<<    <     Josué     4     >    >> 
Ilaak 12 impunoi ze Krik Jurdoŋ
4
kero baña zip uzuuz ze krik Jurdoŋ, NYEEK jak Joswe: 2 Datun boiinz 12, kana ña ze kiiñ boko; 3 Ujak boko bojek ilaak 12 ze krik Jurdoŋ, zun bopenen Uzi hilunk nazni. Bo yana yolo zun bokfurunzi.
4 Ka Joswe du boiinz bondatoki ze psoof bowk Israel. 5 Ka jak boko: "Nde zipun zurun ukau NYEEK, Uzi nde, ze psoof krik Jurdoŋ, kana ña ze kiiñ lo akjek plaak ploŋ klap ze ksak lo, ze mi bo omi ze iiñ bowk Israel, 6 Yo pho mnjaaŋzin ze psoof nde: Bowk nde, zurun yep nde jaa: Oyezi o mnjaaŋzin ilaak indai? 7 Nde pjak baka, krik Jurdoŋ kai zurun ukau Uzi. Baña zip ze un onkai. Ilaak indai yo pho mnlelnin mnzañi ze bowk Israel.
8 Hunkran bowk Israel dodun ze mi Joswe jakmunk boko, bo jek ilaak 12 ze psoof krik Jurdoŋ, ze mi bowk Israel finomi, ze mi NYEEK ladomunk na Joswe, ka bo sona yolo ya zu zun bokfurunzi. 9 Joswe sa zoñun ilaak 12 uz ze psoof krik Jurdoŋ, zun bopenen Uzi hilunk nazni, bo hilunk kuŋo ukau Uzi usi phuuz. Zoz yonzun anjau hankri.
10 Bopenen Uzi bohilunk kuŋo ukau NYEEK naz ze psoof krik Jurdoŋ, anko kint dolo un NYEEK jakunk Moises ajaŋ Joswe antom azuup bowk Israel. 11 Kero baña zip uzuuz, ukau Uzi na bopenen Uzi bo dukoo zurun baña. 12 Boiinz Ruben na boiinz Gadi na psoof kiiñ ksi Manases bozip zurun bowk Israel boloŋ na igutnin ze mi Moises hilunk jaa. 13 Ze boiinz nkunt 40.000 bonsagnorki phya ogut bo zip zurun NYEEK, zun ze liiŋnorze ze Jeriko, bamno pgutun.
14 Zonu ominzun NYEEK deeŋ Joswe zikil baña Israel uzuuz; ka bo zulo pña ze ŋnu uzuuz ŋnsi phila lo, injaka mnsi bo hilunk zu Moises pña.
15 NYEEK jak Joswe: 16 Jakun bopenen Uzi bonhoki pkuŋo ukau Uzi antom bo pun ze Jurdoŋ.
17 Ka hunkran Joswe hildun bopenen Uzi jak boko: Nde punun ze Jurdoŋ.
18 Bopenen Uzi bonkuŋoki ukau NYEEK, bopunz ze krik pol zosaak onkai ka mnzup Jurdoŋ kak ze mi mhili oo.
19 Ze ŋnu 10 ze pli pseke baña pun ze Jurdoŋ, zoñnor ze Jilgal, zojir pmair onuua. 20 Ze Jilgal Joswe nazun ilaak 12 isi bo punuyunk ze psoof krik Jurdoŋ. 21 Ka jak bowk Israel: "Zurun, zoyaar bowai nde yep boliin boko un ilaak indai naamnzani? 22 Nde pjak baka Israel haño krik Jurdoŋ ze un onkai. 23 Mi NYEEK, Uzi nde kaizanunk krik Jurdoŋ zurun nde anka nde zipi, hunkran NYEEK, Uzi nde hilun kaizan krik kjeenkle anka nja zipi. 24 Udo jaunk antom baña uzuuz ze ŋnsaak bo me kñen NYEEK ka philun antom nde hilun pzu Uzi nde pña."