Ai sehoo
8
Ka NYEEK jak Joswe: Ika kaloo, ika behroo. Sona boiinz ogut uzuuz, uya gut na Ai, zonkont njo pzu nliin Ai ze kñen nu, na baña lo, kmbaau lo, na osaak lo. 2 Wo plemp Ai, na nliin dolo ze mi ulempmunk Jeriko na nliin dolo, ze mi uhilunk jek priza boko na ŋnsaam boko, zuun bogutun boloŋ bo ya meno ze kfez kmbaau.3 Ka Joswe nazo na boiinz 1000 uzuuz antom ya gut na Ai. Adat boiinz 30.000 bonkauki ulipl na kziu zogut, hil boko zurim, 4 Ka hil boko jaa: Nde tenun, nde betun ze kfez kmbaau, nde ika loka maakrin. Nde ka pbamb uzuuz . 5 Nji, na baña bonzoñnorki ndo phya kmbaau. Zopunr boko bi pjik na nja mi bo domunk ka nja zi boko. 6 Nde hutnan baka bo bi ze kfez nja, ze nja punun boko ze kmbaau zonknot bo pja. NYEEK, Uzi nja ze mi hulmunk nja zu yaas undaun hunkran njaun pzi boko. 7 Ze minzmun nde pun zun nde menozi, nde pseh kmbaau, zonkont NYEEK, Uzi opzu ka ze kñen nde. 8 Ndenkan seh kmbaau nde zuun uroo ze ka. Nde pdo ze mi NYEEK jaki. Nde zuun kwaz ze un nji jaki nde.
9 Hunkran Joswe hildun boko ka bo ya menoo, boduko ze psoof Betel na Ai, zojir Ai oni ze phyour onuu. Joswe zip zurim uminzun, na bogutun boloŋo.
10 Ka Joswe luŋ du bogutun ya zurun boko na boyeek Israel pgut na Ai. 11 Bogutun uzuuz bonhoki na lo bomint anjau zurun kmbaau, bo o zun uzoñnor duzu Ai. Oka unjir ze psoof boko na kmbaau. 12 Joswe hil opunun boiinz 5000, ka zu boko ka bomeno ze psoof Betel na Ai, ze kmbaau knhoki zojir phyour onuu. 13 Hunkran bozudun baña uzuuz ze zun uzoñnor zojir duzu kmbaau bolimo ze pmair onu ze kmbaau; ka Joswe ya zurim uminzun ze psoof unjir.
14 Kero nliin Ai iin un onkmbili nazoo osar, osar, ze khanan na boiinz kmbaau uzuuz , bo sol phya ogut na baña Israel zun ze ñogzi ze unjir usi Jurdoŋ phya pjik na lo. Ka azi hil me bogutun meno ze kfez kmbaau phya pgut na lo. 15 Joswe na baña Israel uzuuz bokito injaka bo pzi ogut, bozi zurun boko phya book olaal. 16 Onkanun boiinz uzuuz bonhoki ze kmbaau bo dwo antom pdook boko. Boya ze kfez Joswe ankint ñal kmbaau. 17 Ka ñiinz aloŋ azi duko zosaak Ai, zosaak Betel, ani pun ze kfez bowk Israel: Boduk kmbaau boko ka khawi kero boka dook boko.
18 Ka NYEEK jak Joswe: Solnan kñaakon ksi ubupkunk ze kñene zojir kmbaau Ai, njo phul Ai ze Kñene nu. Ka Joswe solum kñaakon ksi abupki ze kñene, zojir kmbaau Ai. 19 Kero ka solun kolo, ka bogutun deeŋo osar, osar zun bohilunk menoo, ka bo zii, neej ze kmbaau, ñuz kolo uroo, osar, osar.
20 Boiinz Ai kok kfez, iin odu ze kmbaau oka payo phya duzu, ka bozi ka mnsi bokburmi phya zojir oloŋ na oloŋ; zonkont boiinz bonhilunk dokoo zolaal bo huglo kak ze kfez baña bondookunk boko. 21 Kero Joswe na bogutun Israel iin mnsi bogutun bo hilunk meno bo o ze kmbaau, mnsi odu kpayomunk, ka bo huglo jik na bogutun Ai. 22 Ka bogutun bonhoki ze kmbaau pun pjik na boko; hunkran bodukodun ze psoof bogutun Israel. Ze ŋnjir 2 uzuuz ; ka bo fiŋ boko uzuuz ka ña loŋ ze boko azi bur pkez pminzpun. 23 Ka bo bup nliin Ai utente, ya hul Joswe.
24 Kero bogutun Israel toom pfiŋ bogutun Ai ze pgof, zolaal zun bozalunzi boko ankint jau zolo, zun bogutun fiŋnozi uzuuz na yeeje. Bogutun Israel kak uzuuz ze Ai fiŋ baña bonduklokunk zolo. 25 Baña bonkezki zonu ominzun, boiinz na bohaz, bo o baña 12.000, one baña uzuuz bonhoki ze Ai. 26 Joswe azi kakun kñene ksi asoondki kñako ambokint toom na baña Ai uzuuz . 27 Bogutun Israel jek ŋnsaam na priza psi kmbaau, ze mnsi NYEEK jakmunk Joswe.
28 Joswe tur Ai hugul olo onkuŋ ilaak anjau onu osi hankri. 29 Asik nliin nnsi Ai ze pun ploŋ, hutunlo zolo ankint jau ze montna. Kero onu ka you, ka Joswe jak bogutun bopunun puma ze punu, bo lis polo ze plumun phyeek psi kmbaau. Ka bo deeŋ onkuŋ oyeek osi ilaak duzu lo, ioi zolo anjau hankria.
Joswe pis oiimna.
30 Ka Joswe lemp pkak zonkuŋ osi Ebaal psi NYEEK, Uzi Israel, 31 ze mi Moises, ntihun NYEEK, hilmunk bowk Israel. Ka lemp ze mi opisomunk zoliuri oiimna osi Moises ze pkak psi ilaak inkonayolo, isi kzij kloŋ aŋi pzwo ze yolo. Duzu yolo bo zu onsaam onturoi osi NYEEK bo do wojun usi ogoŋar osi phyooŋ. 32 Zurun bowk Israel, Joswe pis ze ilaak un Moises onko pisi. 33 Baña Israel uzuuz, na bo ya hil o ze psoof boko, na boyeek boko, na bo huli, na bo dol olado, bo hil o ze ŋnjir 2 uzuuz ŋnsi ukau NYEEK zui ikil ze bonkuŋoki ukau usi phuuz NYEEK one botihun NYEEK bo si kiiñ Levi. Psoof boko boi o zurun onkuŋ Jeriziŋ, ka psoof ploŋo zurun onkuŋ Ebaal, ze mi Moises, ntihun NYEEK, jakunk zoseke apzu mnjona duzu baña Israel.