Nkopu ksi prat zolaaku
44
Jose hul ña anhoi ween mez lo prim, jak lo: "Sumna ŋlaaku ŋnsi boiinzuki biinŋi, ŋun ŋnde ŋnsi bo hiluŋi psona. Antom uzu onsaam prat kana ña aloŋ ze mntum olaaku lo. 2 Nkopu ni ksi prat, wo pzuka ze mntum olaaku osi antiikun, na onsaam osi ksepru lo." Ka do ze mi Jose jaki lo. 3 Kero onu jiinzi, ka boiinz ukun taaslor na lo, sol na ŋhuru boko. 4 Kero ka bo pun ze kmbaau, bozo ya un onloi, ka Jose jak ñiinz anhoi ween mez lo: "Nazoon usal boiinz ukun; wanka bup baka, ukyep boko: "Un onkai nde plukin na un onjozi ze mnjona nji doli nde? 5 Ka mbaza nkopu nyeek ni kdaanki, ksi akyeenknki? Un nde dolink, ozi ona mnjona.6 Kero ka bup boko, ka alana boko ŋun ŋnsi Jose jakunk lo. 7 Ka bo semb lo: "Nyeek, ezi ka uka lado olado ondai? Botihun un bozi hilun pdo un ondai. 8 Lelun onsaam osi ndo iinunk ze mtuum ŋlaaku ndo biinunk ze Kanan osi ndo botnunk wi. Boon ndo hilnun pkiij praat na mhuru ze mez nyeek nu? 9 Nyeek, ze ña ze ndo botihun un iin noo na un oloŋo, apkez; bonduklokunk ze ndo bo pho bojuuk nyeek ni. 10 Ka jak boko: "Hunkran oun pho ze mi ujak mi. Ña iinoi na ŋolo apho nnjuuk ni, nde boloŋ nde hilun psol nde bur pjuuk." 11 Ka bo ya osar, kana ña ze boko kyetun olaaku lo zozee, ka bo haul ŋolo. 12 Ka ñiinz anhoi ween mez Jose ka tep ze an ampei pho nyeek, bi toom na ampeunk pho nmpoz. Ka nkopu bi iin noo zolaaku osi Benjamiŋ. 13 Ka bo pas yun itiimo, kuŋun ŋhuru boko antom kak ze kmbaau.
Kzoknar Juda
14 Ka Juda na pzaro lo jau ze mez Jose; ka hil wm o zolo; ka bo limo zozee zurun lo. 15 Ka Jose yep boko: "Oye nde dolink? Ndezi me ja ñiinz anhoi injaka nji a hilun pjaaŋzan antom pme ŋun uzuuz ? 16 Ka Juda Jaa: "Ka oye ndoun pjak nyeek ni? Oye ndoun pja? Ndo hilun pja ndozi zili? Uzi iin pjwa botihun nu, ndo o bojuuk nyeek ni, ndo injaka asi nkopu iin noi ze kñen lo. 17 Ka Jose jaa: "Mbazo pdol un ominzi. Ña asi nkopu iin noi ze kñen lo, apho nnjuuk ni; ka nde hilun phya na phyooŋ ze aliin nde."
Juda ñaunar Benjamiŋ
18 Ka Juda ñog ze lo jak lo: "Nyeek, ñagonan, halan usul antom nhilun plado na wi. Ika deuzar ntihun nu, zonkont woko injaka Faro. 19 Nyeek ni yep botihun lo: Nde ka aliin nde o aza nde? 20 Ka ndo semb nyeek ni: Ndo ka aliin ndo ka o zafi, na nmpoz abuki na pzafa, aza ndo ampei ptiiŋz, asi amak kezi; adukoun nkolo ze aniin. Aliin fundara maakrin. 21 Ka ujak botihun nu: Nde bina ya antom nhiin lo. 22 Ndo semb nyeek ndo: nmpoz nzal azi hilun pduk aliin; ze aduk aliin apkez. 23 Ka ujak botihun nu: ze aza nde ampozi ampbi na nde, nde zo pot piin mnkil ni. 24 Kero ka ndo kak ze ntihun nu, aliin ndo, ndo potlan zuupa ŋun nyeek nin jaki. 25 Ka aliindo jak ndo, antom ndo kak ndo ya ganz ŋun ŋnde ŋmpozŋi. 26 ka ndo semb lo "Ze aza ndo azi sol na ndo, ndo khya; zonkont ndozi poto philun piin mnkil ñiinz aminzun ze aza ndo ampozi ampho na ndo. 27 Ntihun nu, aliin ndo, jak ndo: "Nde me ja nhari bukrin bopoz 2. 28 Aloŋ o sol dukin. Nji jaŋzan ogoŋar fal-fal naa; mbazi pot iina anjau ze krank. 29 Ze nde punin andai uz, ze khuzin ir na lo, nde pzu oyel ni ofaasla yeto na kjozi ze zun baña bonkezki. 30 Ze krank, ze nji kak ze ntihun nu nliini, ze nmpoz nzala azi sol na ndo, ze mi oyek aliin nejmunk osi lo, 31 ze aliin ndo me ja azi kak na ndo, a pkez; ophir ntihun nu zu oyel ofaasla osi aliin ndo yeto na kjozi ze zun bonkezki. 32 Zonkont ntihun nu oun nmatir ze psoof nmpoz nzala zurun nliini, antom jaa: Ze mbazi kak na ya bi phulu, njo pjuu ze nliini ze phila nin uzuuz . 33 Ze minzmi njo pñau nu, nyeek, utnan antom nduko zi injaka ntihun nyeek ni ze kfah nmpoz nzala, antom hutun nmpoz nzala a sol na bomaka. 34 Boon nji hilun phya zurun nliini ze nmpoz nzala azi ya na nji? IKA ka hutni ka nji iin khuzin kikmbiki duzu nliini!"