Faro lado na Jako
47
Ka Jose ya ze Faro jak lo: "Nliini na bomakin, ŋnsaam boko, ŋiit na ŋun uzuuz ŋnsi bo kaŋi, bo biin osaak Kanan, bo o ze Goseŋ. 2 Adat baña 5 ze bomaka ya soond boko Faro. 3 Faro yep bomaka: "Utihun boon nde ktihunbun? Bo semb Faro: Bo tihun un oko boyafna ŋmpalalu injaka aliindo uz. 4 Bo pot jak Faro ndo bi antom pzoo zosaaki, zonkont ozi ka otun osi ŋmpalalu botihun un oi pdoh, ka ono mag zosaak osi Kanan, ndo ñau un uthun ndo zoo zosaak osi Goseŋ. 5 Faro jak Jose: "Aliinu na bomaku bo bi ze wi. 6 Osaak Ejitu oli zurun nu. Zuun aliinu na bomaku antom bo zoo zojir ompei pnuro zosaak Goseŋ. Zume boloŋ ze psoof boko bonkaaki ulipl ukzu boko injaka boyeek boyafna ŋnsaam nin.7 Jose bi na aliin lo Jako, soond Faro. Jako zu mnjona ze Faro. 8 Faro yep Jako: "ŋlur ŋoon wkaŋu ze phila nu? 9 Jako semb Faro jaa: Nji ka ŋnlur 130. Ŋlur ŋminzŋi ŋntiiŋzi. Ŋozi ziink ŋnlur ŋnsi boliin ni kaŋi ze phila boko. 10 Jako zu mnjona ze Faro, antom pun zurun lo. 11 Ka Jose hul aliin na bomaka zun zosaak Ejitu, zojir osi Ramses, antom bo o zolo. Ze mi Faro hili jak boko bo do. 12 Jose denden aliin, bomaka na baña uzuuz bosi bomaka, a hul baka ŋun ŋnde ze mi bowk boko omi.
Jose ganz osaak Ejitu antom hul Faro
13 Ozi hil ka ŋun ŋnde ze ŋnsaak uzuuz , zonkont ono hil mag maakrin; Hunkran baña bosi Ejitu na bosi Kanan ahŋdun ofooza zonkont ono. 14 Jose zoklan onsaam uzuuz onhili o ze Ejitu na Kanan zokont ksepru bo hili a ka ganz, bi na onsaam ominzun uzuuz zu ze knjiu ksi Faro. 15 Kero onsaam, zosaak Ejitu na osi Kanan bi toomi, baña bosi Ejitu uzuuz ya ze Jose jak lo: "Hulan ndo opoŋ; Zonkontee kaun ka ndo pkez zurunu? Onsaam zaankl ndo. 16 Jose jak baña: Zonsaam zaankl nde, nde kbi na ŋnsaam nde ze kfah ksi onsaam antom nhul nde opoŋ. 17 Ka bo ya na ŋnsaam boko ya hul Jose; ka Jose hul boko ŋun ŋnde pzimlan na ŋnsumpliz, ŋmpalalu, ŋiit na ŋhuru; ka aden-nden boko ŋun ŋnde zolur ominzun ze kfah ngoŋar boko uzuuz . 18 Olur ominzun bi toomi, ka bo ya ze Jose zolur opugzan, bo jaka: "Nyeek, ndo zo pmenun pja onsaam ndo toomi. Ze mi ukamunk ŋnsaam ndo uzuuz , ozi ka un oloŋ ndo hilni plukna, ze mbaza ŋleef ndo ŋa na isaal ndo. 19 Zonkontee kaun ka ndo pkez zurun kil nu, ndo na osaak ndo? Ganzan ndo na osaak ndo uzimlan ndo na ŋun ŋnde, ndo na ossak ndo, ndo pho bojuuk Faro. Hulan ndo osepe antom ndo ka phila, ndo ki kez, osaak ki kduko osiil ozo pka ña.
20 Hunkran, Jose ganzdun osaak Ejitu uzuuz hul Faro, Ze bojitu ña akhap zun lo, zonkont ono mag maakrin duzu boko; Osaak uzuuz duk o osi Faro. 21 Azu baña pjuuk zimbaau zotepi ampjau ze ptoomi osaak Ejitu. 22 Jose azi ganz osaak bopenen; zonkont bopenen hil a ka de ode osi Faro huli boko; Zonkont un ominzun bozi hap osaak boko. 23 Ka Jose jak baña: "Nji ganz nde na osaak nde phul Faro. Njoink phul nde osepe antom nde laal ze isaal. 24 Zoyar nde an ze kit osepe nde phul Faro wyas uñenzan, Wyas wakna kduko usinde, usi osepe na ode nde na bonhokunk ze iku nde, antom bowk nde sa de uz. 25 Bo jaka: "Nyeek, ulaau phila ndo, ndo jeu piin kñago zurun nu. Ndo pho bojuuk bosi Faro. 26 Jose zu oiimna zosaak Egitu anjau hankri, Faro ka ojir oñenzan; osaak osi bopenen ozo pho osi Faro.
27 Hunkran bowk Israel bilun o zosaak Ejitu zosaak osi Goseŋ. Osaak ominzun bi o osi boko. Bo buk bopoz anka bo bi sum maakrin. 28 Jako ka ŋnlur 17 zosaak Ejitu, ka phila lo ya anjau ze ŋnlur 147.
29 Kero Israel ñog pkez, adu awk lo Jose jak lo: "Ze nji iin kñago ze kil nu, njo pñau nu antom uzu kñen zeu psou ni udolin mnjona uki kmoin zosaak Ejitu. 30 Zoyaarin an kezi, ya ze boliini; wo puni ze Ejitu wya moin zongune boko. Ka Jose semb lo: Njo pdo ze mi ujakmunk nji. 31 Ka Jako jak lo: "Bisron na. Jose bisro lo. Israel juz duzu ween uliit lo.