Piimnan Aroŋ na bowk
9
Zonu obakrin, Moises du Aroŋ, na bowk na boyeek Israel, 2 a jak Aroŋ: Jekun owai nu okal injaka un onhaloi osi pjwa, na ompalalu okal osi wojun unturowi, ŋolo 2 ŋozo pka kzeu, ubina ŋolo 2 zurun NYEEK. 3 Antom ujak bowk Israel: Nde jekun opi okal injaka un onhaloi osi pjwa, owai okal na owk ompalalu, ŋolo 2 ŋnsi olur 1, ŋozo pka kzeu, ŋnsi wojun unturowi. 4 Nde pjek uz oiit okal na ompalalu okal ŋho ŋnsi un onhaloi osi phyoŋ, antom pdol wojun zurun NYEEK, na un onhaloi osi un ode onagoi na mnsitidos; zonkont hankri NYEEK opbi zurun nde. 5 Ka bo bina ŋun Moises jakŋi boko bobiin zurun oku uzoñnor. Baña uzuuz jawi, naz zurun NYEEK. 6 Moises Jaa: Uni oun un NYEEK jaki nde, nde do, antom ulujl NYEEK hilun pjau zurun nde. 7 Moises jak Aroŋ: "Ñogun ze pkak, udo wojun nu usi un onhaloi osi pjwa, na wojun nu unturowi; udo wojun usi pjwa nu, na pliin nu. Antom, udo wojun usi bo pugi, udo wojun usi pjwa boko, injaka mi NYEEK jakmunk."8 Hunkran Aroŋ ñogdun ze pkak, fiŋ owai okal onhoi osi un onhaloi osi pjwa lo. 9 Bowk Aroŋ bina pñaak hul lo; ka ñoyun pkoñ ze pñaak, zu polo ze itin isi pkak. Pñaak pnduklopunk ahas pa ze pluzi pkak. 10 Mnira na mnkozkoz, na ojir onhoi duzu oreu osi un onhaloi osi pjwa, atur ŋa duzu pkak, injaka mi NYEEK jakmunk Moises. 11 ka atur oyemz na knjand zunaam.
12 Ka Aroŋ fiŋ onsaam osi wojun unturowi. Bowk hul lo pñaak, ka agur polo ze ŋnjir uzuuz ŋnsi pkak foyo. 13 Bosa hula uz onsaam osi wojun unturowi onfalfalni izink-izink, na weene uzuuz; katur olo duzu pkak. 14 Ka añou omez na izima, tur yolo duzu pkak injaka wojun unturowi.
15 Antom ka Aroŋ ñogun un onhaloi osi bopugi Ka ajek opi okal onhoi un onhaloi osi pjwa bopugi, fiŋ olo, dol wojun na olo antom o un onhaloi osi pjwa, injaka mi adomunk na oseke un. 16 Añogun uz onsaam osi wojun unturowi, ze mi ŋun jai kadolo. 17 Abina un onhaloi uz osi un ode, abiña anka kñen lo kint sumi, katur olo ze pkak, na wojun unturowi ze nfa.
18 Antom ka Aroŋ fiŋ oiit okal ominzun na ompalalu okal injaka un onhaloi osi phyoŋ onhili o osi bopugi. Bowk hul lo pñaak psi agurpi ze ŋnjir uzuuz an foyo pkak. 19 bo punun mnir oiit okal na ompalalu, na itaant ŋolo na mnir mnlermi omez, kozkoz na ojir onhoi duzu oreu. 20 Ka bo zu mnira duzu ijuuns ŋnsaam, antom ka Aroŋ tur mnira ze pkak; 21 ka ujuuns na pkab prei, Aroŋ hind ŋa zurun NYEEK injaka un onhaloi osi phiind, ze mi Moises jakmunk.
22 Antom ka Aroŋ deŋ iñene zu mnjona ze bopugi. Kero ka dol wojun usi pjwa, wojun unturowi, na un onhaloi osi phyoŋ, ka yeto zeu. 23 Moises na Aroŋ neej zoku uzoñnor. Antom puni, bozu mnjona ze bopugi. Ulujl NYEEK bi duzu bopugi uzuuz. 24 zonkont uroo pun zurun NYEEK, toom na un onhalohi, tur na mnira duzu pkak. Kero baña uzuuz iin un ominzun, bo kiik na mnlina, juuz zozee.