Israel na baña lo bo ya Ejitu
46
Israel diimpo book na ŋun uzuuz ŋi a hili kaa. Kero ka jau ze Berseba, adol wojun usi Uzi na ŋnsaam aliin lo Jaaki. 2 Uzi lado na Israel zozaafi zurim jaklo: Jako! "Jako! Ka semb jaa: "Njii zi. 3 Ujaka: "Njoun Uzi, Uzi usi aliinu. Ika kalo phya Ejitu, zonkont dolo njo, pzu kiiñ nu kmag. 4 Njo phya na wi Ejitu, njot opkaknu. Zowadadi kñen Jose opdis kil nu. 5 Jako pun ze Berseba; ka bowk Israel yana aliin boko, bopoz boko na bohar boko ze nkaru ireta ŋnsi Faro hilaŋi antom ŋnjij boko ŋyana. 6 Bo yana ŋnsaam boko na priza uzuuz psi bo kapi zosaak osi Kanan, bo sol phya Ejitu. Jako na kiiñ lo uzuuz . 7 A ya na bowk, bowai boiinz na bompili, one kiiñ lo uzuuz ze Ejitu.8 Itiim indai o isi bowk Israel bonhyaki Ejitu, one Jako na kiiñ lo. Rubeŋ anhili o ninsek Jako. 9 Bowk Rubeŋ: "Enok, Palu, Esroŋ na Karmi. 10 Bowk Simeoŋ: "Jemwel, Jamin, Oadi, Jakin, Zoar na Saul awk ñaaz nkananeu. 11 Bowk Levi: "Jersoŋ, Koati na Merari. 12 Juda na bowk. Sela, Peres na Zera (na bowk lo boloŋ 2, Er na Onaŋ, bo kez zosaak osi Kanan.) Bowk Peres bo o Hesroŋ na Hamul. 13 Isakar na bowk, Tola, Pwa, Jo na Sinroŋ. 14 Bowk Jebuloŋ: "Seredi, Eloŋ na Jaleel. 15 Bañauki bo o bowk Leya buki na Jako kero ka wm o ze Padaŋ-Araŋ na Dina awk lo nmpili. Bowk boiinz na bohaz bo o 33. 16 Bowk Gadi: "Sifioŋ, Haji, Suni, Esboŋ, Eri, Arodi na Areli. 17 Bowk Aser: "Imna, Isva, Isvi na Berya na aza boko Sera. Bowk Berya: "Eber na Malkyel. 18 Bañauki oko bowk Zilpa, asi Laboŋ huli awk lo Leya. Bondaaki bohokun bopoz Leia buki na Jako bo o bopoz 16. 19 Bowk Rakel, a ahar Jako bo o Jose na Benjamiŋ. 20 Ze Ejitu Jose na Asenati, awk Potifera nmpenen ninsi Oŋ, bo buk Manases na Efraiŋ. 21 Bowk Benjamiŋ bo o Bela, Beker, Asbel, Jera, Naamaŋ, Ei, Ros, Mupiŋ, Hupiŋ na Ardi. 22 Bañauki oko bowk Rakel buki na Jako bonhoki 14. 23 Awk Daŋ: "Usiŋ 24 Bowk Naftali: "Jazeel, Guni, Jezer na Silen. 25 Bañauki oko bowk Bila bosi Laboŋ huli awk lo Rakel. Bila buk bopoz 7 na Jako . 26 Baña bominzkun uzuuz bosi Jako buki bonhyaki na lo ze Ejitu, nin pfin bohar bowk, bo o 70. 27 Bowk Jose bombukoki ze Ejitu bo o 2. Baña uzuuz bosi Jako bonhyaki Ejitu bo o 70.
Jose jik na aliin
28 Jako hil Juda ze Jose antom a hilun psoond lo book phya Goseŋ. Hunkran bo jaudun zosaak osi Goseŋ. 29 Ka Jose bamun okaaru phya pjik na aliin lo Israel, ze Goseŋ. Kero ka iin lo a homa, antom hur maakrin. 30 Israel jaka Jose: "Ze krankanki nji hilun pkez, ze mi nji iinmunk mnkil nu ka wm hili. 31 Jose jak bomaka na baña bosi aliin. Nji , njo phya plado na Faro, njak lo: "Bomakin na pwukpliini bo hili o zosaak osi Kanan, bo bi ze nji. 32 Boiinz bo oko boyafna ŋmpalalu, zonkont bo o baña bonkaaki ŋnsaam, bo bi na ŋmpalalu, ŋiit na ŋun uzuuz ŋnsi bo kaŋi. 33 Zoyar Faro an du nde yeproo oyezi o utihun nde, 34 nde kseemb lo: "Botihun nu o ko boyafna kero ndo wm o bopoz, injaka boliindo uz; hunkran ndeun pho zosaak osi Goseŋ, zonkont boyafna ŋnsaam uzuuz bo o baña bonzijranki ba zopi zurun baña Ejitu.