Boisraelita doko zogut zonkont pjwa Akan
7
Bowk Israel do pjwa zosaak ondwoi Ai; Akan awk Karmi. Awk Zabdi, awk Zera, ze kiiñ Juda, Akan kiij ŋun ŋiimuŋi zurun Uzi; okaun oreu NYEEK jet duzu boko.2 Kero Joswe hil boko phya pten osaak ondwoi Ai ze kwaŋ Beti-Aven, ze kwaŋ Betel zojir pmair onu jak boko: Nde ya tem osaak Ai. Boiinz bominzkun sol phya pten Ai. 3 Kero bo bin pten osaak, jak Joswe: Ozi firo boghutun ya uzuuz , bo hilun phya baña 2000, 3000 bo pdook baña Ai: Ika nornorun baña. 4 Hunkran ahildun boiinz 2000, bonhyaukunk, doko zurun boiinz Ai. 5 Ka boiinz Ai fiŋ boiinz 36, bo dook bondukokunk anjau zuhir ilaak. Ijuuns boiinz yalo injaka mnzup.
6 Ka Joswe pas kbisa lo zoleef jet limo na mnkil zo zee, zurun ukau NYEEK anjau ze montna, alo na boyeek bondatokunk ze Israel; ka bo guroo mbool ze yeen boko. 7 Joswe jaa: "NYEEK, Uzi , yezi kaa, ku hañan baña ze krik Jordoŋ, bi zu ndo ziñen boamoreu antom bo do ndo khuzin. Ndo i hilun pduko zojirun krik Jordoŋ. 8 Aan NYEEK! Ye njoun pja? Bowk Israel zii, zurun bo bir boko? 9 Bokananeu te un ominzi, na bowk osaak uzuuz, bo pfoyo ndo, punun ndo zosaak; antom uzu ktiim nu zoon?"
10 NYEEK jak Joswe: "Nazoon! Yezi ka, ka ulimo zozee? 11 Boisraelita juwi, kit phuuz nji hulpunk boko antom bo baap. Bo kiiji, jubi, ba zu ŋun bokiij ŋi zun bo kfurunzi. 12 Un ominzun kaun ka bowk Israel bozi hilun pnaz zurun bobir boko, antom dek boko ufez, zonkont khuzin o duzu nde. Mbazi pot o na nde, ze nde ampsok ŋun nji jakunk nde sok ze psoof nde.
13 "Nazun, ujinjiinzun bopugi, antom ujak boko: Nde jinjiinznan ŋnleef nde zonkont faan, zonkont hunkran NYEEK, Uzi Israel jakdun: Israel ŋun ŋi Uzi jaki nde sok ŋho ze psoof nde. Nde ze hilun pnaz zurun bobir nde ze nde ampunun ze psoof nde ŋun nkaŋi psoko.
14 "Faan, nde pbi ze mi iiñ nde omi, kiiñ ksi NYEEK jaaŋi, ko pbi, baña ze pliin boko, bo ze pliin boko bo pbi. Pliin psi NYEEK jaaŋi, po pbi mez, mez, mez NYEEK jaaŋi, bo pbi ñiinz, aloŋ, aloŋ. 15 Ñiinz anhinoi na ŋun nkaŋi psoko, aka pturo zuroo, na ŋun uzuuz ŋnsi akaŋi, zonkont akit phuuz NYEEK, lemp un osi knah ze Israel.
16 Joswe luŋi, zu baña Israel bili kiiñ, kiiñ; Kiiñ ksi Juda jaaŋo. 17 Ka zu kiiñ Juda bili; jaaŋo ka kiiñ pzaro psi boserita; Ka bo zu pliin boserita bili mez, mez, jaaŋo mez Zabdi. 18 Azu mez ze minzdun bili ñiinz aloŋ, aloŋ, ajaaŋo Akan, awk Karmi, awk Zabdi, awk Zera, nnsi kiiñ Juda.
19 Joswe jak Akan: "Nmbukin, hulun NYEEK ulujl , Uzi Israel, uzuup pjuwa psi udopi zurun wolo. Krank zuupan un udoli; ika menun un oloŋ."
20 Akan seemb Joswe jak lo: "Owadadi, nji juwi zurun NYEEK, Uzi Israel, un nji doli oli: 21 Kero nji iin kapa knuroki ze psoof ŋun ŋnjekoŋi zogut ze Babilonya, na praata pnjaaupi nkilu 2, na ulook usi mhuru mnjaaumi psoof onkilu, ka nji jeu molo pee, jek molo. Mom nji menumink ze mezu oku, zozee, na praata ze zeu oku.
22 Ka Joswe hil baña, bozii, ya zoku, ka bo iin ŋun amenuŋunk na praata zeu. 23 Bo jek ŋun ŋminzŋun zoku, boyana ŋa ya hul Joswe na bowk Israel uzuuz, zurun NYEEK.
24 Joswe na baña Israel uzuuz , bojek Akan awk Zera, na praata, na kapa, na ulook usi mhuru, bowk boiinz na bohaz, na ŋiit lo, ŋhuru na ŋmpalalu lo zoku lo, na ŋun lo uzuuz ŋnsi akaŋi ka yana ŋolo zunjir usi Akor. 25 Ka Joswe yeplo: Yeze kaa, ka ukur ndo khuzin? NYEEK, o pbi na khuzin duzu nu. Hunkran baña Israel tapdun lo na ilaak, sa pot tap bondaakun uz na ilaak, antom tur boko na uroo.
26 Ka bo deeŋ onkuŋ oyeek osi ilaak duzu lo, zolo anjau zonu osi hankri. Onkanun zun ze minzun dwo unjir usi Akor anjau ze krankanki. Hunkran NYEEK toomdun na oreu loa.