns nde Uzi usi Israel. 24 Baña jak Joswe: Ndo ptihunar NYEEK, Uzi ndo, ndo pte olado ujaki.
25 Zonu ominzun Joswe do phuuz na baña. Ze Sikeŋ a hul baka plul na ŋiimna. 26 Apis olado ominzun zoliuri oiimna osi Uzi, ajek plaak pyeek antom nazun polo zeu bun bu naamnzani na pnzeene bu hili ñog ze kwaŋ zun ze iimna ze si NYEEK. 27 Joswe jak baña uzuuz , olado ominzi oli o pho mnjaaŋzin ze nde, zonkont pte olado uzuuz osi NYEEK zupi nja opot sa o pho mnjaaŋzin uz mhani pjan na nde, nde ki kjubjubun Uzi nde.
28 Hunkran Joswe taasdun na baña, ña khya ze mez lo.
Pkez Joswe na psi Eleasar
29 Kero ŋun ŋminzŋi toom uzuuz Joswe awk Nuŋ, ntihun NYEEK akez na ŋnlur 110. 30 Bo moya zosaak osi phij lo, ze Timnat-Sera, zonkuŋ osi Efraŋ ze duzu onkuŋ osi Gaas. 31 Israel tihunar NYEEK ze phila Joswe uzuuz , na phila uzuuz psi boyeek bonzafki ze phila kero Joswe kezi, bomeuki ŋun uzuuz ŋnsi NYEEK lempŋi Israel.
32 Ze Sikeŋ uz bomoi imoon isi Jose, isi bowk Israel biini ze Ejitu. Bo mohia ze zun ze zesi Jako hilunk ganzi ze kñen bowk Amor, aliin Sikeŋ ze prez osent zosaam prat. Zun ze minzun ze hil hijo ze kiiñ ksi Jose.
33 Eleasar, awk Aroŋ, asa kez uz ka bomoi lo ze nkuŋ ŋnsi awk lo Fineyas hulohi ze nkuŋ ŋnsi Efraiŋ.