Wojun usi phyoŋ
3
Ze un onhaloi osi ña o wojun usi phyoŋ, o oiit okal o ohaz, aka psoonda ozo pka kzeu zurun NYEEK. 2 Apzu kñen lo duzu ween usi un lo onhaloi, apfiŋa zoneeji oku uzoñnor. Bopenen Uzi, bowk Aroŋ bo pgur pñaak ze ŋnjir uzuuz pfoyo pkak. 3 Zwojun o usi phyoŋ, a punun un onhaloi onturoi osi NYEEK, onhoi mnir uzuuz mnlermi omez o mnkoulami na ŋolo, 4 kozkoz 2 uzuuz na minira mhomi duzu kolo zopik, na ŋun ŋhoŋi duzu oreu, ŋnsi ai punun na mnkozkoz. 5 Bowk Aroŋ optur ŋun ŋminzŋun ze pkak, duzu un onhaloi onturoi onhoi duzu uroo imul, antom o un onhaloi onturoi zuroo, onjai ka ñeel un onliili osi NYEEK.6 Ze aphul NYEEK onsaam oloŋ osi kmenh injaka wojun usi phyoŋ, aka psoond oiit okal o ohaz onhani pka kzeu. 7 Ze ña psoond owk ompalalu osi un lo onhaloi, apsoonda zurun NYEEK. 8 Apzu kñen lo duzu ween un lo onhaloi ; apfiŋa zoneeji oku uzoñnor. Bowk Aroŋ opgur pñaak pfoyo pkak uzuuz. 9 Zwojun usi phyoŋ a punun un onhaloi osi phyoŋ onturoi osi NYEEK, onhoi mnir olo, ptaant uzuuz pnfalopi ze kuul ufez, mnir uzuuz mnlermi omez o mnkoulormi na olo, 10 na kozkoz 2 uzuuz, na mnir mhomi duzu kolo, zopik, na ŋun ŋhoŋi duzu oreu, ai punun na mnkozkoz. 11 Nmpenen Uzi optur ŋun ŋminzŋun duzu pkak, injaka un onhaloi osi un ode, onturoi psoond NYEEK.
12 "Ze aphul opi, aphul a zurun NYEEK. 13 Apzu kñen duzu ween olo, a pfiŋa zoneeji oku uzoñnor. Bowk Aroŋ opgur pñaak olo ze ŋnjir uzuuz pfoyo pkak. 14 Ze un onhaloi ominzun osi ahuli, aka punun un oloŋ onhaloi onturoi psoond NYEEK, onhoi: mnir uzuuz mnlermi omez o mnkoulami na ŋolo. 15 Injaka kozkoz 2 uz, na mnir mhomi duzu kolo zopik, na ojir onhoi duzu oreu, ai punun na mnkozkoz. 16 Nmpenen Uzi optur ŋjir ŋminzŋun ze pkak injaka un onhaloi osi un ode, un onhaloi onturoi oknñeeli un onliili. Mnir uzuuz mo mnsi NYEEK. 17 "Ominzi oko oiimna onhani po pzimlan, ze iiña uzuuz yoi pbi ze kfez nde, zun ndei pzoon: Ndezo pde mnira, ka ndezo pde pñaak."