Bowk Zelofeadi bompili
27
Makla, Noa, Ogla, Milka na Tirza bo hil o bowk Zelofeadi bompili, bowk Efer, awk Jileadi, awk Maker, awk Manses, awk Jose. 2 Boya naz zurun Moises na Eleasar nmpenen Uzi, zurun bohuli na bopugi uzuuz, bosi bowk Israel ze plumun oku uzoñnor bo jaa: 3 Aliin ndo kez zolaal. Azi hil o ze psoof baña bosi Kore; akez ze pjwa lo azi duk nmpoz ñiinz. 4 Ka ktiim aliin ndo o puno pjaan ze psoof bowk boliin ze mi ani pka nmpoz ñiinz? Hulan ndo osaak ze psoof pzaro boliin ndo.5 Moises ya na oŋou woko zurun NYEEK. 6 NYEEK jak Moises: 7 Bowk Zelofeadi lado un onjaali, zowadadi, uka phul baka osaak bohij ze psoof pzaro boliin boko antom uhul boko phij psi aliin boko. 8 Wo plado na bowk Israel, ujak boko, ze ña kezi, ampbuk nmpoz ñiinz, phij ka phul awk lo ñaaz. 9 Ze ampbuk awk nmpili, phij lo khul boza. 10 Ze aliin ampka boza uz phij khul boza aliin. 11 Ze aliin ampka boza, phij lo akhul ña aloŋo ampei pñog ze bowk boliin antom a hilun pka phij pminzpun. Moises, uni o pho oiimna ondiizi osi bowk Israel ze mi nji huli wi.
Uzi jak Moises apkez
Oiimna 3:23-28
12 Antom ka NYEEK jak Moises. Payon onkuŋ osi Abariŋ, uten osaak nji huli bowk Israel. 13 Zotoomru phin osaak wo pkez injaka ze mi amaku Aroŋ kezmunk; 14 Zonkont nde 2, nde yeel pte un nji jaki nde zolaal osi jiŋ. Kero bopugi uzuuz hunsun ze Mariba, ndezi jeu phikran zurun boko philun ni pnjiinzpi, Meriba oko plik pnhopi ze kades zolaal osi jiŋ.
15 Ka Moises lado na NYEEK jaa: 16 Nji jeu antom NYEEK, Uzi unkai ŋyek uzuuz, unjai ka zu phila ze baña uzuuz, antom uzu ñiinz anhoi pho duzu bopugi bondaaki, 17 Anhoi pzoŋ boko zogut, antom baña lo ikho injaka ŋmpalalu ŋani pka nyafna.
Uzi dat Joswe zu ze kfah Moises
18 NYEEK jak Moises: Jekun Joswe awk Nuŋ ankai oyek Uzi uzu iñen duzu lo; 19 usoond lo zurun Eleazar, nmpenen Uzi, na uzoñnor boisraelita uzuuz; antom ujaaŋ lo ŋun akaŋi pdo. 20 Zuun philun nu duzu lo, antom uzoñnor boisraelita te ŋun bo kaŋi pdo. 21 Aka phya psoondo zurun Eleasar nmpenen Uzi, anhoi phyeenk lo na oyeenknin okndwoi uriŋ, zurun NYEEK; anka jak baka bo pun, bokpun; anka jak baka boneej, bokneej. 22 Moises do ze mi NYEEK jak mi lo a do. Ajek Joswe yana lo zurun Eleasar nmpenen Uzi, na uzoñnor uzuuz usi bowk Israel; 23 azu iñen lo 2 duzu Joswe, a jaka a do ze mi NYEEK jakmunk lo a do .