Boliin bonhoki duzu osaak peoo
11
Kero Jabin, nliin Azor, te onowa, Joswe ka kpe ze boliin bonsumki, ka hilan Jobabi nliin nnsi Madon nkuni, ze nliin nnsi Sinroŋ na nnsi Aksafi, 2 ze boliin bonhoki duzu osaak zonkuŋ ze Araba, zojir zeu osaask osi Kinereti ze zun, ze nliiŋnorze ze Nafoti-Dor zojirun krik, 3 ze bokananeu ze pmair onu, na phyour onuu, ze boamoreu, boeteu, boperiseu, bojebuseu zonkuŋ, na boeveu uz, ze pñog onkuŋ, osi Hermoŋ zosaak osi Mispa. 4 Bopun na bogutun boko uzuuz bogutun bonsumki in jaka pii phopi ze kfar na ŋnsumpliz, na nkaru ŋnsumŋi ŋnsi ogut. 5 Boliin bominzkun bokoulan philun boko, antom ya zoñnor ze kwaŋ mnzup mnsi Meroŋ antom pgut na Israel.6 NYEEK jak Joswe: "Ika liink zurun baka, zonkont faan ze hori ondai njo phul Israel baka antom bofiŋ boko uzuuz . Wo pzu ŋnsumpliz boko pzakm, nde ptur nkaru boko na uroo.
7 Joswe na bogutun lo uzuuz ya osar, osar, bo jau duzu baka mnkartat ze kwaŋ mnzup mnsi Meroŋ. 8 NYEEK zu baka ze iñen boisraelita, ka bo fiŋ boko, dook boko anjau ze Sidoŋ, dyeek, ze Misrefoti-Maiŋ, anjau ze psoof nkuŋ ŋnsi Mispa. Zojir pmair onuu. Bofiŋ baka uzuuz bozi duk ña loŋ. 9 Ka Joswe do ze mnsi NYEEK jakmunk lo; azu ŋnsumpliz boko ŋnzakmi, katur nkaru boko zuroo.
10 Zokil omizun Joswe huglo seh Azor fiŋ nliin dolo na keeje, zonkont Azor hilunk o kmbaau kmpeki pfiiro ze boliin bominzkun uzuuz . 11 Bojek yeeje, fiŋ baña uzuuz bonhoki zolo, ka bozi hutun un oloŋ oknhyefzi; Joswe tur Azor na uroo.
12 Joswe seh imbaau uzuuz isi boliin bominzkun fiŋ boliin yolo uzuuz na keeje. Antom na imbaau iminzyun uzuuz , ze mi Moises ntihun NYEEK, hilunk zuboko ka bo doli. 13 Boisraelita bozi tur imbaau hilunk o duzu onkuŋ boko intik, Joswe tur ze kmbaau Azor. 14 Bowk Israel jek priza uzuuz , na ŋnsaam imbaau iminzyun, antom fiŋ baña uzuuz na yeeje, ka bozi hutun un oloŋ onkai oyefzar na phila. 15 Ze mi NYEEK hilmunk Moises ntihun lo, hunkran Moises saun hil Joswe ka Joswe do khili kminzkun. Azi hutun plemp ŋun uzuuz ŋnsi NYEEK hilunk Moises alemp.
16 Hunkran Joswe sehun osaak ominzun uzuuz : Nkuŋ, na njir uzuuz ŋhoŋi zeu osaak, ŋnsaak uzuuz ŋnsi Goseŋ, zun ze nliiŋnorze, ŋreŋe, nkuŋ ŋnsi Israel na zun ŋolo ze nliiŋnorze. 17 Ptep zonkuŋ Alak onhyai zojir Seir, anjau ze Baal-Gadi, ze psoof nkuŋ ŋnsi Líbanu, ze kwaŋ onkuŋ osi Ermoŋ: Apot sa jek boliin boko uzuuz antom fiŋi. 18 Joswe dol ogut nkil ŋsumŋi na boliin bominzkun uzuuz . 19 Ozi ka kmbaau knzuki phyooŋ na bowk Israel, ze mbaza baña kmbaau boeveu bonhoki ze Jibeoŋ bozuun phyooŋ na bowk Israel, ka imbaau baña bonhyelkunk pzu phyooŋ seho uzuuz zogut. 20 Zonkont NYEEK zu ijuuns boko ka itaambzi, antom boya gut na Israel bo hilun ptoom na boko uzuuz , ka bozi ñago baka, antom Israel fiŋ boko uzuuz ze mi NYEEK hilmunk Moises.
21 Zokil ominzun Joswe toom na boanakiŋ bosi onkuŋ Ebroŋ, Debir, Anabi, nkuŋ uzuuz ŋnsi Juda, na ŋnsi Israel. Joswe toom na baka na imbaau boko uzuuz a. 22 Zokil ominzun Joswe toom na boanakiŋ bosi nkuŋ ka anakiŋ aloŋ azi duklo zosaak bowk Israel; boduklin ze Gaza, Gati, na Asdodi. 23 Hunkran Joswe sehdun ŋnsaak ŋminzŋun ze mi NYEEK hilunk jak Moises; Joswe hul bowk Israel ŋnsaak ŋminzŋun antom bo hij, a haiŋa ze mi iiñ boko omi. Hunkran osaak yooŋdun ogut.