piimna Aroŋ na bowk
8
NYEEK pot jak Moises: 2 Bina Aroŋ na bowk, yun boko itiimo, mnsitidos pkir boko, owai okal osi un onhaloi osi pjwa, ŋmpalalu 2 nkal, na pnturu psi opoŋ onhani pka iferment. 3 Zoñnan baña uzuuz zoneeji oku uzoñnor. 4 Moises do injaka mi NYEEK jakmunk lo; baña uzuuz zoñnor zoneeji oku uzoñnor. 5 Moises jak baña bonzoñnorki: Uni njoun pdo ze krankanki, ol NYEEK jakun odolo. 6 Abina Aroŋ na bowk zurun, ñou boko na mnzup. 7 Atiimun Aroŋ kmbis nkañki, tan kolo na ktil, zu lo kmbis kndizki; antom zu oyenknin duzu lo, ontani na ktil knlirki un onuroi. 8 Ka azu lo kdeki ujuuns, zu lo yun iñigi kyenknin ikndwoi Urin na Tumin. 9 Azwa ubonde zweene; zurun azu klamina khuru, injaka mnjaŋzin aditno o ninsi Uzi, ze mi NYEEK jakmi Moises. 10 Antom, ka Moises jek mnsitidos miimna, kir oku na molo na baña uzuuz bonhoki zoku, piimnan olo o osi Uzi. 11 Ajek mnsitidos mnduklomi gur molo ŋyas 7 duzu pkak, akir pkak na ŋun uzuuz ŋnsi polo, injaka pya uz na pkab polo, piimna ŋolo. 12 Ka has mnsitidos miimna mloŋ duzu ween Aroŋ, akira piimna lo a o nnsi Uzi. 13 Moises ñogun bowk Aroŋ uz ,tiimun boko imbis inkañhi , tan boko itil, tan boko ibonde inkañhi ze yeene, injaka mi NYEEK hilunk jak Moises a do. 14 Antom ka ñogun owai okal osi un onhaloi zonkont pjwa; Aroŋ na bowk bozu iñen boko duzu ween owai onhuloi injaka un onhaloi osi pjwa; 15 ka Moises fiŋ olo, jek pñaak zu pkoñ ze polo duzu itin, zu ze ptoomi pkak uzuuz, antom pjinjinzun pkak. Antom ka has pñaak pnduklopi zeu pkak. Hunkran aiimnanun polo antom wojun duka dolo duzu polo. 16 Moises jek mnira uzuuz mhomi zomez, na mnlermunk oreu, na kozkoz 2 na mnira kolo, tur molo duzu pkak. 17 Ka owai okal na knjand olo, oyemz olo na omez olo na oziip, Moises tura na uroo zuri usi zun unaam uzoñnor, injaka mi NYEEK jakmunk lo a do.18 Antom ka ñogun ompalalu okal oseke un injaka wojun unturowi. Aroŋ na bowk bozu iñen boko duzu ween ompalalu. 19 Ka Moises fiŋ olo, gur pñaak olo ze ŋjir uzuuz ŋnsi pkak foyo. 20 Afalfalun ompalalu izink-izink, Moises tur weene, mnir na izink, inhoi ifah uzuuz isi ompalalu. Oko un onhaloi onturoi oknñeli un onliili, un onhaloi onturoi zuroo osi NYEEK, injaka mi NYEEK jakmunk Moises. 21 A fal oyemz inzink-inzink, ajek mnzup ñoun omez, na izim, atur weene na mnira na inzink uzuuz, inhoi ifah ompalalu uzuuz. Oko un onhaloi onturoi okñeeli un onliili,un onhaloi onturoi zuroo osi NYEEK, injaka mi NYEEK jakmunk Moises a do.
22 Antom ka ñogun ompalalu okal opugzan ominzun, ompalalu oiimna; Aroŋ na bowk zu iñen boko duzu ween ompalalu. 23 Ka Moises fiŋ olo jek pñaak olo, zu ze pleŋleŋ kwaz krei ksi Aroŋ, na pkoñ lo pyeek psi kñen krei, na pkoñ pyeek psi pzim lo prei. 24 Moises ñogun bowk Aroŋ uz, azu pñaak pminzpun ze ileŋleŋ iwaz boko irei, na ikoñ boko yeek irei, na ikoño boko yeek irei isi izim boko irei. Antom ka gur pñaak pnduklopi foyo pkak. 25 Antom ka jek mnira na ptaant, na mnira uzuuz mhomi zomez, na ojir onhoi duzu oreu, kozkoz 2 na mnira kolo, na pkab prei. 26 Ka pnturu psi opoŋ onhani pka iferment uz, onhoi zurun NYEEK, ajek obulu onhani pka iferment, pbulu psi opoŋ onagi na mnsitidos, na iwalans ifor indeŋlhi, ka azu yolo duzu mnira, duzu pkab prei. 27 Azu ŋa uzuuz ze iñene Aroŋ na bowk, ka hind ŋolo zurun NYEEK injaka un onhaloi onhindoi. 28 Ka Moises jek ŋolo uzuuz ze iñen boko, atur ŋa duzu un onhaloi ze wojun unturowi duzu pkak. Uni oko un onhaloi osi piimnan, unturowi zuroo, oknñeeli un onliili osi NYEEK. 29 Moises jek ujuuns, ojir ompalalu onhiimnani osi lo hind olo zurun injaka un onhindoi ze mi NYEEK hilunk jak lo a do.
30 Moises jek mnsitidos miimna mi uz na ojir pñaak phopi ze pkak, ka agur polo duzu Aroŋ na yun lo itiimo, duzu bowk na yun boko itiimo. Hunkran aditnu Aroŋ na yun lo itiimo, na bowk na yun boko itiimo, bo piimna pho bopenen Uzi. 31 Moises jak Aroŋ na bowk: Nde juŋun oyemz zoneeji oku uzoñnor; nde pdea za na opoŋ onhoi ze pnturu psi un onhaloi osi piimnan, ze mi nji jakmi: Aroŋ na bowk bo pdea. 32 Oyemz ondukloi na opoŋ nde ptura zuroo. 33 Nde ze hilun pun zoku uzoñnor ŋnu 7, ampkint pjau zonu oiimna nde oi ptoom, zonkont oiimna nde opka ŋnu 7 antom ptoom. 34 Un ondoloi hankri, oko ze mi NYEEK jakmi antom pdo wojun usi pjour pjwa nde. 35 Nde pduko zoneeji oku uzoñnor pnaak urim ampka ŋnu 7, nde pdigzan ŋun NYEEK jakŋi nde uzuuz antom nde ki kez; zonkont hunkran nji hilodun. 36 Hunkran Aroŋ na bowk dodun ŋun uzuuz NYEEK jaki boko ze mntuum Moises antom bo do.