Wojun 6

Pjwa psi mbaaji

NYEEK pot lado na Moises jak lo: 2 Ze ña jwi do un onhuzi zurun NYEEK, yeel pbotun un asinz huli lo ze kñen lo abaan lo, zakiiji, o ajek un oloŋ osi asinz na ofooza, 3 o iin un omei, yeel bisro ja azi iina; o do un onhuzi osi baña hagzoi pdo, 4 zajwi ze minzmi, adol un ontuuntoi. Apbotun un akiijunk, o osi ajekunk na ofooza, o osi ña huli lo abaan lo, o osi asinzunk, 5 o un abisrounk klas. Apbotun na uzindan, abundar uyas uñenzan duzu olo, aphul nminz olo uzuuz zonu aunk psoond un onhaloi osi un ontuuntoi. 6 Zonkont un ontuuntoi osi adoli, apbina ompalalu okal onhani pka kzeu osi un onhaloi phul NYEEK: Ze prez nminz olo oi phap olo. 7 Nmpenen Uzi opdo wojun zonkont lo zurun NYEEK; apjouro un adoli onzui lo ka tuunto.

Oiimna osi wojun unturowi

8 NYEEK pot lado na Moises jak lo: 9 Ladoon na Aroŋ na bowk ujak boko: Uni oun oiimna osi wojun unturowi. Wojun unturowi ka pduko ze pkak urim uzindan ampjau ze nfa. Uroo ze pkak uka pseh oloŋ. 10 Nmpenen Uzi optiimo yun isi mmuz miknjiilmi, na nkat ŋnsi mmuz miknjiilmi zeu apunun ofoou osi wojun unturowi usi uroo turi duzu pkak, apzwa ze kwaŋ pkak. 11 Antom adut yun iminzyun, aptiimo yun iloŋ, aphya na ofoou zuri usi zun uzoñnor, zun ze njiinzi. 12 Uroo ze pkak uka pseh oloŋ; bozo pmito. kana onu ze nfa nmpenen Uzi ka pbundar imul, apzoñun wojun unturowi duzu imul zuroo, atur mnir mnsi un onhaloi osi phyoŋ. 13 Uroo ka pseh oloŋ duzu pkak; bozo pmito.

Oiimna osi un onhaloi ode

14 Ominzi oun oiimna osi un onhaloi ode: Bowk Aroŋ ka psoonda NYEEK zurun pkak. 15 Apsumun kñen lo ifor indeŋlhi, na mnsitidos na nsensu onhoi duzu un onhaloi ode. A ptura duzu pkak injaka mnlelnin, antom oñeel un onliili osi NYEEK. 16 Aroŋ na bowk bo pde opoŋ ondukloi. Bo pde opoŋ ozo pka iferment zun ze iimna, zozee zuri zun uzoñnor, mezu unaam inoŋnt. 17 Ozo pjuŋo na iferment. Nji hul baka a injaka un onhaloi onturoi. O un onhimni maakrin, injaka un onhaloi osi pjwa, injaka un onhaloi osi un ontuuntoi uz. 18 Boiinz uzuuz ze bowk Aroŋ bo pdea. Opho kfah ksi boko ze wojun un onhaloi unturowi usi NYEEK, o pho phuuz pnzañi ze iiñ boko. Ze ña dapro olo apiimna.

Un onhaloi osi piimna bopenen Uzi

19 NYEEK pot jak Moises: 20 Uni oun un onhaloi osi Aroŋ na bowk oi pbiin zurun NYEEK zonu ai pkiro: ŋnlitru 2 ŋnsi ifor indeŋlhi, injaka un onhaloi ode osi mhagzin, psoof ze nfa psoof ze montna. 21 Yo pnago na mnsitidos, psowo ze fuutu. Antom ikitkitno, psoondo injaka un onhaloi ode okñeeli un onliili osi NYEEK. 22 Awk anhoi pdukno utihun lo injaka nmpenen Uzi ankiroi apdo pjaunk. Aptur ŋa uzuuz ŋnsi NYEEK. Ondai oko ohiimna onzañi ozo ptoom. 23 Hunkra un onhaloi osi un ode osi nmpenen Uzi opturo uzuuz; ozo pdeo.

Oiimna un onhaloi osi pjwa

24 Ka NYEEK pot lado na Moises, jak lo: 25 Alado na Aroŋ na bowk, a jak boko: O un onhimni maakrin, un onhaloi osi pjwa: Zun ŋnsaam ŋnsi wojun unturowi aika fiŋno, zoz un onhaloi onturoi osi pjwa oun pfiŋno, zurun NYEEK. O un onhimni maakrin. 26 Nmpenen Uzi andoli wojun apde a zun ze iimna, apdena za; zunaam oku uzoñnor. 27 Ze ña dapro oyemz ominzun apiimnan; Ze pñaak dapro yun ña, yun iminzyun opñowo zun ze iimna. 28 Fuutu pnjuŋnpunk olo po pfomo, osa juŋo na fuutu psi kobre po pñowo ptuuso pgañl na mnzup. 29 Ñiinz ze pliin bopenen Uzi hilun pdea. O un onhimni maakrin. 30 Bozo pde un onhaloi osi wojun pjour pjwa, boyani na pñaak zoku uzoñnor, pdo wojun zun ze iimna; oka pturo zuroo.