Jako du bowk lado na boko
49
Zotoomi, Jako du bowk jak boko: "Nde ñogun, njo pzuup nde un onhoi pho na nde ze ŋnu ŋikmbiŋi".2 Bowk Jako nde zoñnoran, nde tein;
nde siinkun Israel, aliin nde.
3 “Rubeŋ, wi wo nnsek ni,
ofoz ni, otepi philun ni,
upeun pfiro, upeun pka philun.
4 Wi uzi o ña hazni ba dafni injaka mnzup,
uzo pho ña ampei pfiro,
zonkont upayo zuliit aliinu, juun bolo.
5 “Symeoŋ na levi, bozarokun.
Yeej boko o izij isi philun psok.
6 Zuzoñnor boko oyek ni ozo pneej za;
ze uzonñnor boko ulujl ni bozo pho za;
zonkont oreu boko bo fiŋ boiinz, bozu ŋiit nkal ka ŋnzakmi, zonkont khuzin bo jeuki pdo.
7 Antom Khuzin o duzu oreu boko,
zonkont oreu boko hil magi.
Nji njo ptaaslan baka ze psoof
ze bowk Jako.
8 “Juda, pzaro nu o pzahu;
kñen nu o pho duzu kzuuz
bo bir nu.
Bowk aliinu o pŋup zurunu.
9 Juda wo pho owk olyoŋ.
wya goŋar antom fiŋ,
kaki, nmbukin.
Injaka olyoŋ, huglo piinzi; injaka olyoŋ, olyoŋ ohaz;
noonzi ka kziu phya plutlut na?
10 Pliiti pliin pozo pun ze kñen Juda,
ka ozo phaŋ nliin ze kiiñ
nu ampjau zobiir Silo;
ŋnsaak optea.
11 Aptan ohuru na owk olo,
ze pzep huba umpei pnuro.
Apñou yun lo itiimo ze pkem,
na kmbis lo kndizki ze pñak mhuba.
12 Kil lo o pjeenk pkem,
iñiin lo faas mntau.
13 "Zebuloŋ o pzoo ze pñog krik;
osaak lo o pho pkiŋ ŋmpur;
klil lo ophya ampjau ze klil Sidoŋ.
14 “Isakar o ohuru onkai imon ilinsi,
ompiinz ze psoof ŋmpalalu.
15 Aiin ja phyoŋ,
o na mnjona,
ja osaak hil liil pho maakrin;
ayetun isak lo antom plap ŋunu,
athiun injaka nnjuuk.
16 “Daŋ o pdo baña lo olado,
injaka kiiñ kloŋ ksi Israel.
17 Daŋ o pho osai opulo,
opulo ze pñog zun ze zipi,
okndumi pzim onsumpliz;
ze ña dapo olo,
apjet ofez.
18 NYEEK nji o ze plaau nu.
19 “Bogutun opjet Gadi ogut,
ka alo apjet baka ogut ze kfez.
20 “Osaak Aser ophul ŋun ŋnde ŋniirŋi;
ophul ŋun ŋliilŋi ŋnsi nliin.
21 “Naftali oko owasa,
onhutnoi;
onhai ka bwk ŋhwk olo ŋnuroŋi.
22 “Jose oko bunu
bunjai ka buk mbuk mnsumi,
pñog plik mnzup;
inah bolo opiinz duzu omur.
23 Bobir lo jeta ogu ofooza na insaaŋe,
bo los insaaŋe, bodokna,
24 Ka knsaaŋe lo nazi;
kñen lo finzlo
zonkont kñen Uzi unkabi philun usi Jako,
anhoi ulaak unliinswi usi Israel,
25 Zonkont Uzi aliinu o pzink nu,
zonkont unkabi philun uzuuz
ukzui mnjona
na mnjona mnsi duzu,
na mnjona kndilun khoki zeu,
na mnjona bopoz bonsumki uz.
26 Mnjona mnsi aliinu pe psum
ampenpen mnjona mnsi bonliin ni,
mpe priza
mnsi nkuŋ ŋnjona.
mnjona minzmun o pho duzu ween Jose,
duzu ween ña anditnoi na pzaaro lo.
27 “Benjamiŋ o oŋone okngoŋari;
ze nfa o a kde un obupi;
ze montna o akhai un ogoŋari.“
28 Indai oun iiñ 12 isi bowk Israel. Olado ondai o olado aliin boko jaki boko kero ka zu mnjona ze boko. Azu kana ña ze boko mnjona lo.
Pkez Jako
29 Antom ka hul boko prim jaa: "Njo pkez, pkoulor na boliin ni. Nde moyan zongune ounk ze ksaal knhili o ksi Efroŋ, nyeteu, 30 ongune onhoi ze ksaal Makpela, pñog ze Manre, zosaak osi Kanaan, ksi Abroŋ ganzki, ksaal kminzkun uzuuz ze kñen Efroŋ, nyeteu, zu kolo ongune. 31 Bo moin Abroŋ za na ahar lo Sara; sa pot moi Jaaki na har lo Rebeka zolo. zoz nji saun moin Leya. 32 Ksaal na ongune ounk ze kolo knganzoki ze kñen bowk Eti. 33 Kero Jako toom plado na bowk koulan izim lo zuliit, fuk oyefzar otoomi kezi ya koulor na baña lo.