Wojun 5

Wojun usi pjwa pmenopi

Ze ña jwi ze minzmi, zonkont ayeel pzuup owadadi ze khuzin a iinki o tee, apka pjwa; apmindo zonkont pjwa lo. 2 Ze ña dapro un onhani pjiinz, ŋanun ot oko kligs onsaam onzopi, osi pgof o osi mez, o kligs ogoŋar onzopi okmpuloi zozee, ŋanun ot oko un ani pme, a pho ña anzopi ba tuunto; 3 Za dapro un onzopi osi ña , un onhilni pzu lo azop, zampbamb, antom bi hikrani, atuunto, ba pot ka pjwa. 4 Ze ña lado ampzaaf na mnjona, bisroo pdo khuzin o pdo ña mnjona, un ña hilni pbisro zonkont lo, ŋanun ampbamb, zomer lo, atuunto ze un oloŋ ze ŋun ŋminzŋi. 5 Ze minzmi ze ña jwi ze un oloŋ ze ŋun ŋminzŋi, atuunto, a pjeñlo ze un ominzun osi ajwni. 6 Ze pjouro pjwa psi adopi, a ka pbina owk ompalalu ohaz o opi ohaz zurun NYEEK , injaka un onhaloi osi pjwa. Nmpenen Uzi o pdo wojun usi un onhaloi osi pjwa lo, antom ahilun pjouro.

7 Zampka mi akbermi owk ompalalu, akbina ŋwale 2 ŋnsi pgof o ŋwale 2 ŋnsi mez phul NYEEK: ze mi atuuntomi, zonkont pjour pjwa lo psi adopunk, owale oloŋ opho osi un onhaloi osi pjwa, oloŋo o osi un onhaloi osi wojun unturowi. 8 Aphisa kzuuz na kñiiri, aphya na ŋa ze nmpenen Uzi, ai pdo wojun urun, un onhoi un onhaloi osi pjwa. Ka azo punun na weene. 9 Ze pñaak psi un onhaloi osi pjwa, apgur pa ze bool psi pkak, pnduklopunk, apjoptar pa zeu pkak; ominzi oun un onhaloi osi pjwa. 10 Na owale opugzan, nmpenen Uzi pdo wojun unturowi, injaka un onhaloi ze mi bohagzomi. Hunkran nmpenen Uzi oun pdo wojun usi pjwa adopi, antom ajouro polo.

11 Zamphilun pber ŋwale 2 ŋnsi pgof, ka azi hilun pber ŋwale 2 ŋnsi mez, aka pbina ŋnlitru 2 ŋnsi ifor indeŋlhi, injaka un onhaloi osi pjwa, antom ajouro pjwa lo. Azo phas mnsitidos duzu ya, ka azo pzu nsensu, zonkont o un onhaloi osi pjwa. 12 A phya na ya ze nmpenen Uzi, apbiñ ya psumun kñene, ajek yolo yo isi mnlelnin, ptur yolo ze pkak, duzu wojun unturowi usi NYEEK; oko un onhaloi osi pjwa. 13 Hunkran nmpenen Uzi oun pdo wojun usi lo, ze pjwa psi adopi; apjouro pa. Un onhaloi ondukloi opho osi nmpenen Uzi, ze mi onka ka dolo na un onhaloi osi kre.

Wojun usi pjwa

14 NYEEK pot jak Moises: 15 Ze ña kit oiimna ze kpaaŋ, zajwi, ze ŋun ŋiimuŋi ŋnsi NYEEK, apbina un onhaloi psoond NYEEK, injaka ompalalu okal osi kmenh onhani pka kzeu, onkai prez olo na mnjona ze nkilu ŋnsi prat, ze nkilu olo anka ka pesar zun ze iimna. Uni oun un onhaloi osi un ontuuntoi. 16 Hunkran aun pluk ña ahilunk ampluk ze ŋun ŋiimna; antom a bundar uyas uñenzan; aphul a nmpenen Uzi. Hunkran nmpenen Uzi oun pdo wojun na ompalalu okal ominzun injaka un onhaloi osi un ontuuntoi, ña aminzun apjouro pjwa lo.

Wojun usi pdo pjwa ze kpaaŋ

17 Ze ña jwi ze kpaaŋ lo, do un oiimna NYEEK jaki ña ki kdo, adol un ontuuntoi, apka pjwa, pjwa lo opjet duzu lo. 18 Aka phya na ompalalu okal osi kmenh, onhani pka kzeu, ze mi ulur unzwobi ze olo. Nmpenen Uzi opdo wojun usi un onhaloi osi un ontuuntoi ze kpaaŋ, do pjwa, antom ajouro polo. 19 Uni oko un onhaloi osi un ontuuntoi, injaka mi ña aminzun poti tuunto zurun NYEEK.