Nkandel 7 ŋnsi zun ze iimna
8
NYEEK jak Moises: 2 Alado na Aroŋ ajak lo: "Zoyaar lo phya psehun nkandel nka pzwo zun ŋoi pseh pfiiz zurun." 3 Antom ka Aroŋ do jaunk; sehun nkandel antom knfasi o zurun nkandel ze mi NYEEK jakmunk Moises. 4 Nkandel hil lempo na mhuru myalami, ptep ze izim ampjau duzu; ŋnlempo ze mi NYEEK jaaŋmunk Moises./Phimnan bolevita
5 NYEEK pot lado na Moises jak lo: 6 "Jekun bolevita ze psoof bowk Israel antom ujinjiinzun boko. 7 ze minzmi: ze pjinjiinzun boko; gurun baka mnzup mnsi pjour pjwa; ptih ŋnleef boko na ombañ, boka pñou yun boko itiimo antom bojinjiinzno; 8 Antom bo jek owai okal,na un onhaloi osi ifor indeŋlhi inagohi na mnsitidos; usa poto pjek owai okal zonkont un onhaloi osi pjour pjwa. 9 Ñognan bolevita zurun oku uzoñnor, uzoñun bopugi Israel uzuuz. 10 Wankan yana bolevita zurun NYEEK; bowk Israel opzu iñen duzu baka. 11 Aroŋ opsoond bolevita injaka un onhaloi onhindoi zurun NYEEK, zojir bowk Israel; bo phimnano antom pdo utihun NYEEK. 12 "Bolevita opzu iñen duzu yeen ŋwai; wo pdo wojun na oloŋ injaka un onhaloi osi pjour pjwa, ondaun o pho un onhaloi osi wojun unturowi usi NYEEK antom pjour pjwa bolevita. 13 Wo pzu bolevita pnaz zurun Aroŋ na bowk, wo psoond baka injaka un onhaloi phul NYEEK.
14 Hunkran woun pdiitun bolevita ze psoof bowk Israel, bolevita o pho Bosinin. 15 "Zozipr ŋun ŋminzŋi bolevita o pneej antom pdo utihun zoku uzoñnor; ka wi uka pjinjiinzun baka injaka un onhaloi onhindoi, wo psoond baka, 16 Boukun puno ze psoof bowk Israel bo o bosinin; njo pjek baka bo o bosinin ze kfah bopoz boseke boiinz bosi bowk Israel bosi boniin boko buki. 17 Bowk Israel boseke uzuuz, boiinz o ŋnsaam, bo o bosinin. Nji diitun baka bo o bosinin ze ptep zonu nji fiŋunk bopoz boseke zosaak Ejitu, 18 nji jek bolevita zonkont bopoz boseke ze psoof bowk Israel. 19 Ze psoof boisraelita Nji jek bolevita, hul Aroŋ boko na bowk, botihunar bowk Israel zoku uzoñnor, bodo wojun usi pjour pjwa boko, oki kbi ka khuzin ze psoof bopugi Israel, antom bo ñog zun ze iimna".
20 Hunkran Moises, Aroŋ na uzoñnor Israel uzuuz iimnanun bolevita ze mi NYEEK jakmunk Moises, hunkran bowk israel dodun. 21 Bolevita do mhagzin mnsi pjinjiinzno, bo pñou yun boko itiimo; Aroŋ o psoond baka injaka un onhaloi onhindoi zurun NYEEK, a do baka wojun usi pjour pjwa antom pjinjiinzun boko 22 Zozipr ŋun ŋminzŋi, bolevita opneej pdo utihun zoku uzoñnor zurun Aroŋ na bowk; ze mi NYEEK jakmunk Moises zonkont bolevita, hunkran adolun boko. 23 NYEEK pot jak Moises 24 Bolevita ka ptep utihun zoku uzoñnor na ŋnlur 25 phya na duzu, 25 Boka phutun utihun zokaar boko ŋnlur 50. 26 Bo hilun phya pziinkun boza boko zutihun bonkaaki pdo wojun zoku uzoñnor, boko urina boko bozo pka onkont na utihun. Hunkran woun pbedr bolevita utihiun."