Bomak Jose kak Ejitu
43
Ono mag maakrin zosaak. 2 Kero bo toom pde trigu osi bo biinunk ze Ejitu, ka aliin boko jak boko: "Nde kakun, nde ya ganz ŋun ŋnde mntiik. 3 Juda jak lo: "Ñinz aminzun azuup ndo un onjinzi jaa: Ndezo piin mnkil ni ze aza nde azi bi na nde. 4 Ze uhil ndo na aza ndo, ndo phya pganz ŋun ŋnde; 5 Ze wamphilan lo na ndo, ndozo phya, zonkont ñiinz aminzun zuup ndo jaa: azo piin mnkil ndo ze aza ndo azi ya na ndo." 6 Ka Israel yep boko: "Ezi ka de bina khuzin ki ze nji, ze mi nde zuupun ñiinz andaun, nde ka aza nde aloŋ?" 7 Ka bo seemb lo: "Ñiinz aminzun zowadadi ayep ndo, zonkont pzaro ndo, jaa: Aliin nde wm hili? Nde kaa aza nde aloŋo? Ka ndo semb lo ze mi a yep mi ndo. Ndozi me pja zowadadi apjak ndo antom ndo yana aza ndo? 8 Ka Juda jak aliin boko Israel: "Hutnan nzal aya na nji, antom ndo sol, ndo ki kez, "Ndo, wi, bowk ndo. 9 Pun psi Benjamiŋ pho duzu ni; ze mbazi kak na ya na phila, nyeek hilun pzuin pjuuk, oloŋ ankint njau zokezr ni. 10 Ze ndo hilan pjon ndo hilun poo kak uyas upugzan.11 Ka aliin boko Israel, jak boko: "Nde jekun ŋun ŋhaloŋi ŋnsi osaak ŋmpeŋi firo, nde zuun ŋa ze ŋlaaku nde, nde yana ŋa nde ya hul ñiinz aminzun: "Nde yana balsamu mntiik, balsamu, arser onjai ka zwo ze puma antom philun pzu klikis ki ksoko, pnou mpozpi, oarser, mira, nozis osi pistasia na omendwa. 12 Nde ya na onsaam ŋyas ŋmpugz; zonkont onsaam osi bozuunk ze mntuum ŋlaaku nde ŋnsi ksepru, nde ka kun na ŋa. O hilun pho bo ziplan-kziplan. 13 Nde jekun aza nde uz, nde nazo nde sol nde ya ze ñiinz aminzun. 14 Uzi unkai philun uzuuz bo pzunde kñago zurun ñiinz aminzun, antom a hutun amak nde andaun antom abi, na Benjamiŋ uz antom nde kak. Ze njo pduko phampka nmpoz nji kduko ninsiil!
Bomak Jose de na yaa
15 Ka, hunkran bowk Jako jekdun ŋun ŋhaloŋi ŋfiroŋi, jek onsaam ŋyas ŋmpugz, na Benjamiŋ; ka bo deeŋo ya Ejitu, ka bo ya naz zurun Jose. 16 Kero ka Jose iin Benjamiŋ na boko ka jak ña anhoi ween mez lo: "Solun na baña uki uyan mez, uya fiŋ ŋnsaam ubamun ŋolo uzuuz , zonkont boiinz uki bo pde na nji ze pnak." 17 Ka a do ze mi Jose jakmunk lo antom a do, ka sol na boko yan mez Jose. 18 Kero bo ka sol na boko phyan mez Jose, bo liinki, bo zaaf jaa: "Ohilun pho zonkont onsaam ondaaun a kaknunk ze ŋlaaku ŋnsi ksepru zuyas useke, antom philun psond nja pkoño, ominzun kaun ka bo biin na nja zunzi, pzu nja pjuuk antom pseh ŋhuru nja." 19 Ka hunkran bo yadun na ñiinz anhoi ween mez Jose, ka bo lado na lo ze plumun psi mez, 20 jak lo: "Nyeek ni, ndo hil bi zuyas uloŋ bi pganz ŋun ŋnde; 21 Kero, ka ndo jaw zun ndoi pfurna, ka ndo ahul ŋlaaku ndo, onsaam ña ze ndo o ze mntum olaaku osi ksepru, oli ozi zaankli; ol ndo potink biini. 22 Ndo pot bina onsaam oloŋ antom pganz ŋun ŋnde. Ndozi me ña anzui onsaam ze ŋlaaku ndo." 23 Ka ñiinz anhoi ween mez Jose jak boko: "Phyooŋ o na nde, nde ika liinki; Uzi nde, Uzi aliin nde, hul nde priza ze ŋlaaku nde ŋnsi ksepru. Nji iin onsaam nde." Ka bina Symeoŋ zuri antom a o na boko. 24 Ka ñiinz anhoi ween mez Jose, hul boko mnzup antom bo ñou izima; ka hul ŋhuru boko ŋun ŋnde. 25 Ka bo bamun ŋun ŋnsi un onhaloi ŋmpeŋi pfiro antom phul Jose zobir lo ze pnak, zonkont bo me ja abi pde za.
26 Kero Jose jaw ze mez, ka bo bina ŋun ŋhaloŋi ŋnfiroŋi bo bupŋi ze iñene bi phulo; limo zurun lo zozee. 27 Ka yep boko nde ojan; ka pot yep boko: "Ka aliin nde, ñiinz nyeekun asi nde zuupunk nji zonkont lo, a o na mnjona? Ahum hili?" 28 Bo semb lo: "Ntihun nu, aliin ndo,a o na mnjona a wm hili. " Ka bo juz antom ŋupi. 29 Kero Jose deeŋ kil iin aza Benjamiŋ, aza asi bo koulani aniin boko, ka Jose yep boko aza nde andai asi nde jakun nji zonkont lo alei?" Ka jak lo: "Uzi o pzu mnjona duzu nu, nmbukin." 30 Ka Jose pun osar phya pber zun ai phurna, zonkont pñaak yaanza zonkont aza. ka nej zun ai phurna; nje ze kuarte kan kñalki antom hur zolo. 31 Ka ñou mnkil pun tan kziu, jak boko nde hilun pde." 32 Ka bo hil psilo ditni sa pot hil psi aza ditni; Bojitu bozi de na baka, zonkont boza khilun pde na boebreu zun ze loŋ, zonkont oko un onzijrani ze boko. 33 Ka bo zoo zurun lo ptep zampei pho nyeek ankint jau zampei ptiiŋz ze boko. Ka bo ka tendo; ka bo duko na ohatat. 34 Ka zu inzink ze mnde boko zomes osi Jose, ka pnziink Benjamiŋ pe psi ña loŋ ze boko ŋyaas kñene. Bo de, daani, dukoo, liilun na lo.