Zonkont un ña jaki a pdo
Oiimna 23:21-23
30
Moises lado na boyeek iiñ bowk Israel, a jak baka: Uni o un NYEEK jaki o dolo. 2 Ze ñiinz jaa, a pdo NYEEK unu, o atan been lo zeu ubisro, azi hilun pkit olado lo, aladoi na mntuum lo, a ka pdol a uzuuz. 3 Ze nmpili anhoi ze mez aliin ze ksuke lo, dol ubisro ze NYEEK, o atan been lo na ubisro, 4 ze aliin te ubisro uminzun, azi jaka un oloŋo ubisro uminzun ka pdolo. 5 Ka aliin sa neen lo ubisro zonu ateunk lo ubisro, ubisro uzuuz usi atani been lo bozo pho un oloŋo. NYEEK o pjour a, zonkont aliin.6 Ze ñaaz dol ubisro o atan been lo na olado aladoi ampzaaf na mnjona, antom bi maroo, 7 ze ahina te lo, antom jou zonu ominzun, ubisro lo na olado osi atani been lo opnaz, aka pdo un abisrounk. 8 Ze ahina neen ubisro zonu ateunk lo, antom yeel ubisro o olado osi atani been lo, NYEEK o pjour ñaaz aminzun. 9 Ze ahina kezi, o ñaaz toom unima na ahina, dol ubisro, olado uzuuz osi atani been lo oka pdolo.
10 Ze ñaaz animoi ja apdol Uzi unu, ze abisro ja apdola, o azo pdola, 11 ze ahina te lo, antom jowi, azi neena, irim uzuuz isi a huli na ubisro lo usi atani been lo, o pho duzu lo. 12 Ze ahina neen lo, zonu ateunk lo, olado uzuuz osi aladoi na mntuum lo, na ubisro usi atanunk been lo, ozo pho. NYEEK opjour a zonkont ahina neena ubisro. 13 Ubisro uzuuz usi ñaaz dobi, antom pzu oyek lo joozun, ahina hilun pdigzan o phyeel. 14 Ze ahina ampjak lo un oloŋo, onu zo sinz olo, apdo ŋun abisrounk uzuuz, zonkont ahina me ubisro ahar antom jowi. 15 Ze ahina yooŋ ŋnu ka ŋnzipi, ka bi neen lo pdo un ajaki, apka pjwa zonkont a ahar jubunk. 16 Uni oko ilul isi NYEEK huli Moises zonkont ñaaz, zonkont aliin ña na awk nmpili a umi o ze mez aliin.