Bojibyonita dar Joswe
9
Kero olado ominzi jau ze iwaz boliin bonhoki zojirun krik Jurdoŋ phyana phyour onuu, ze nkuŋ zun, ze ntifzi, ze ŋnjir uzuuz ze kwaŋ krik Mediteranyu ampjau ze Libanu boliin bosi : Boeteu, boamoreu, bokananeu, boperiseu, boeveu na bojebuseu. 2 Bozoklani o ze prim ploŋ, phya pgut na Joswe na Israel.3 Baña uzuuz bosi Jibeoŋ te un Joswe lempi Jeriko na Ai. 4 Ka bo ber pme mi bo omi pdarlo, boloŋ ze baña bominzkun kito o bohili nliin bojek ŋnlaaku ŋnzaf zu duzu ŋhuru boko, na imbaru injad inzafhi, puzi, isi pkeme, infazoi. 5 Bo zu isapat inzafhi, ze izima, infazfazni, timo yun inzafhi. Opoŋ uzuuz bo yani okai ze book ba fuli. 6 Bo ya pten Joswe zun uzoñnor ze Jilgal, bojaka na boiinz Israel. Ndo bin zosaak onloi maakrin: Hunkranda, nde dolun phuuz na ndo.
7 Ka boiinz Israel seemb boeveu jak boko: Nde hilun pho ze kwaŋ ndo; boon bi ndoun phuuz na nde?
8 Ka bojak Joswe: Ndo oko bojuuk nde. Joswe yep boko: Nde oko bino? Nde punz zoo?
9 Ka bo seemb lo: Bojuuk nu bin zosaak onloi zonkont ktiim NYEEK, Uzi nu, ndo te ktiim wa, na ŋun uzuuz ŋi udoŋi ze Ejitu. 10 Na un udoli boliin 2 bosi boamoreu bonhoki zojirun krik Jordoŋ, akndwoi Syoŋ, nliin Esboŋ, na Og, nliin nnsi Basan, anhili o ze Astaroti. 11 Un ominzun kaun boyeek ndo na baña uzuuz bonhoki zosaak ndo, bo jakndo ndo ber ŋun ŋnde ze paat, antom ndo bi jik na nde, ndo jak nde: Ndo oko bojuuk nde, nde hilun phuuz na ndo. 12 Nde tenun opoŋ ndo. Ndo jeka oiik zonfurnu kero ndo bamun olo ze mez zonu ndo pununk bi pjik na nde, ndo pjak nde: Ze krank okaink ankint bulzi. 13 Imbaru indai isi injand ndo sumunink pkem yoko ihalu yotink tawo.Yun ndo timoi na isapat ndo inzafhi ze mi book lomunk.
14 Hunkran boiinz Israel sehun ŋun ŋnde bozi ñaun ozaŋu NYEEK. 15 Joswe zu phyooŋ na boko, ka ado phuuz na boko, antom jak boko aphutun baka na phila. Boyeek uzoñnor bodigzan na ubisro.
16 Kero ŋnu 3 zipi, ŋnsi bodoli phuuz, bote baña ukun boko, bokinz boko boouki ze kwaŋ boko. 17 Kero bowk Israel pun psol, zonu oajzan bojau zimbaau boko, indwoi Jibeoŋ, Sefira, Beeroti na Kiryati-Jeariŋ. 18 Bouk Israel bozi gutna baka zonkont boyeek boko hilunk bisro ze ktiim NYEEK, Uzi Israel. Hunkran bowk Israel uzuuz kulumun boyeek boko.
19 Boyeek boko seemb uzuuz na baña jaa: Ndo bisro baka ze ktiim NYEEK, Uzi, un ominzun kaun ndo zi hilun pdapro baka. 20 Un ondai ol njaun pdo: Nja phutun baka na phila zonkont oreu oyeek osi Uzi ki kjet duzu nja zonkont mi nja bisromunk boko. 21 Bohilun pduko na phila. Ka bo pho botau imul na boliknar mnzup zuzoñnor uzuuz . Baña digun pdo mi bohuli jakmi.
22 Joswe du bojibyonita, yep boko: Ezi ka nde dar ndo, jaa nde pun un onloi, nde kintkink onze psoof ndo? 23 Krank nde pho zeu khuzina. Ze psoof nde ozo phaŋo botihun, botau imul na boliknar mnzup ze ku ksi Uzi ni.
24 Ka bo seemb Joswe, jaklo: Ntihun nu zupoo un onjiinzi jakoo, NYEEK, Uzi nu lado na ntihun wolo Moises a hul nde osaak uzuuz , asa toom na baña osaaki uzuuz zurun nde. Ndo liink nde ze phila ndo; zonkont nde kaun ndo do jeink. 25 Ndouki krank ze kñen nu. Dolun un umei ona mnjona ba jaal pdo.