Nku ze Silo
18
Bouk Israel uzuuz zoñnor ze Silo, bo bamu nku ŋnsi ukoulor dolo, kero boseh osaak. 2 Ze psoof bowk Israel oduklo hiñ jaand iani pho iiji.3 Joswe yep bowk Israel: "Nkil ŋho ndeŋu phatro, ndezo pseh osaak NYEEK, Uzi boliinde, huli nde? 4 Nde pdat boiinz bohajinz ze iiñ, antom nhil boko bo ya ten osaak, antom bo dol ojaŋi osaak (mapa) ze mi booi phairo osaak antom piij; antom ol bokakunk ze nji. 5 Nde phya ŋhyas jaand. Osaak Juda opdukno zeu, kiiñ José opdukno duzu. 6 Otomr nde pzu zojaŋi osaak (mapa) mi ŋnlik jaand haiomi, nde pbina ŋa phulin zi, antom nseŋ oneejo zurun NYEEK, Uzi nja. 7 Bolevita bozo pka kjira ze psoof nde, zonkont kjir boko ka pho botihun NYEEK. Gadi, Ruben na psoof kiiñ Manases onko seh piij boko psi Moises ntihun NYEEK huli boko ze pmair onu, zojirun Jordon."
8 Kero boiinz bominzkun kahia pten osaak, Joswe lana baka jak boko: "Nde ya, nde yaanz osaak ominzu uzuuz , nde lempun ojaŋi osaak (mapa); antom nde kak ze nji; njo pseŋ oneejo osi nde ze Silo, zurun NYEEK.
9 Boiinz bominzkun ya zipi zosaak ominzun uzuuz , ka bolemp ojaŋi osaak (mapa); zoliuri oloŋ ze mi, imbau omi: Bohay ŋa ŋhias jaand. Bo kak ze lo ze Silo zun uzoñnor. 10 Joswe hienk oneejo ze boko ze Silo, zurun NYEEK. Zolo ka hai bowk Israel osaak, ze mi iiñ boko haiomunk.
Piij psi Benjamiŋ
11 Oneejo jet duzu kiiñ bowk Benjamiŋ, ze mi boomi ze plin boko. Osaak bo uloi duko ze psoof kiiñ Juda na kiiñ Joséa. 12 Klil boko zojir duzu osaak (Norte) tepun ze Jordon, pahio zojir Jeriko na duzu osaak (Norte) zip zonkuŋ ya ze phiour onu, ya zip zolaal osi Beti-Aven. 13 Zun zminzun klil zip zojir Luz, ze kwaŋ Luz, zozee Betel, ze zeu osaak; ieto anjau ze Astaroti-Adar, ze kwaŋ onkuŋ ooi zojir zeu osaak Beti-Horom zeu.
14 Zojir phiour onu, klil uglo ze zeu osaak ptep zonkuŋ ooi zurun Beti-Oron, khia ankit pun ze Kiriati-Baal, ooi Kiriati-Jearin, kmbau bowk Judá; zonze klil boko ze pmair onu.
15 Klil boko ze zeu osaak ptep ze ptoomi zojir pmair onu ze Kiriati-Jearin, khia ankint jaui ze plik psi mnzup Neftoa. 16 Klil hieto ankint jaui ze ptoomi onkuŋ ooi zurun ze psoof onkuŋ ŋnsi awk Inon, ze duzu osaak ze psoof nkuŋ ŋnsi Refain, khieto ya ze psoof onkuŋ osi Inon zojir bojebuseu, phya zeu osaak, antom hieto ya ze plik Rojel; 17 klil uglo ya duzu osaak, kpun ze En-Semes, kzip ya ze Jeliloti khoki zurun pnkunte psi Adumin; khieto anjau ze plaak psi Boan, awk Ruben, 18 Khia oloŋ zojir duzu zonkuŋ ze pten ze Beti-Arabá; hieto anjau ze Arabá. 19 Kzip zojir ominzun anjau zojir osi Beti-Hogla, ya ze duzu osaak, ze ptoomi pkiŋ pntik psi krik khai. Kntomki ze krik Jordon, ze zeu osaak, krik kminzki ko klil ksi zeu osaak.
20 Zojir pmair onu olil na krik Jordon; osaak ominzi o piij psi kiiñ ksi Benjamiŋ, ze klil boko ze pkinz ze plin boko.
21 Imbau isi kiiñ ksi Benjamiŋ ze plin boko, Imbau ika iminziun ioo: Jerikó, Beti-Oglá, Emek-Keziz, 22 Beti-Arabá, Zemarain, Betel, 23 Avin, Pará, Ofra, 24 Kafar-Amonai, Ofni na Gaba imbau indisiñene na imbau ipuguz na ŋntank iolo.