Boliin 5 kuund Jibeoŋ
10
Kero Adoni-Zedeki, nliin Jerusaleŋ, te Joswe seh osaak Ai, sok olo uzuuz, adol Ai na boliin dolo ze mi ahilunk do Jeriko na nliin dolo. Ka te uz baña Jibeoŋ do phyooŋ na boisraelita, antom o ze kwaŋ boko. 2 Ka liinki, zonkont Jibeoŋ hil oko kmbaau khyeek, injaka kmbaau knhili ka nliin; kpe Ai pmag; boiinz kolo uzuuz bohilun ogut. 3 Hunkran Adoni-Zedeti, nliin Jerusaleŋ hilanu nkuni ze Oan, nliin nnsi Hebroŋ, Piran nliin nnsi Jaramuta, Jafya nliin nnsi Lakis, na Debir, nliin nnsi Egloŋ, jak boko: 4 Nde bi ziinkni nja gut na Jibeoŋ, zonkont azuunk phyooŋ na Joswe na bowk Israel.5 Hunkran boliin 5 bosi boamoreu zoklori, bowk boliin Jerusalen, Ebron, Jarmuti, Lakís na Eglon na boghutun, ka bo kund Jibeoŋ antom jet dolo ogut.
Joswe ziinkun Jibeoŋ
6 Hunkran, boiinz bosi Jibeoŋ hilanu Joswe nkuni zuzoñnor ze Jilgal jaklo: Ika hutun bojuuknu, biri osar,osar uziinkni, zonkont boliin uzuuz bosi boamoreu, bonhoki zonkuŋ bokoulori antom pgut na ndo.
7 Hunkran Joswe punun ze Jilgal , na bogutun lo uzuuz, na bonkakunk ulipl na kziu zogut. 8 NYEEK jak Joswe: Ika kalo baka, zonkont nji hulu baka ze kñen nu, ka ña loŋ ze boko azo pnaz zuru nu.
9 Joswe pun ze Jilgal, yaanz urim uziindan, kabi duzu boko osar. 10 NYEEK zu baka zubiinkro zurun Israel, ka aka kpe duzu baka ze Jibeoŋ, bo dook baka ze book unhyabi Beti-Oroŋ, bofiŋ baka anjau ze Azeka na Makeda. 11 Kero boka zi baña Israel, ze book umpumbi ze Beti-Oron ya Azeka. NYEEK hhutun olura ilaak duzu baka bonkezki zolura ominzun bopee baña bosi Israel fiŋuki na ieje psum.
Onu, na pli ŋnazi zun zloŋ
12 Zun NYEEK ulunk boamoreu ze kñen bowk Israel, Joswe jak NYEEK zurun bowk Israel: Onu, nazun ze Jibeon; wi pli, nazun ze psoof nkuŋ ŋnsi Aijalon.
13 Hunkran onu nazun zun ze loŋ, ka pli sa naz uz, an ka boghutun fiŋ bobir boko, unominzi o pisoo zoliuri osi Jasar. Hunkran onu dukoun nazi ze psoof inzun, jon pjet, an ñog pzip onu uzindana.
... 14 Ozi ka onu onami na ominzun, ze ŋnu ŋonko zip na nkmbiŋi zurun. NYEEK te prim ñiz aloŋ, zonkont NYEEK hilunkun gutnar Israel. 15 Ka Joswe na boghutun Israel kak uzuuz , ze zun uzoñnor ze Jilgal.
Boliin 5 bosi boamoreu fiŋo
16 Boliin 5 bondaakun bozii, ya meno zuir ze Makeda. 17 Ña ya zuup Joswe jak lo: Ahiin boliin kñene ukun bomenouki ze uir ze Makeda. 18 Joswe jak baka: Nde kilun ilaak ieek, nde zu ze mntum uir, antom nde zu boiinz antom boieŋ wolo; nde ika nazi, 19 nde dookun bobir nde antom nde gut na bondukokun ze kfez nde, nde ika hutun baka ka bo nej zimbau boko, zonkont NYEEK, Uzi nde hul baka ziñen nde.
20 Joswe na bowk Israel fiŋ baka uzuuz . Bompozki dukoukun, bomburki ya imbau inlinsii. 21 Boghutun uzuuz kak na phioŋ ze Joswe, zun uzoñnor ze Makeda. Ozi ña ankazii pladar bowk Israel un onjozi .
22 Ka Joswe jaa: Nde haula mntum uir antom nde bina boliin kñene ukun. 23 Hunkran bodolun, iana boliin kñene ya ulo: Nlin Jerusalen, nliinHebron, nliinJarmuti, nliinLakís na nliinEglon. 24 Kero bo iana boko hul Joswe, ka adu boiinz uzuuz bosi Israel na boyeek boghutun boiawki nalo: Nde bi pol boliin buki ze izuz, ka bo ya pol boko zizuz.
25 Joswe jak boko nde ika kalo, nde ika linki. Nde linsun, nde ka kziu, zonkont hunkran NYEEK ompdo bobir nde uzuuz bosi nde gutnki. 26 Kero Joswe fiŋ boko hakun boko ze iunu kñene; bo fikoo za ankint jau zemontna.
27 Kero onu ka iou, Joswe zu boghutun bopunun boko ze iunu iminziun. Bolis baka ze uir boilunk betni, bo zuu ilaak ieek ze mntum uhir, ika hum oza anjau hankri.
Joswe pot ka kpe
28 Zonu ominzun Joswe seh Makeda, afiŋ nliinna baña uzuuz ze kmbau na keje. Antom na baka uzuuz ; azi duk ñaloŋ. A do nliinMakeda ze mi adomunk nliinJerikó.
29 Ka Joswe na boisrael uzuuz zipi ze Makeda ya Libna, gut na Libna. 30 NYEEK hul Libna, uzuuz na nliinboko, ziñen Boisrael, bonfinki baña uzuuz na keje baña uzuuz bo hili o zolo, ka ña aloŋ azi dukoo. Bo do nliinboko ze mi bodomunk nliinJerikó.
31 Ka Joswe na Boisrael bo zip ze Libna phya Lakís, ka kund, Lakís gut na Lakís na osaak ominzun. 32 NYEEK zu Lakís ze kñen Boisrael, bo seh Lakís zonu opugzan. Bojek ieje, fiŋ baña uzuuz boouki ze kmbau, ze mi bo domunk Libna. 33 Oran, nliin ninsi Jezer, ya zinkun nliinLakís ogut, ka Joswe fiŋ lo na baña lo, ka ña loŋ azi dukoo na phila.
34 Joswe na Israel uzuuz bozip ze Lakís phya Eglon, kuund Eglon, antom gut na baña osaak ominzun, 35 boseha zonu ominzun, fiŋ na ieje baña uzuuz bo hili o ze kmbau, botomna baka uzuuz zonu ominzun, ze mi bo domunk Lakís.
36 Ka, Joswe na Israel uzuuz bopun ze Eglon phya Ebron, gut na baña Ebron; 37 boseh, Ebron, uzuuz na ŋnsaak ŋntik uzuuz , fiŋ na nliindolo na keje na baña uzuuz boilunk o ze kmbau. Bozi hutun ña aloŋ na phila, Joswe sok kmbau uzuuz , ze mi bolemp munk Eglon.
38 Joswe na boisraelita uzuuz bo uglo, gut na Debir, 39 boseha, na nliindolo, na ŋnsaak ŋntik, ŋhoŋi zolo. Ka bo fiŋ na ieje baña uzuuz boouki zolo. Botom na baka uzuuz ; bozi hutun ña aloŋ; bodo Debir na nliindolo mnsi bodomunk Ebron, na Libna na boliin boko.
40 Hunkran Joswe sehun osaak ominzunk uzuuz , nkuŋ, zojir zeu osaak (Sul), ŋreŋe pziir mnzup, boliin boko uzuuz . Azi hutun un oloŋ na phiila, ŋun uzuuz ŋi kiefzŋi atomna ŋa ze mi NYEEK, Uzi Israel Jakmunk. 41 Joswe fiŋ baka ze ptep ze Kades-Barneia anjau ze Gaza, na osaak Gosen uzuuz anjau ze Jibeon. 42 Joswe seh ŋnsaak ŋminzŋun uzuuz na boliin ŋolo zogut oloŋ zonkont NYEEK, Uzi Israel, hilunk gutnar Israel.
43 Ka, Joswe kaki, na baña Israel uzuuz , ze zun uzoñnor ze Jilgal.