Wojun 10

Nadabe na Abiu kez Zurun NYEEK

Nadabe na Abiu, bowk Aroŋ, bojek kana ña yun ituri nsensu , zu uroo ze yolo, zu nsensu duzu yolo, boya zurun NYEEK na uroo bani pho zoiimna, un NYEEK ani pjak boko bo do. 2 Uroo pun zurun NYEEK, tur boko; hunkran bo kezdun zurun NYEEK. 3 Moises jak Aroŋ: Uni o un NYEEK jaki: Baña bonhoki pñog ze kwaŋi boka pmolo nin injaka Uzi unjinzwi. Njo phulo ulujl zurun baña uzuuz. Aroŋ jowi.

4 Moises du Misael na Elisafa, bowk Uziel, Aza aliin Aroŋ, jak boko: Nde ñogun nde punun bowkoliin nde ze kwaŋ zun ze iimna, zunaam. 5 Hunkran bododun injaka mi Moises jakmunk boko, boñogi punun boko zunaam, botiimo imbis boko inkañhi. 6 Moises jak Aroŋ na Bowk, Eleazar na Itamar: "Nde ika hutun pgat oyel, ka nde ika pas yun nde itiimo, antom nde ki kez, nde ika zu oreu oyeek bi duzu bopugi uzuuz. Bo mak nde, bopugi Israel uzuuz, bohilun phudar bosi NYEEK fiŋunk na uroo. 7 Ndezi ka pun zoneeji oku zun uzoñnor, antom nde ki kez, zonkont nde kiro na mnsitidos miimna mnsi NYEEK." Bo do ze mi Moises jakmunk boko.

Un bopenen Uzi kai pdolo na ifah boko

8 Antom ka NYEEK jak Aroŋ: 9 Wi na bowku ndezo pdaan pkem pnhikpi zoneejr nde zoku uzoñnor, antom nde ki kez. Uni oun oiimna oi pduko onzañi ze iiñ nde oloŋ. 10 Nde ka phikran onhimni na onhani piimun, onjiinzi na onhani pjiinz. 11 Nde ka pjukjukun bowk Israel ŋiimna NYEEK huli Moises azuup nde.

12 Moises jak Aroŋ na bowk bondukloki, Eleazar na Itamar: "Nde jekun un onhaloi osi un ode, onduklounk osi wojun unturowi usi NYEEK, nde dee na ze pñog pkak ozo pka iferment, zonkont oko un onhimni maakrin. 13 Hunkran ndeun pde olo zun ze iimna, zonkont un ominzi oun kfah nde kai, na ksi bowku uzuuz, osi wojun unturowi usi NYEEK, zonkont o un onhimni maakrin. 14 Ujuuns unhiindounk uz na pkaba psi un onhaloi, wi na bowku boiinz na bompili nde hilun pdea zun ze njiinzi, zonkont uhulo a injaka kfah nu, na kfah bowku, osi un onhaloi osi phyoŋ osi bowk Israel. 15 Pkaba pnsondopunk, na ujuuns unhiindounk na polo, ŋho pbi uzuuz na mnira mnsi wojun unturowi , phiindo na yolo zurun NYEEK injaka un onhaloi osi phiind. Ondai o pho kfah nu na bowku onzañi injaka mi NYEEK jakmi."

16 Moises yepro opi okal osi un onhaloi osi pjwa, abi me ja o hil o turoo uzuuz; ka deuzar Eleazar na Itamar maakrin, bowk Aroŋ 2 bonduklokunk; ka yep boko: 17 Ezi kaa, ka ndezi de un onhaloi osi pjwa zun ze iimna? O un onhimni maakrin. NYEEK hulun nde olo, antom punun pjwa baña uzuuz, pdo boko wojun zurun NYEEK. 18 Zonkont pñaak olo pozi ya zun ze iimna, nde hil ka pde oyemz olo za, ze mi nji jakmunk nde. 19 Aroŋ jak Moises: "Hankri bodo wojun pjwa psi un onhaloi osi boko na wojun boko unturowi zurun NYEEK; ŋun ŋminzŋi bi ir ze nji. Hankri ze nji hil de un onhaloi osi pjwa, o hil o pho na mnjona zurun NYEEK?" 20 Kero Moises te un ominzi liilun jaa, o na mnjona.