Jeriko sokoo
6
Jeriko hil disi zonkont bowk Israel; ñazi hilun pneej ka ñazi hilun pun.2 NYEEK jak Joswe: "Nji hul Jeriko ze kñen nu, nliin dolo, bogutun na bonjafo dolo. 3 Nde uzuuz boiinz ogut, nde pfoyo omur uyaas uloŋ zonuu. An nde kint nde ka ŋnu 6. 4 Berun bopenen Uzi 7 bo yana itin 7 isi ŋmpalalu zurun ukau Uzi, zonu ojaandun bo pfoyo kmbaau ŋyas 7; antom boluul itin. 5 Zoyaar nde an te itin jon ze pluul, boguntun ka pkiik maakrin uzuuz uram uloŋ; omur kmbaau opjet. Antom bogutun neej kana ña zun a oonzi.
6 Ka Joswe awk Nuŋ du bopenen 7 bosi Uzi jak boko: "Nde yana ukau usi phuz; zurun bopenen 7 bosi Uzi bo phya na ikornet 7." 7 Ka jak baña nde zipun nde foyo kmbaau bogutun, nde yaanz zurun ukau NYEEK.
8 Kero Joswe toom plado na bogutun, bopenen 7 ukun bosi Uzi bonhoki phyana itin 7 zurun NYEEK bo dimpo book, ze luul itin boko. Ukau usi phuuz NYEEK ka zal boko. 9 Boiinz bonsagnorki igutnin bo ze yaanz zurun bopenen Uzi bo knluulki itin; boloŋ ka ya ze kfez ukau Uzi ze luul itin. 10 Ka Joswe zoŋ baña jaa: "Nde ika kiiki, nde ika zu ña te irim nde, nde ika hutun olado oloŋ pun ze mntuum nde, ampjau zonu nji jaki nde: Nde kiikun! Antom ol nde kiikun." 11 Ka, ukau NYEEK foyo kmbaau uyas uloŋ. Ka bogutun kak ya fur zun uzoñnor.
12 Joswe luŋ ze khanan; bopenen Uzi jek ukau usi NYEEK. 13 Bopenen 7 ukun bosi Uzi, bonhilunk yana itin 7 isi ŋmpalalu bo dimpo book zurun ukau NYEEK bo ya luul itin oloŋ, boiinz ogut bo ya zurun boko ka boloŋ ka yaanz ze kfez ukau NYEEK, itin ka luul oloŋ. 14 Zonu opugzan, bo pot foyo kmbaau bot kak zun uzoñnor. Hunkran bo dodun ankint ka ŋnu 6.
15 Zonu ojaandun, bonazoo ze khanan antom foyo kmbaau ŋhyas 7 ze minzmun, zonu ominzun bo foyoun kmbaau ŋhyas 7. 16 Ze ufoyo ujaandun, bopenen Uzi zañ ze pluul itin. Ka Joswe jak bogutun: "Nde kiikun, zonkont NYEEK hul nde kmbaau kndaaki. 17 Kmbaau ka psoko na ŋun uzuuz ŋhoni ze kolo, zonkont ko ksi NYEEK. Raabi, nkonalo nhap oleef a oun phil na baña bonhoki na lo ze mez lo, zonknot mi amenumunk boten osaak. 18 Ika nde jek ŋun Uzi jaki nde, nde sok, ze nde jek ŋolo nde bina onor na khuzin duzu uzoñnor usi Israel. 19 Iraat uzuuz na mhuru na imbaalu isi bronsi na isi iferu ihimni ze NYEEK; i ka phya uzuuz ze knjiiu."
20 Ka baña kiiki, ka botihun Uzi luul itin; kero baña siink itin uluul, ka bo kiik maakrin ka omur jeti. Kana ñiinz kmiint kneej zun ze ozi zurun lo, ka bo seh kmbaau. 21 Ka bo jek yeeje, fiŋ baña bonhoki ze kmbaau uzuuz , boiinz na bohaz, na bopoz na bonzafki na ŋnsaam: Ŋiit nkal, ŋnsaam ŋmpozŋi, ŋmpalalu na ŋhuru.
22 Ka Joswe jak boiinz bopugz bonhyakunk pten osaak: Nde nejun ze ku ksiñaaznehap oleef, nde punana za, na ŋun akaŋi uzuuz , ze mi nde bisromunk." 23 Hunkran bopoz bozala, bonhyakunk pten osaak neejdun, punun Raabi na aliin, na aniin, na boza, na bowkoliin. Ka bina pzaro boko ka bo ñalun boko ze zun uzoñnor bowk Israel.
24 Bo tur kmbaau na uroo, na ŋun uzuuz ŋhoŋi zolo; ka bo zu praata na mhuru, na imbaalu isi bronsi na ifeeru, ze knjiiu ksi ku NYEEK. 25 Ka Joswe laau phila Raabi nhap oleef, na bowkoliin aliin, na ŋun akaŋi uzuuz ; bo o ze psoof bowk Israel anjau hankri; zonkont amenumunk boiinz Joswe hilunk phya pten Jeriko. 26 Zokil ominzun, Joswe zu baña bisro lado khuzin zonkont kmbaau Jeriko jaa: Khuzin ksi NYEEK o pbi ze ñiinz anjewi pnazo pot plemp kmbaau Jeriko. Zo hir lo bool nnsek lo opkez, zotoomi utihun pzu hilumun nmbalan lo a pkez.
27 Ka ktiim Joswe garo ze ŋnjir uzuuz zosaak, zonkont NYEEK oi na lo.