Boisraelita kulum Moises
11
Bopugi hil ze kulum, ka NYEEK te boko, ka oreu NYEEK nazoo; ka NYEEK hutun uroo ka uhi ze psoof boko, tur ojir oloŋ osi unaam zun uzoñnor, zojir kfez. 2 Bopugi kiikr Moises; ka Moises buudar NYEEK; ka uroo mitoo. 3 Ka zun ze minzun dwo Tabera, zonkont uroo NYEEK hi ze psoof boko.4 Boya, bosi osaak oloŋ bonhili o ze psoof boko bopun uyaas na boisraelita bonhili yejzar ŋun ŋnde ŋnsi baña Ejitu. Hunkran bowk Israel potun huri antom yeproo: "Noon ophul nja oyemz nja de? 5 Ndo lel ŋrik ndo hili a ka de ze Ejitu ze pjeah, one ndozi ganz ŋa; na mpipinu, meloŋ, mnsawol, mhaju na mhaju mnloŋ mikndwomi mhaju mhai. 6 Ze krankanki ndozi yutzar pde un oloŋ; ze mbaza manaan mndaami mnkonamolo mnsumun ndo kil!" 7 Manan oko injaka buk ontuña pnaampi na un okndwoi bdelyu. 8 Bopugi hil aktaaslor ksinz molo antom kloŋ molo, kjuŋ na ifuutu; antom kleempn obulu; kliili molo oko injaka obulu onagohi na mnsitidos. 9 Zoyetro opool zurim duzu unaam uzoñnor, manaan sa akyeto uz.
Moises iin ja utihun lo diizi
10 Moises te bopugi ka hur, kana ña khur ze phwkpliin boko zoneeji oku uzoñnor lo. NYEEK deuz maakrin. Ka Moises iin ja un ominzun ozi o na mnjona. 11 Moises jak NYEEK: "Ezi kaa, ka udo ntihun nu Khuzin kndaaki? Ezi kaa, ka mbazi iin kñago zurun nu, ze mi ukuŋnink nji bopugi bondaaki uzuuz? 12 Ka nji bukun bañauki uzuuz? Nji bukun boko, onkanun ka ujakin nkuuz boko injaka mi ñaaz kuuzmunk nmpoz akmboti, nhyana boko zosaak ubisroi boliin boko ja wo phul baka? 13 Zoon njou pun na oyemz phul bopogi bondaaki uzuuz? Bo a khudarin kjakin, hulan ndo oyemz ndo de! 14 Nji nkoni mbazi hilun phya na bañauki uzuuz, zonkont bodiiz ze nji. 15 Ze hunkran woun pdolin, fiŋan zuyaas uloŋ, nji ñaun nu ze nji iin kñago ze kil nu; ka ika hutnin iin khuzin nin.
Boyeek 70 dato pziinkun Moises
16 NYEEK jak Moises: "Datun boiinz 70 ze psoof boyeek boisraelita, bosi umeki ja bo o boyeek bozoŋ bopugi; ubi na boko zurun oku uzoñnor; antom bonaz zurun nu. 17 Nji njo phyeto plado na nde; njo punun oyeke, onhoi duzu nu pzu ze boko. Bo pziinknu pjek pkuŋ bopugi, antom uzo pkuŋo pa nkona nu. 18 "Jakun bopugi: Nde jinjiinzna ŋnleef nde, nde bamni zonkont faan; nde pde oyemz, zonkont NYEEK te nde ze mi nde hurmunk, yepro noonzi ophul nde oyemz antom nde de, nde ja nde pe pho na mnjona ze Ejitu. Hunkran NYEEK oun phul nde oyemz; antom nde doh olo. 19 Ndezo pdoh a zonu 1, nin ŋnu 2, o ŋnu 5 ŋnu 10 o ŋnu 20, 20 ze pli uzuuz an okint opun nde ze ihil, antom nde doh olo an nde kint nde nor olo, zonkont nde bir NYEEK anhoi ze psoof nde, nde hur zurun lo, nde yepro ezi kaa, ka ndo pun ze Ejitu? 21 Moises jaa: "Njii ze psoof boiinz nkunt 600.000 bonazki, wi ka uja wo phul baka oyemz, bo pdoh a ze pli uzindan! 22 Ze ŋmpalalu na ŋiit, fiŋo phul boko, ŋo pziink baka? Ze ŋrik ze irik bupo uzuuz phul boko, ŋho pziink baka? 23 NYEEK jak Moises: Ka philun kñen nin ka kjaawi? Ze krankanki wo phin zolado nin men un nji jaki ozo pdolo."
24 Moises pun zoku antom zuup bopugi un NYEEK jaki lo. Moises koulan boyeek 70 bosi bopugi, azu baka ka bonaz foyo oku. 25 NYEEK yeto ze knzun lado na Moises. Apunun oyek onhili o ze lo, antom zu ze boiinz 70 boyeek bondaakun. Kero oyek yeto ze boko, bolado zeu philun Uzi, kero bo toom pzuup olado ominzun bozi pot pootlan pzuupa . 26 Ka boiinz 2 bonhoki na boyeek 70 bondaakun bozi hil ya zoku. ktiim aloŋ dwo Eldadi. Ktiim andaun dwo Medadi. Oyek Uzi yeto ze baka; Bo zuup olado Uzi zun uzoñnor. 27 Nmpoz nzala aloŋ zii, ya ze Moises, jak lo: Eldadi na Medadi bo ze lado na philun Uzi zun uzoñnor." 28 Joswe awk Nuŋ, ntihunar Moises kero ka um o nmpoz nzala, a jaa: "Nyeek nin Moises, neenan baka pdo pjaunk." 29 Moises yep lo: Uka ktaaji nin? O hil pe pho na mnjona NYEEK zu oyek lo duzu baña uzuuz, antom bo o bhurun Uzi." 30 Antom ka Moises na boyeek Israel bokak zun uzoñnor.
NYEEK hul baka oyemz
31 Oyook NYEEK fuuzi, bina ŋnjiku ze krik taaslan ŋolo zun uzoñnor ŋnlaaŋu ŋnsumŋi ze ŋnjir uzuuz, nkaŋi olaaŋu 1 ze pkaañ. 32 Zonu ominzun uzuuz, na urim uzuuz, na onu 1, ptep ze nfa ampjau ze montna, baña bup ze psinz ŋnjiku. Ozi ka ña ansinzi ŋhus zaanklan 60. 33 Kero oyemz ozo toom ze mntuum boko, ka bozo toom pñaam a, oreu NYEEK ih duzu bopugi, anornorun baka na pmaak pnhuzpi maakrin. 34 Hunkran ktiim zun ze minzun dwodun Kibroti-Ataava, zonkont bomoi baña bonlinkrki ŋun ŋnde ŋnliilŋi ŋnsi bojitu zun ze minzun. 35 Ze Kibroti-Ataava bopugi pun za sol ya ze Azeroti antom zoñnor zolo.