Bopugi Uzi ka kpe duzu Bomidyanita
31
Uzi lado na Moises jak lo: 2 Botnan Bomidyanita pko ze un bodoli, antom ol ukezun. 3 Moises jak bopugi: Nde sagna boloŋo igutnin ze nde , bo ya gut na Bomidyanita antom bo ya botun boko pko psi NYEEK. 4 Nde phil bogutun 1000 ze kana kiiñ ze iiñ Boisraelita uzuuz bo ya ogut. 5 Hunkran iiñ Boisraelita huldun boiinz 12.000 ka bo sagnor yun ogut phya ogut, baña 1000 ze kiiña. 6 Moises hil baka ogut, bogutun 1000 kana kiiña, zoklan na Fineyas awk nmpenen Uzi akndwoi Eleasar anhyai na ŋun ŋiimna one ikornet. Antom phul mnjaaŋzin. 7 Bogut na bomidyanita, bo fiŋ boiinz uzuuz ze mi NYEEK jakmunk Moises. 8 Na bonkezkunk zogut, bofiŋ boliin bomidyanita 5 bokndwoki: Evi, Rekeŋ, Zur, Ur na Reba. Bo sa fiŋ Balaoŋ uz, awk Beor na keeje. 9 Ka bowk Israel sol na bojuuk bohaz, bomidyanita na bopoz boko, bo sa sol na ŋiit boko, ŋmpalalu boko, na priza boko uzuuz. 10 Botur imbaau boko uzuuz isi bozooni, na zun boko uzuuz ze si uzoñnor. 11 Bojek ŋun bo kaŋunk kpe zogut uzuuz, baña na ŋnsaam. 12 Boya na bojuuk, ŋnsaam ŋun uzuuz ya hul Moises na Eleasar zun boko ze si uzoñnor ze ksaal knliiŋnorki ze Moabi, ze kwaŋ krik Jordoŋ pjan na Jeriko.Mi baña kami pbaap bojuuk
13 Moises, na Eleasar nmpenen Uzi na bohuli bosi zun uzoñnor bo pun phya pjik na boko zojirun unaam uzoñnor. 14 Moises deuzar boyeek bogutun, na boyeek bogutun 1000 na boyeek bogutun 100, bo hilunk biin ogut. 15 Moises yep baka: "Nde hutun bohaz uzuuz na phila? 16 Boko boseh ozaŋu osi Balaoŋ, bo zu bowk Israel ka bo juu NYEEK zonkont Peor, ze mi khuzin omunk ze psoof uzoñnor usi NYEEK. 17 Ze krankaki nde pfiŋ bopoz bozala uzuuz, nde sa fiŋ bohaz bonhoki o piinz na boiinz. 18 Ka bompili bani po piinz na ñiinz, nde hilun phutun baka na phila antom bo o bosi nde.
Pjinjiinzun bogutun na bojuuk
19 Nde uzuuz nde nfiŋi ña o nde bondaproki kligs, nde puno zun ze si uzoñnor ŋnu 7. Zonu oajzan na onu ojaandun nde pjinjiinzun ŋnleef nde, na ŋnsi baña nde bupki pjuuk zogut. 20 Nde ka pjinjiinzun yun itiimo uz, na ŋun uzuuz ŋnlempoŋi na kjand, na oyel opi o un olempoi na mndera. 21 Nmpenen Uzi akndwoi Eleazar jak boiinz bombiinki ogut: Uni oko ilul isi ŋiimna ŋnsi NYEEK huli Moises. 22 Mhuru, praata, kobre, feru, stañu, ŋnsumbu, 23 na ŋun uzuuz ŋhiluŋi pmindo uroo, nka pzip zuroo antom ŋnduko ŋnjiinz, nka pjinjiinzno. Ŋani philun pmindo uroo, nde zipzipna ŋa ze mnzup. 24 Zonu ojaandun nde kñou yun nde itiimo, antom nde hilun pjiinz. Antom ol nde neejun zunaam uzoñnor.
Phairo ŋun ŋmbupoŋi zogut
25 NYEEK pot lado na Moises jak lo: 26 Wi, na nmpenen Uzi akndwoi Eleasar na boyeek bowk boliin bosi knzoŋ, nde finun baña uzuuz na ŋnsaam ŋmbupoŋi zogut. 27 Nde hairon ŋun nde bupŋi zogut ze psoof, ŋloŋo ŋhul bogutun bonhyaki ogut, ŋnloŋo sa hul baña bosi uzoñnor uzuuz. 28 Ziñen bogutn bonhyaki ogut nde pseh baka, uluk weene usi NYEEK, ampalalu 1 ze ŋmpalalu 500, ŋanun otoko baña o ŋiit, ŋhuru o ŋmpalalu. 29 Nde pseh a ze psoof olo osi boi phulo, nde hul na Eleazar, nmpenen Uzi, injaka un onhaloi ompei pfiro osi NYEEK. 30 Zojir onhoi phya ze bowk Israel, nde pjek 1 ze kana 50, ŋunu o baña, ŋiit, ŋhuru, ŋmpalalu o ŋnsaam ŋloŋo. Nde phul bolevita ŋa bokmbaapki oku NYEEK. 31 Moises na Eleasar nmpenen Uzi bo do ze mi NYEEK hilmi Moises antom ado.
32 Ŋmpalalu ŋmbupoŋi zogut, ka ŋndukloŋi kero bogutun o jek ŋnloŋo, ŋhil o ŋmpalalu 675.000. 33 Ŋit 72.000. 34 Ŋhuru 61.000. 35 Na bompili 32.000 bani po me ñiinz. 36 Psoof ŋmpalalu ŋmpunoŋi hul bogutun bonhili ya ogut, ŋhil o 337.500. 37 Uluk usi NYEEK unlukobi ze ŋmpalalu ŋminzŋun ŋhil o 675. 38 Ŋiit hil o 36.000; 72 puno injaka uluk usi NYEEK. 39 Ŋhuru hil o 30.500; 61 puno injaka uluk usi NYEEK. 40 Baña hil o 16.000; 32 puno injaka uluk usi NYEEK. 41 Moises hul Eleasar nmpenen Uzi uluk weene uminzun injaka un onhaloi ompei pfiro osi NYEEK, ze mi NYEEK jakmi lo ado. 42 Psoof ŋnsaam pnhulpi bowk Israel, ŋnsi Moises diituŋi ze ŋnsi bogutun, 43 ŋhil o ŋmpalalu 337.500, 44 ŋiit 36.000. 45 ŋhuru 30.500, 46 na baña 16.000. 47 Ze Psoof bowk Israel Moises jek un 1 ze kana 50, ze baña, na ŋnsaam injaka ze mi NYEEK jakmi lo a do, ahul bolevita ŋa bokmbaapki oku NYEEK.
Ŋun boyeek bogutun haalŋi na ijuuns boko
48 Boyeek bogutun bonhili o duzu inzoŋ bogutun isi bogutun 1000 na inzoŋ bogutun 100 bo ya ze Moises, 49 bo jaka: Botihun nu fin bogutun bonhili o zeu ndo: Ka ña loŋ azi aŋo. 50 Ndo bina un onhaloi osi NYEEK, kana ña kbina un akai : ŋun ŋnsi mhuru, insawaŋ iñigi iñene, insawaŋ, imiun, ŋrejel, na ikorent isi kzuuz, antom psoond ŋolo zurun NYEEK zonkont pluk phila ndo. 51 Hunkran Moises na Eleazar nmpenen Uzi sehdun ze iñen boko mhuru, ŋun ŋminzŋun uzuuz ŋhil o utihun usi ña anhili utihun uminzun na mnjona. 52 Mhuru uzuuz mnsi un onhaloi osi boyeek bogutun bosi 1000 na boyeek bogutun bosi 100 biini hul NYEEK ŋil o nkilu 201. 53 Kana ña ze bogutun hil jek ŋun bosehŋi zogut antom kaa. 54 Hunkra Moises na Eleasar nmpenen Uzi sehdun mhuru minzmun ze iñen isi boyeek bogutun 1000 na boyeek bogutun 100 , bohya na ma zoku osi uzoñnor injaka mnlelnin, antom NYEEK hilun plel boisraelita.