Oiimna ŋnsaam ŋnjinzŋi na ŋnzopŋi
Oiimna 14:3-20
11
NYEEK jak Moises na Aroŋ 2 Nde jakun bowk Israel: "Ze ŋnsaam ŋhoŋi zosaak uzuuz, ŋndaŋi ndeun pde: 3 nde hilun pde ŋnsaam nkaŋi iñiri intawohi ze psoof, ŋi kngulujŋi uz. 4 Nka ŋnloŋ ŋi kngulujŋi, o nkaŋi iñiri intawohi; nde zo pde ŋa. Onsuntukulun o ze guluj ka ozi ka iñiri intawohi, ozo pjiinz nde de olo. 5 Omaalu okal o akguluj ka ozi ka iñiri intawohi; ozo pjiinz nde de olo. 6 Omaalu ohaz onjai ka guluj ka ozi ka iñiri intawohi; ozi jiinzi antom nde de olo. 7 Onkumbe ozo pjiinz antom nde de olo zonkont oka iñiri intawohi ankint taslori, ka ozi ze guluj; 8 nde zo pde oyemz olo ka nde zo pdapro kliks olo; ozi jiinz nde de olo.9 Ŋhoŋi ze mnzup mnsi krik o olagwa nkaŋi ilami na ipeptar, ŋoŋ ndeun pde, 10 Ka ŋanunk pka ilami na ipeptar ze psoof ŋun ŋhoŋi ze krik, ŋrik ŋminzŋun uzuuz, ŋnzijran nde de ŋolo. 11 Ze mi ŋnzijramunk ze nde, ndezo pde oyemz ŋolo, nde pzijro iliks ŋolo. 12 Ŋun uzuuz ŋhoŋi ze krik ampka ilami na ipeptar ŋho pzijran ze nde.
13 "Nde pzijro nkas ŋndaŋi; ndezo pde ŋa zonkont ŋnzijrani: Oplukaku, onsilu, opupra na oplukaku osi krik. 14 onjukren na oreke ze ptuut ŋolo uzuuz, 15 na ŋwansa ze ptuut ŋolo, 16 olau, opupra, na okas oloŋ okndwoi kuku, na ngayvon uz ze ptuut ŋol uzuuz, 17 opupra, na oloŋ okndwohi bufu na owans osi krik, 18 okas okndwohi gralia, na oliin ŋnjukren, ompoof, 19 onkunden, na ŋhilŋi uzuuz ze ptuut ŋolo, na okas okndwohi popa na onsandwa.
20 Na nkus uzuuz ŋi khizŋi, ŋi khyanzŋi, nde pzu ŋa injaka ŋun ŋnzijraŋi. 21 Ka nkus uzuuz ŋi khizŋi, ŋi khyanzŋi, ka izima ifez impei pkaañ, uhilun pde ŋa. 22 Ŋndaaŋi nde hiluŋun pde: ojarma, ogula ze phyai ŋolo uzuuz, na ŋnloŋ ŋikndwoŋi solyan, na ŋnsilins na oloŋ okndwoi agab. 23 Ka nkus ŋntiik ŋi khizŋi, na ŋi khyanzŋi na izim ŋolo ŋho pzijran ze nde.
24 Ŋhilun pzu nde, nde zop. Ña andaproi kliks kloŋ ze ŋolo, apzop ampjau ze montna. 25 Ña ambupi kliks ŋolo apñou yun lo, apzop ampjau ze montna. 26 Ŋnsaam uzuuz ŋntawoŋi iñiri, ka yozi taaslor ze ŋnjir 2, na ŋi kngulujŋi ŋozo pjinz ze nde. Ña andaproi ŋolo a pduko na kzopi. 27 ŋnsaam uzuuz ŋi khyanzŋi na kzim 4 iñiri yozi tawo ŋozo pjinz ze nde; ña andaproi kliks kloŋ ze ŋolo a pzop ampjau ze montna. 28 Ña andaproi kliks kloŋ ze ŋolo apñou yun lo, apzop ampjau ze montna. Ŋnsaam ŋminzŋun ŋozo pjiinz ze nde.
29 Ngoŋar uzuuz ŋi kmpuloŋi zozee, ŋozo pjinz ze nde: OKIKRIK, ŋhyaz, na ŋnfonz ze ptuut ŋolo uzuuz. 30 Otakan, olulan, knsali, otakan osi ozee, oteeke, lesma na oñenke. 31 ŋminzŋi ze psoof ŋun ŋikmpuloŋi zozee ŋozo pjiinz ze nde. Ña andaproi ŋolo kero ŋozo kezi apzop ampjau ze montna. 32 Zoloŋ ze ŋolo kezi, bi jet duzu unu, un ominzun opzop, ŋanun ot oko mndera, kfasen, knjand o olaaku, o kzij ktihunina; ko pzwo ze mnzup, ko pzop ampjau ze montna, antom ba pjinz. 33 Zoloŋ ze ŋolo jet ze kmbalu oful, ŋun uzuuz ŋhoŋi ze mezu kmbalu ŋho pduko na kzopi; antom ol nde fomun kmbalu. 34 Ka mnzup kmbalu kminzkun haso duzu olo opzop. Praan uzuuz phopi ze kmbalu kminzkun po pzop. 35 Ze un oloŋ osi oleef ominzi jet duzu olo opzop. Onfurnu o fuutu oful po ptawo. Pozi jiinzi; hunkran popun pzwo injaka pzopi. 36 Okuplar plik o zun mnzup kbaanzi ozo pjiinz, ña andaproi kliks apzop. 37 Ze kliks jet duzu osep oi plaal, osep ominzun opjiinz. 38 Ka zosepe o zwo ze mnzup, ze kliks kloŋ jet duzu olo, nde pzwa injaka onzopi.
39 Zonsaam okndeohi kezi, ze ña dapro kliks olo apzop ampjau ze montna. 40 Ña andei kliks kminzkun apñou yun lo, apzop ampjau ze montna. Ña anhyai na kliks asa opñou yunu, apzop ampjau ze montna.
41 Nkus uzuuz ŋhoŋi zozee ŋnzijrani; ŋozo pdeo. 42 Nkus ŋi khyanzŋi zozee, ŋanu ŋmpuloŋi na pu, o ŋi khyanzŋi na kzim 4, ndezo pde ŋa, zonkont ŋnzijrani. 43 Nde ika huglo kzopi o zijrani zonkont nkus ŋndaŋi. 44 Nji njoun NYEEK, Uzi nde. Hunkran ndeun psoond ŋnleef nde antom ŋhiimun. Nde ika huglo zijran zonkont nkus ŋi kmpuloŋi zozee. 45 Nji njoun NYEEK ambili na nde ze Ejitu antom njo Uzi nde. Hunkran, nde zañun ze pjiinz zonkont nji jiinzi.