Uzi zu Moises pnazun Oku
40
NYEEK lado na Moises jak lo: 2 Naznan Oku, oku osi uzoñnor, zonu oseke ze pli pseke. 3 Zuun ukau usi phuuz mezu, uler wolo na knoŋt. 4 Zuun omes mezu olo, uzu ze plinzan ŋun ŋnjai ka ya duzu olo. Zuun uz okandel zolo usheun olo. 5 Zuun pkak psi mhuru nsensu zurun ukau phuuz, uhakun knoŋt zoneeji oku. 6 Zuun pkak psi wojun unturowi zurun oku uzoñnor. 7 Zuun usya ze psoof oku uzoñnor na pkak, usumun wolo mnzup. 8 Antom ulemp unaam ufoyo olo, uhakun knoŋt zoneeji unaam. 9 Jekun mnsitidos mnsi ukir, ukir oku na ŋun ŋhoŋi zolo, uiimna nolo na ŋun uzuuz okaŋi; hunkran oun piimna. 10 Kirun pkak uz psi wojun unturowi na ŋun polo uzuuz , uiimna polo; hunkran pkak oun pho un onhimni maakrin. 11 Kirun ptisel uz na iluzi polo, uiimna polo. 12 Zuun Aroŋ na bowk bo ñog ze plumun oku uzoñnor, uñou boko na mnzup, 13 Utiimun Aroŋ yun itiimo iimna, ukir lo uiimna lo, antom adolin utihun penen Uzi. 14 Ñogna bowk uz utiimun boko imbis inkañhi, 15 Ukir boko injaka mi ukirmunk aliin boko, antom bo dolin utihun penen Uzi. Ukir boko o pzu baka penen Uzi, boko na iiñ boko onzañi."Oku Naznoo
16 Moises lemp ŋun uzuuz ze mi NYEEK jakmunk lo alemp. 17 Hunkran, zonu oseke ze pli pseke zolur opugzan, oku naznoo. 18 Moises nazun oku, zu iluzi olo, nazun isap olo, zu ilaankun ze olo. 19 Alef kleri duzu oku, zu kleri kloŋ duzu kndaakun, ze mi NYEEK jakmunk Moises. 20 A jek ilaak infejohi injaka itaagwa 2 isi oiimna, zu yolo ze mezu ukau Uzi, zu ilaankun ze insawaŋ isi ukau Uzi, zu kleri kñago duzu wolo. 21 Aya na ukau Uzi zoku, ahakun knoŋt kuund ukau Uzi, olo ze mi NYEEK jakmunk Moises. 22 Azu omes zoku uzoñnor, Zojir duzu, ze digu knoŋt. 23 Duzu olo azu opoŋ zurun NYEEK ze mi NYEEK jakmunk Moises. 24 Azu okandel zoku uzoñnor, zojir zeu zurun omes, 25 Asehun olus zurun NYEEK, ze mi NYEEK jakmunk Moises. 26 Azu pkak phuru zoku uzoñnor zurun knoŋt. 27 Atur nsensu ikñeelhi un onliili duzu polo, ze mi NYEEK jakmunk Moises. 28 Antom ka hakun knoŋt ze plumun oku. 29 Azu pkak psi wojun unturowi ze plumun oku uzoñnor, tur ŋnsaam duzu polo, na un onhaloi osi ŋun ŋnde, ze mi NYEEK jakmunk Moises. 30 Azu usya ze psoof oku uzoñnor na pkak, zu mnzup ze wolo antom pñoun. 31 Moises na Aroŋ na bowk boñou iñen na izim ze wolo. 32 Zo neejr boko zoku uzoñnor, o ze bo phya ze pkak, bokñoo ze mi NYEEK jakmunk Moises. 33 Moises lemp unaam foyo oku na pkak, ahkun knoŋt zoneeji unaam. hunkran Moises toomdun utihun uzuuz .
Knzun Ler Oku
34 Ka knzun bi ler oku uzoñnor, ulujl NYEEK sum oku ibuur. 35 Anka Moises azi hilun pneej zoku uzoñnor, ze mi knzun omunk duzu olo, ka ulujl NYEEK sum oku ibuur. 36 Kana uyas knzuna nazok duzu oku, bowk Israel, hil knazo ksol. 37 Ze knzun kozi nazo bozo psol, ampjau zonu knzun nazoi. 38 Hunkran knzun kminzkun ksi NYEEK jaun kho duzu oku ze pnak; knzun kminzkun hil a ka uroo zurim. bowk Israel uzuuz , hil akhin knzun kminzkun uzuuz zuhyas boko.