Oliuri oajzan
Wojun
Oneeji olado
Wojun un Onturoi
1
Ka NYEEK du Moises, lado na lo zoku uzoñnor jak lo: 2 Ladon na bowk Israel ujak boko: Ze ña aloŋ ze nde bina un onhaloi psoond NYEEK, apbi na oiit oloŋ o ompalalu ze ŋnsaam lo.3 Zaphul oiit oloŋ ze ŋiit lo injaka un onhaloi osi wojun unturowi, aka psoond oiit okal ze ŋnsaam lo onhani pka kzeu; Aphul a zoneeji oku uzoñnor, antom NYEEK hilun pdigzan ña aminzun. 4 Apzu kñen lo duzu ween onsaam ominzun, antom NYEEK digzan lo injaka wojun unturowi zonkont pjour pjwa lo. 5 Apfiŋ owai okal ominzun zurun NYEEK, antom bopenen Uzi, bowk Aroŋ, bo psoond pñaak pminzpun, bo pgur pa pfoyo pkak phopi zoneeji oku uzoñnor. 6 Aploj onsaam ominzun osi un onhaloi osi wojun unturowi, apfal a inzink inzink. 7 Bopenen Uzi, bowk Aroŋ, bo psehun uroo duzu pkak, bozoñun imul zuroo. 8 Antom bowk Aroŋ bozoñun inzink iminzyun uzuuz, na weene na mnira, duzu imul, zuroo usi pkak. 9 Omez na izima ŋho pñowo na mnzup; bopenen Uzi optur ŋun ŋminzŋun uzuuz duzu pkak; ŋho pho un onhaloi osi wojun unturowi zuroo, oknñeeli un onliili zurun NYEEK.
10 Zajeu psoond ompalalu o ŋmpi ŋhaz ŋnsaam ŋnsi kmeh, injaka un onhaloi osi wojun unturowi, aka psoond ompalalu okal onhani pka kzeu. 11 Apfiŋa zurun NYEEK, zojir duzu pkak. Bopenen Uzi, bowk Aroŋ 2, bo pgur pñaak olo pfoyo pkak. 12 Apfalfalun na inzink inzink; nmpenen Uzi opzoñun inzink iminzyun uzuuz, na weene na mnira, duzu imul uroo unhoi duzu pkak. 13 Ŋun ŋnsi omez na izima ka pñowo na mnzup; nmpenen Uzi ophul ŋa uzuuz, aptur ŋa duzu pkak. ŋho pho un onhaloi osi wojun unturowi, zuroo oknñeeli un onliili zurun NYEEK.
14 Zaphul NYEEK nkas injaka un onhaloi osi wojun unturowi, apbi na owale pgof o owale osi mez. 15 Nmpenen Uzi ophya na okas ominzun ze pkak, apdut a kzuuz na kñiiri, ka azo punun beene ze kzuuz, ptur olo duzu pkak. A pjoptar pñaak olo ze bool pkak. 16 Aka punun pmbozale olo na hiz olo, plis yolo zojir pkak, zojir phyour onu, zun ofoou mnira onze. 17 Apbup owale ze iwaaklu olo, ptau olo, ka azo ptawa ze ŋnjir 2, nmpenen Uzi optura duzu imul zuroo usi pkak. Owale opturo uzuuz, injaka un onhaloi osi wojun unturowi oknñeeli un onliili zurun NYEEK.