Un onhaloi osi un ode
2
Zoyar ña ambi na un onhaloi osi un ode psoond NYEEK, un onhaloi opho ifor indeŋlhi. Aphas mnsitidos duzu ya azu nsensu. 2 Aphya na a psoond bopenen Uzi, bowk Aroŋ. Aloŋ ze boko opjek ifor impozhi indeŋlhi na mnsitidos, na nsensu uzuuz, aptur ŋa ze pkak injaka mnlelnin, un onhaloi onturoi zuroo oknñeeli un onliili zurun NYEEK. 3 Ondukloi ze un onhaloi osi un ode opho osi Aroŋ na bowk. O un onhimni maakrin, ompunohi ze un onhaloi turoo zuroo phul NYEEK.4 Ze ña ze nde ophul un onhaloi osi un ode, onsowi zonfurnu, opho ifor indeŋlhi: ohilun pho obulu onhani pka iferment, onsowoi na mnsitidos, o iwalans, indeŋlhi yani pka iferment inkiroi na mnsitidos. 5 Ze un onhaloi osi un ode, o un onhilari zonfurnu, opho osi ifor indeŋlhi yani pka iferment, inagohi na mnsitidos. 6 Wo pfalfalun ya inzink inzink, wo phas mnsitidos duzu ya.Yo pho un onhaloi osi un ode. 7 Ze wop psoond un onhaloi osi un ode, onhilari zonfurnu, oknlempoi na ifor indeŋlhi inkai mnsitidos. 8 Hunkran woun pbina un onhaloi osi NYEEK osi un ode, onlempoi na ŋun ŋminzŋun; wop psoond ŋa nmpenen Uzi, aka phya na ŋa ze pñog pkak. 9 Nmpenen Uzi opjek ojir oloŋ osi ŋun ŋminzŋun, aptur ŋa duzu pkak injaka mnlelnin. Antom o un onhaloi onturoi zuroo, onjai ka ñeel un onliili zurun NYEEK. 10 Ondukloi ze un onhaloi osi un ode, opho osi Aroŋ na bowk. O un onhimni maakrin, ompunohi ze un onhaloi turoo zuroo phul NYEEK .
11 Nin un oloŋ onhaloi osi un ode osi NYEEK ozo plempo na iferment. Zonkont uzo ptur iferment na pnou ze un onhaloi onzipi zuroo osi NYEEK. 12 Uhilun pbina ŋun ŋminzŋi ŋho un onhaloi phul NYEEK, osi kit kseke, ka ŋozo pturo ze pkak antom psoond kñeeli knliilki. 13 Lempun un onhaloi osi un ode na ptila. Ika hutun ptila psi phuuz psi Uzi nu pzankl ze un onhaloi osi un ode. Wo pzu ptila ze ŋun nu ŋhaloŋi uzuuz.
14 Ze wo psoond NYEEK un onhaloi osi un ode, osi ŋun nkitoŋi urun, wo pbi na trigu ohalu onjiiji, onsowoi zuroo. 15 Wo phas mnsitidos duzu a, wo pzu nsensu. Uni oko un onhaloi osi kre. 16 Hunkran nmpenen Uzi oun ptur ojir osi mnlelnin mnsi isuk inlonohi na mnsitidos uzuuz na nsensu; oko un onhaloi onturoi osi NYEEK.