Jose zuup bomaka ña a oi
45
Ka Jose azi hilun pmindo zurun baña bonhoki na lo zolo; ka inzo boko, jaa: "Nde zuun baña bo pun zurunin. Ka ña azi duko na Jose, kero ka zu bomaka bo me lo. 2 Ka ahur maakrin, anka baña Ejitu kint te lo. Baña mez Faro te lo uz. 3 Ka Jose jak bomaka nji a Jose; nliini wm hili? Ka bomaka bozi hilun pseemba, zonkont bo liink zurun lo.4 Ka Jose jak bomaka nde ñagonan:"ze krank nde ñogun ze nji. Ka boñog ze lo. "Ka Jose jak boko: Nji a Jose, aza nde, asi nde hapi bojila bonhyaki Ejitu. 5 Ze krank, nde ika jozni, nde ika deuzar yeen nde zonkont nde hapunk nji ka mbi moon; zonkont pbaap nde na phila okaun ka Uzi hilin zurun nde. 6 Oo zip ŋnlur 2 ŋnsi ono zosaak, duko ŋnlur 5 ŋnsi kjaar anipho pho ka kit kozo pho. 7 Uzi hilin zurun nde, antom kiiñ nde ki kmei zosaak, antom pbaap nde na phila phul nde mburi myeek. 8 Mbaza nde hilun nji zi, Uzi wa, uzuun nji antom nho aliin Faro, nyeek ninsi mez lo uzuuz , nmitran ninsi osaak Ejitu uzuuz . 9 Nde sarun nde ya ze nliini, nde jak lo awku Jose jaa: "Uzi zuin nyeek zosaak Ejitu uzuuz ; nde bir ze nji, nde ika joni. 10 Wo pho zosaak osi Goseŋ, wo pho ze kwaŋ ni, wi na bowku na bowai nu, na ŋnsaam nu na ŋun uzuuz ŋnsi ukaŋi. 11 Njo pdenden nu za, zonkont owm duklo ŋnlur 5 ŋnsi ono; Oki kbi kzuu ukñagan wi na mez nu, na ŋun ukaŋi uzuuz . 12 "Nde hilun piin na kil nde, na nzain Benjamiŋ uz, nji a urini nji kladoun na nde. 13 Nde zuupun nliini zonkont ulujl ni ze Ejitu na ŋun ŋnsi nde iin ŋi uzuuz ; nde sarun nde bina nliini zi." 14 Ka hom aza lo Benjamiŋ, huri. Benjamiŋ sa hom lo ka bo hur uzuuz . 15 Ka Jose hul boko obis, hur duzu boko. Ka bomaka lado na lo.
Faro te zonkont bomak Jose
16 Kero onowa teo ze mez Faro, zonkont bomak Jose bili. Faro na boyeek bogutun lo bosi osaak lo uzuuz bo duko na mnliina. 17 Ka Faro jak Jose: "Jakun bomaku: "Nde dolun jein: "Nde kuŋna ŋnsaam nde ŋun de kaŋi nde kak ze Kanan, 18 nde bina aliin nde na pzaro nde ze nji ze Ejitu; Njo phul nde ojir ompei pho na mnjona zosaak Ejitu; nde pde pyoka psi osaak. 19 Usa jak boko uz: "Nde jekun nkaru zosaak Ejitu nde ya jij bopoz nde bontiik, bohar nde na aliin nde antom nde bi. 20 Nde ika zaaf na ŋun ŋnsi dei pduk, zonkont ŋun ŋhoŋi na mnjona uzuuz zosaak Ejitu ŋho pho ŋnsi nde.
21 Hunkran bowk Israel dodun. Jose hul boko nkaru ze mi Faro jakmi. Ka sa hul boko ŋun ŋnde boi pde ze book. 22 Ka hul kana ña ze boko utiim unambi, ka hul Benjamiŋ nkilu 3,5 ŋnsi praata na utiim unambi. 23 A hilan aliin ŋhuru 10 nkuŋoŋi ŋun ŋhoŋi na mnjona ŋnsi osaak Ejitu, na ŋhuru 10 nkuŋoŋi isepru, na ŋun ŋnde phya phul aliin ŋnsi ai pde ze book. 24 Ka taaslor na bomaka. Kero ka bo ka sol ka jak boko: "nde ika ya hunso ze book." 25 Ka bo pun ze Ejitu, sol phya osaak osi Kanan, zun aliin boko Jako oonzi, 26 ka bo jak lo: "Jose wm hili, a o nmitran zosaak Ejitu uzuuz ." Ka Jako oko injaka ña anfitzoi zujuuns lo, zonkont azi haz zolado boko. 27 Kero ka bo zuup aliin boko Jako olado uzuuz osi Jose jaki boko, ka iin nkaru ŋnsi Jose hilaŋi ŋmbi sol na lo, ka oyek Jako aliin boko yetoo. 28 Ka Israel jaa: "Oliiŋi; nmbukin Jose awm hili. Njo phya piina nnin po kezi."