Kiiñ ksi Rubeŋ ñaun osaak osi Jileadi
32
Bowk Rubeŋ na bowk Gadi bo hil ka ŋiit ŋnsumŋi. Bo iin ja osaak osi Jazer na osi Jileadi, ŋo ŋnsaak ŋnuroŋi antom pkul ŋnsaam. 2 Hunkran bo yadun ze Moises na Eleasar nmpenen Uzi na bohuli bosi zun uzoñnor antom jaa: 3 Ataroti, Diboŋ, Jazer, Ninra, Esboŋ, Eleali, Sebaŋ na Beoŋ, 4 osaak osi NYEEK kai kpe zurun bopugi Israel, o osaak osi pkul ŋnsaam, botihun nu bo ka ŋnsaam. 5 bo pot jaa: ze ndo iin kñago ze kil nu, hulan ndo osaak ominzun antom ndo ka olo. Ika zu ndo antom ndo haño Jordoŋ.6 Moises jak bowk Gadi na bowk Rubeŋ: Ka pzaro nde o phya ogut, antom nde duko zunzi? 7 Oyezi kaa, ka nde ka zu ijuuns bowk Israel pbehro antom bo hutun pzip zosaak NYEEK huli boko? 8 Hunkran boliin nde dodun kero nji hil boko ze Kades-Barneya antom bo bi ten osaak ondai. 9 Bojau zunjir usi Eskol, bo iin osaak. Kero bo kaki bo zu ijuuns bowk Israel ka ibehro antom bo ki kneej zosaak NYEEK huli boko. 10 NYEEK bi deuz zonu ominzun, abisro jaa: 11 Boiinz bondaaki, bombiinkink Ejitu, bonkaaki ŋnlur 20 phya na duzu, bozo piin ossak nji bisroi ja njo phul Abroŋ, Jaaki na Jako, zonkont bozi zalin na ijuuns boko uzuuz. 12 Kaleb, awk Jefone, nkenezeu, na Joswe awk Nuŋ, bohokun piin olo, zonkont bo zañ ze pzal NYEEK na ijuuns boko uzuuz. 13 Hunkran ujuuns NYEEK hidun na oreu ze bowk Israel, azu baka phyanz zolaal ŋlur 40, anka baña bonkaaki ŋnlur ŋminzŋun kiiñ bonhili do khuzin ze kil NYEEK toom pkez uzuuz. 14 Nde uz, ŋnrasa ŋnsi baña bo do pjwa, nde bi ze plul psi boliin nde antom pbundar oreu NYEEK ze bowk Israel! 15 Ze nde yeel pzal lo, apot ophutun bopugi zolaal, ka nde okun pka pkuŋ psi pkez baña bominzki uzuuz.
16 Boiinz bosi Rubeŋ na boiinz bosi Gadi bojau ze yaa bo jaka: Nde jeu plemp kmeh ksi ŋnsaam ndo oi phoon, na imbaau isi bohar ndo na bopoz. 17 Ka ndo psagnor igutnin phya zurun bowk Israel, an ndo kint ndo jau na boko zun boi pzoon; ndo pduk bopoz zimbau inliinshi, zonkont baña bonhoki zosaak. 18 Ndozo pkak ziku ndo an kana ña ze bowk boisrael kint aka zun ai phij. 19 Ndo zo phij na baka zosaak onhoi zojirun krik Jordoŋ nin zurun, zonkont ndo ka phij ndo zojirun krik Jordoŋ, zojir pmair onuu. 20 Moises jak baka: Ze nde do jaunk, sagnor igutnin phya ogut zurun NYEEK, 21 Nde uzuuz bonsagnorki igutnin nde phaño krik Jordoŋ zurun NYEEK, an akint apunun bobir lo zurun lo, 22 aseh osaak, nde pkak antom ol de burun ubisro nde bisrounk zurun NYEEK na urun Boisraelita. Osaaki o pho osi nde zurun NYEEK. 23 Ze nde ampdo pjaunk, nde pjuu ze NYEEK. Nde hilun pme pja pjuu nde pho piin nde. 24 Nde yan lemp bohar nde imbau, na bowk nde; na imeh isi ŋmpalalu nde, nde dolun un nde jaki. 25 Bogadita na borubenita bojak Moises: ndo botihun nu ndo pdo injaka ze mi ujakmi ndo. 26 Bohar ndo, na bopoz ndo, ŋmpalalu ndo na ŋnsaam ndo uzuuz, ŋho pduko zimbau isi Jileadi. 27 Botihun nu o phaño zurun NYEEK, kana ña ksagnor igutnin antom pgutun injaka mi ujakmi.
28 Ka Moises lado na Eleasar na Joswe awk Nun, na boyeek bosi iiñ isi Israel, zonkont boko, 29 a jak baka: Ze bowk Gadi na bowk Rubeŋ año krik ksi Jordoŋ na nde, kana ña sagnor igutnin antom pghutun zurun NYEEK, an nde kint nde seh osaak nde khul boko osaak osi Jileadi antom bo ka. 30 ze bam phaño na nde, psagnor igutnin, bo ka pdigzan pseh phij boko ze psoof nde zosaak osi Kanaan. 31 Bogadita na Borubenita seemb jaa: Botihun nu bo pdo un NYEEK jaki. 32 Ndo psagnor yun igutnin antom pzip zurun NYEEK, phya osaak osi Kanaan, antom ndo hilun pka phij zojirun krik ksi Jordoŋ.
(Oiimna 3-12-17)
phairo osaak zojir krik Jordoŋ
33 Moises hul bogadita, borubenita na psoof kiiñ ksi Manases, awk Joswe, pliin psi Sioŋ nliin nnsi boamoreu, na pliin Syon niliin nnsi boamoreu, na plin psi Og, nliin nnsi Basaŋ, osaak ominzun uzuuz , na imbaau olo na ozee ze kwaŋ yolo. 34 Bogadita lemp Diboŋ, Ataroti, Aroer, 35 Ataroti-Sofan, Jaer, Jogea, 36 Beti-Nira na Beti-Araŋ, antom yo imbaau inliinshi, na imenh isi ŋmpalalu. 37 Borubenita lemp Esboŋ, Eleali, Kiriatain, 38 Nebu, Baal-Meoŋ, Sibma. Bozimlan itiim imbaau iminzyun, antom zu itiim iloŋo. 39 Bowk Makir, bowk Manases boya Jileadi, bo seh Jileadi antom punun boamoreu. 40 Hunkran Moises huldun bomakarita Jileadi bosi kiiñ Manases; bo ya o zolo. 41 Jair awk Manases, aseh ŋntaank lo azu ŋa ktiim Avoti-Jair. 42 Noba seh Kenati na ŋntaank olo; Aduwa Noba ze mi ktiim omi.