Ikornet 2 isi praata
10
Nyeek pot jak Moises: 2 Lempun ikornet 2 isi praata inhyalani inhoi pduka du baña bozoñnor, o pdu baña pzuup boko boka psol. 3 Zoluulr boko ikornet 2 baña uzuuz opzoñnor zurun nu zoneeji oku uzoñnor. 4 Zoluulr kornet uyaas 1, bohuli na boyeek inzoŋ isi nkunt ze Israel bo pkoulor zurun nu. 5 Ze nde luul yolo un onjoni, baña bonzoñnorki ze pmair onu bo pnazo psol. 6 Ze nde luul yolo uyaas upugzan un onjoni, Baña bonzoñnorki zojir zeu ossak; bo pduka zañ ze pluul kornet ze mi baña ksolmunk. 7 Ze nde pzooñun baña, nde zo pjon ze pluul ya. 8 Bowk Aroŋ, bonhoki bopenen Uzi, boukun pluul itin; ze nde boloŋ, ominzi o pho oiimna osi nde ze iiñ nde onzañi. 9 Ze bobir nde jet nde ogut zosaak nde, ka nde pun phya pgut na boko, nde pluul ikornet un onjoni; hunkran NYEEK, Uzi nde oun plel nde, a pburburun nde ze bobir nde. 10 Zoneejo ominzun, zonu nde osi mnliina, na ŋnah nde, na ŋntepi ili yhalu, nde pluul itin duzu ŋun nde ŋhaloŋi ŋnsi ŋhojun unturowi na ŋnsi ŋun ŋhaloŋi ŋnsi phyoŋ, Ŋo pho mnlenin zurun Uzi, nde. Nji njoun NYEEK, Uzi nde.Boisraelita pun ze Sinai
11 Zolur opugzan, ze ŋnu 20 ze pli pugzan, ol knzun knhoki duzu oku uzoñnor zun itaagwa isi phuuz kbaanzi nazodun . 12 Bowk Israel pun zolaal Sinai, bo sol phya olaal osi Paraŋ zun knzun nazunzi. 13 Hunkran bo soldun zuyaas useke ze book uminzun ze mi NYEEK jakmi Moises. 14 Bogutun bonhoki zunaam uzoñnor usi Juda ya zurun na owandel boko. Nyeek boko akndwoi Naasoŋ awk Aminadabi a hil o za. 15 Nyeek bogutun bosi kiiñ Isakar Natanael awk Swar; 16 Elyabi, awk Heloŋ, a o nyeek bogutun bosi kiiñ Zebuloŋ.
17 Bogar oku, ka bowk Gersoŋ na bowk Merari jek oku soni. 18 Antom ka bogutun bosi unaam uzoñnor usi Rubeŋ boya na owandel boko. nyeek boko dwo Elisur, awk Sedeur. 19 Nyeek bogutun bosi kiiñ Symeoŋ dwo Selumyel, awk Surisadai. 20 Nyeek bogutun bosi kiiñ Gadi dwo Elyasafi, awk Dewel. 21 Antom ka bokoatita jek ŋun ŋiimna, antom soni. Kero bozo jawi bo ika pkero oku, o hankoo.
22 Antom ka bogutun bosi unaam uzoñnor usi bowk Efraiŋ, bosol na owandel boko. Nyeek boko dwo Elisama, awk Amiudi. 23 Nyeek bogutun bosi kiiñ Manases dwo Gamalyel, awk Pedasur. 24 Nyeek bogutun bosi kiiñ bowk Benjamiŋ dwo Abidaŋ, awk Jideoni. 25 Zotoomi, bogutun bosi unaam uzoñnor usi Daŋ boya na owandel boko injaka nyeŋ kfez. Nyeek boko dwo Ayeser, awk Amisadai. 26 Nyeek bogutun bosi kiiñ bowk Aser dwo Pagyel, awk Okraŋ. 27 Nyeek bogutun bosi kiiñ bowk Naftali dwo Aira, awk Enaŋ. 28 Uni oko un bogutun bowk Israel zwoi plemp kero boka pun ze Ejitu.
Moises ñaun Obabi antom aya na boko
29 Moises lado na Obabi ayootun lo, awk Rewel, nmidyanita: "Nja o zuyaas phya zun NYEEK jakdunk aphul nja za. Bina ndo, ndo pdolu na mnjona, zonkont NYEEK jaa, aphul Israel un onuroi." 30 Ka Obabi jak lo: "Mbazo phya; njo pkak osaak nin na bowkoliin ni." 31 Ka Moises jak lo: "Ñagonan, ika hutun ndo, zonkont ume zun ndoi phya phon zolaal. Antom wo ikil ndo. 32 Ze uya na ndo, mnjona uzuuz mnsi NYEEK huli ndo, ndo phairo ma na wi."
33 Hunkran bo pundun zonkuŋ NYEEK, bo yaanz ŋnu 3. Ze ŋnu ŋminzŋun uzuuz ukau phuuz NYEEK hil o zurun boko pjaaŋ boko zun boi phyooŋ na. 34 Knzun NYEEK hil a kho duzu baka ze pnak zopunr boko zunaam uzoñnor. 35 Zukau phuuz opun, Moises akja: "NYEEK, nazoon utaaslan bobir nu, uzu bondeuzarki wi bozi zurun nu. 36 Zukau Uzi baani, Moises akja: "NYEEK, kakun uñog ze baña nkunt ŋnsumŋi ze Israel.