Jako Maaki
48
Kero ŋun ŋminzŋi zipi, baña jak Jose: "Aliinu maaki. Ka Jose yana bowk 2, Manases na Efraiŋ. 2 Ka bo jak Jako awku Jose ozi, abi ptenu. Israel dol ofooza ankint nazo zoo zuliit. 3 Jako jak Jose: "Uzi unkai philu ubi ze nji ze Luuz, zosaak Kanan, zu mnjona ze nji zolo, 4 Jakin: "Njo pzuu ubuk, ubundar maakrin. Njo pzuu usum baña ze ŋnsaak, njo phulu osaak ondai o osi kiiñ nu, iij olo onzañi. 5 Ze krank bowku bo 2, ubukunk zosaak Ejitu, ka nji ninpo jau zunzi ze Ejitu, bo o bosinin. Efraiŋ na Manases bo pho bo bosinin injaka Rubeŋ na Symeoŋ. 6 Ze upot buk bopoz boloŋ bo pho bosinu; ze mi itiim bomak boko omi, bo pdwo ze kiiñ boko. 7 Kero nji ka biin Padaŋ, Rakel kez ze book, zosaak Kanan, kero ozankl mpozmi antom ndo jau Efrata. Nji moya za ze book Efrata one Beleŋ.8 Israel iin bowk Jose, yeproo: "Binoon ki? 9 Jose jak aliin: Bowkin ka bosi Uzi aliin nji zunzi. Israel jak lo: "Bina baka antom nzu mnjona ze boko. 10 Kil Israel kozi pot ze ten na mnjona, zonkont pzafa, azi hilun pten na mnjona. Jose ñogun bowk ze kwaŋ lo. Israel hom boko hul boko obis.
Jako zu mnjona ze Jose na bowk
11 Antom ka Israel jak Jose: "Mbazi pot zaaf ja njo piin mnkil un oloŋ, ka Uzi zuin iin nu na bowku uz. 12 Jose punun boko zijuklu Israel, ŋup zurun lo na mnkil anjau zozee. 13 Antom Jose jek boko 2, Efraiŋ ze kñen lo krei, ze kñen kmai Israel, Manases zojir omai Jose, kñen krei ksi Israel, ñogun boko ze kwaŋ lo. 14 Antom Israel solun kñen krei, zu duzu ween Efraiŋ, ampei pho nmpoz, zu kñen lo kmai duzu ween Manases, suzlan iñene, ŋanu Manases oi ninseke. 15 Azu mnjona ze Jose jaa: "Uzi nliini Abroŋ na Jaaki yaanzi ze zurun bolo, Uzi undenden bi nji ze phila ni uzuuz anjau hankri. 16 Oiili ominzun omburburnunk nji ze khuzin uzuuz, ozu mnjona ze bozal bondaaki, ktiim ni dwo ze boko, na ktiim nliini Abroŋ na Jaaki; bo bundar injaka inzoŋ ze psoof osaak.
17 Kero Jose iin aliin zu kñen krei duzu ween Efraiŋ, azi liini; hunkran abup dun kñen aliin punu kolo ze ween Efraiŋ antom pzu ze ween Manases. 18 Jose jak aliin: "Mbaza hunkran; andai bukoun urun. Zun kñen un krei duzu ween aminzi. 19 Aliin yeeli jak lo: "Nji, nji mee, nmbukin nji mee; alo uz apho orasa, apho nyeek; ka aza ampozi a pea pho nyeek. Kiiñ lo opho ze ŋnsaak ŋnsumŋi. 20 Ka zu mnjona duzu boko onu ominzun, jaa: "Ze nde Israel o pzu mnjona, pja: "Uzi opdolu injaka Efraiŋ na Manases. Hunkran azudun ktiim Efraiŋ zurun ksi Manases. 21 Antom Israel jak Jose: "Nji, njo pkez, ka Uzi o pho na nde bo pzu nde nde kak osaak boliin nde. 22 Njo phulu ktaular osaak omagi osi nkuŋ ompei osi bomaku, osi nji sehi na kej ni na knsaaŋe ze kñen bomoreu.