Oiimna un onhaloi osi un ontuuntoi
7
Ominzi o oiimna un onhaloi osi un ontuuntoi onhoi un onhimni maakrin. 2 Zun ŋnsaam kfiŋunzi ŋnsi wojun onturowi, zoz onsaam osi un onhaloi osi un ontuuntoi oun pfiŋno uz; pñaak olo ka pguro ze ŋnjir uzuuz ŋnsi pkak. 3 Mnir olo uzuuz opsoondo: Ptaant, mnir miklermi omez, 4 kozkoz 2 uzuuz na mnira mhomi ze kolo zopik; na ojir onhoi duzu oreu, mnjai ka puno na mnkozkoz. 5 Nmpenen Uzi optur mnira duzu pkak injaka wojun unturowi usi NYEEK. O un onhaloi osi un ontuuntoi. 6 Boiinz uzuuz bosi pliin nmpenen Uzi bo pdea zun ze iimna. O un onhimni maakrin. 7 Injaka un onhaloi osi pjwa hunkran un onhaloi osi un ontuuntoi odun uz; ŋolo ŋho phon zoiimn oloŋ. Nmpenen Uzi andoli wojun oun pka oyemz ominzun. 8 Nmpenen Uzi ai pdo wojun unturowi usi ña, nmpenen Uzi aminzun opduko na kjand onsaam ominzun, 9 injaka un onhaloi uzuuz osi un ode onsowi zonfurnu, na onlempi ze kliroŋ, opho osi nmpenen Uzi ai pdo wojun uminzun. 10 Un onhaloi uzuuz osi un ode onagi na mnsitidos, o onkai, oka phairo, ozo pero, opho osi bowk Aroŋ uzuuz.Oiimna un onhaloi osi phyoŋ
11 Uni oun oiimn un onhaloi osi phyoŋ, ña hilni psoond NYEEK. 12 Ze apjak Uzi yota, na onsaam osi wojun usi mnlina, psoond obulu onhani pka iferment na ifor inagoi na mnsitidos, na iwalans indeŋlhi yani pka iferment, inkiroi na mnsitidos, na obulu ifor indeŋlhi, nag na mnsitidos, fritari. 13 Pkoulan na obulu ominzun aphul opoŋ onagi na iferment, na onsaam osi un onhaloi osi phyoŋ na mnlina. 14 Ze ŋun ŋhaloŋi uzuuz, aphyana obulu injaka un onhaloi phul NYEEK, onhoi pho osi nmpenen Uzi, ai pgur pñaak psi un onhaloi osi phyoŋ. 15 Oyemz osi un onhaloi osi phyoŋ antom plindar Uzi, opdeo zonu ahulunk olo; ozi ka pduko ampjau zonu osi faan. 16 Ka un onhaloi osi lo osi phyoŋ zonkont phuuz, ka sa oko psoond olo zonkont ajewi, oyemz wojun opdeo zonu ahulunk olo. Ondukloi ze olo ohilun pdeo zonu opugzan. 17 Oyemz wojun ondukloi ampjau zonu oajzan oka pturo zuroo. 18 Zoyemz wojun uminzun usi phyoŋ deo zonu oajzan, Uzi bozo pdigzan ña anhulunk olo. Un lo onhaloi ozo piino kñago Uzi duzu lo, opho injaka un onzijrani. Ña andeunk ojir kfah olo aphya na pjwa lo.
19 Oyemz ondaproi ze un onzopi, ozo pdeo; opturo zuroo. Oyemz oloŋ, ña anjinze ahilun pde oyemz osi un onhaloi onturoi. 20 Ze ña anzopi de oyemz osi un onhaloi osi phyoŋ onhoi osi NYEEK, ña aminzun ka puno ze psoof bopugi lo. 21 Ze ña dapro un onzopi, injaka kzopi ksi ña, o onsaam onzopi, o un oloŋ onzijrani onzopi, bi de oyemz ominzun osi un onhaloi osi phyoŋ onhoi osi NYEEK, ña aminzun opuno ze psoof bopugi lo.
Uzi Neen Pde Mnira na Pñaak
22 Ka NYEEK pot jak Moises: 23 antom alado na bowk Israel, a jak boko: Ndezo pde mnira mnsi oiit okal, nin mnsi ompalalu, nin mnsi opi, ndezo pde. 24 Mnira onsaam onkezi nde pthiun na ma un oloŋ, injaka mnsi ogoñar fiŋi uz, ka ndezi hilun pde mnira minzmun. 25 Onsaam oloŋ osi kfah olo hulohi NYEEK injaka wojun unturowi, ña andei mnira olo apuno ze psoof bopugi lo. 26 Zun nde zoonzi, ndezo pde pñaak psi okas o onsaam oloŋo. 27 Ze ña de pñaak, apuno ze psoof bopugi lo.
Kfah bopenen Uzi
28 NYEEK pot jak Moises: 29 alado na bowk Israel a jak boko: ña ambili na un onhaloi psoond NYEEK osi phyoŋ, apunun pnzink injaka wojun usi NYEEK. 30 Na iñen lo urir apbina a injaka wojun unturowi usi NYEEK. Apbina mnir uzuuz na ujuuns, aphula zurun NYEEK, injaka un onhaloi osi onhindoi zurun NYEEK. 31 Nmpenen Uzi optur mnira duzu pkak, ka ujuuns opho usi Aroŋ na bowk. 32 Nde ka phul nmpenen Uzi kfah lo ksi un onhaloi osi phyoŋ, onhoi pkab prei psi onsaam. 33 Awk Aroŋ anhuli pñaak na mnira mnsi un onhaloi osi phyoŋ, aun pka pkab prei injaka pnzink lo. 34 Nji punun un onhaloi osi phyoŋ osi bowk Israel, ujuuns unhulounk, na pkab prei pnhulopunk, Njo hul ŋa Aroŋ nmpenen Uzi na bowk injaka kfah boko. Uni oko oiimn osi bowk Israel onzañi. 35 Zonu Aroŋ na bowk huloi antom ptihunar NYEEK injaka bopenen Uzi, oiimna jaa, boka phulo kfah kminzkun ksi wojun unturowi usi NYEEK. 36 Zonu bokiroi, NYEEK jak bowk Israel, na iiñ boko ikmbihi, bohul bopenen Uzi ifah iminzyun injaka ifah boko onzañi.