Pmoi puum Jako
50
Ka Jose jet limo duzu aliin, huri, hul lo obis. 2 Ka Jose hul botihun lo, bonhoki bojuund baña ze ku ujuund antom bo kir puum aliin na bun ukndwobi balsamu uknkirnbi iligs ze nkil ŋminzŋun, antom pki khilun psar psoko. Hunkran bo juund kirdun puum Israel, 3 Bo ka ŋnu 40 ze pkir puuma ze mi Bojitu ai kdo; Bojitu hudar Jako ŋnu 70.4 Kero ŋnu puuma zipi, ka Jose ya ze nyeek nnsi ku Faro jak lo: "Nde dolan kñago, nde zuupin nliin nkuni kndaaki: nji ñaun nde, antom nde zuupin Faro, nde jak lo: 5 nliin ni zuin ka nji bisro, jakin: "Njo pkez; Moyan zuir usi nji jipbi bi pmoino zosaak osi Kanaan, zoz woun pmoi ni. ze krankanki nji jeu phya pmoi nliin ni antom ol nji kakun. 6 Ka Faro seemb lo jaa: Solun uya moi aliin nu, ze mi azumunk wi ka ubisro.'' 7 Hunkran Jose yadun ya moi aliin. Boyeek bosi mez Faro, na boyeek bosi osaak Ejitu, bo yana yaa, 8 baña bosi mez Jose, uzuuz , na bomaka, na baña uz bosi mez aliin; bo duk ze bopoz, ŋmpalalu na ŋiit, zosaak osi Goseŋ. 9 Nkaaru na baña bondapoki ŋnsumpliz bo yana ya uz; baña sum maakrin. 10 Kero bo jau zun bo kpolunzi trigu ze si Atadi, ze kwaŋ krik ksi Jordoŋ, bo hur un onsumi, yugun maakrin. Jose hudar aliin ŋnu 7. 11 Kero baña bonhoki zosaak ominzun, bokananeu, iin baña hur puuma zun ze poli trigu ze si Atadi, ka bo jaa: ''Nde tenun ze mi Bojitu khurmunk pum maakrin; ''zonkont un ominzun, kaun bo zu zun ze minzun ktiim Abel-Mizraiŋ, ze o zojirun krik Jordoŋ. 12 Hunkran bowk Jako dodun aliin boko ze mi ajakmunk boko. 13 Bo ya na puum lo zosaak osi Kanaan, ya moi lo zongune osi Makpela, ze kwaŋ ksaal ksi Manre, ksi Abroŋ ganzki, ksaal kminzkun ksi ngune. Ze kñen Efroŋ Nyeteu. 14 Kero ka toom pmoi aliin boko, Jose kak Ejitu, lado na bomaka, na baña uzuuz bonhyaki na lo phya pmatir pmoi puuma.
Jose hul bomaka kliinsi
15 Kero aliin boko kezi, bomak Jose jaa: "Men Jose opdeuzar nja; zowadadi ahilun pbotun nja pko zonkont khuzin nja do ki lo. 16 Hunkran bohildun ña aya jak Jose: "Kero aliin nu azo kezi ahul prim jaa: 17 Antom pjaku apñau nu ujour bomaku ŋun ŋhuzŋi bodoŋi wi, na pjuwa boko; ze krankanki ndo pñaun nu ujour ndo pjuwa ndo dopi, ndo botihun Uzi aliin nu. Jose huri kero ka te nkuni kminzkun. 18 Antom ka bomaka hur na lo bi ŋup zurun lo zozee jak lo: "Ndouki injaka botihun nu. 19 Jose seemb boko: "Nde ika liinki; njoun ze kfah Uzi? 20 Nde, zowadadi, nde hil jeu pdolin khuzin, ka Uzi zimlan khuzin zu mnjona, antom pdo ze mi nde iinmunk ze krank, pburburun phila baña bonsumki ze mi nde kten mink. 21 Nde ika liinki, njo pdendenun nde na bowk nde uzuuz . Hunkran azudun kliinsi ze boko. Lado olado onliili ze ijuuns boko.
Pkez Jose
22 Jose duko ze Ejitu, alo na bowkoliin aliin. Aka ŋnlur 110. 23 Aiin bowk na bowai Efraiŋ anjau ze kiiñ khajzan; Bowk Makir na bosi Manases uz, bosi Jose hupi zisou lo. 24 Ka Jose jak bomaka: "Njo pkez; ka zowadadi Uzi o bi pzu nde mnjona pziinkun nde, antom pzu nde, nde pun zosaak ondai phya na nde zosaak ubisrounk ja wo phul Abroŋ, Jaaki na Jako. 25 Jose zu bowk Israel bo bisro, jak boko: "Nji me zowadadi Uzi o bi pziinkun nde ze nkil ŋminzŋun, nde punan imoon ni nde sona. 26 Hunkran Jose kadun ŋnlur 110 antom kezi. Bo kir kliks lo na bun ukndwobi balsamu unjai kzu kligs ki kñeel, zu zonkansoŋ ze Ejitu.