Jose zuup ozaafi osi Faro
41
Ŋlur 2 zipi. Faro zaafii a hil naz ze kwaŋ krik Nilu. 2 Ŋiit 7 ŋnuroŋi, ŋmagŋi, ŋmbi pun ze krik Nilu, ŋntep pdoh otun. 3 Kero ŋnsekŋun pun ze Nilu, ŋmpot pun ŋiit 7 ŋhuzŋi, ŋmboŋi, ŋya naz ze kwaŋ ŋndaŋu zowau krik. 4 Ŋiit ŋhuzŋuŋ, ŋmboŋi, ŋde ŋiit 7 ŋun ŋnuroŋunk, bamagi. Ka Faro luti. 5 Ka pot ŋoinzi, pot zaafii inah 7 isi osumpa injiihi ba nuroo, mai ze pzep ploŋ. 6 Ka inah iloŋ intik isi oyook pmair onu turi, himai uz. 7 Inah intikyun de inah imagyunk ba nuroo. Faro luti, iin ja azaafi kzaafi. 8 Kero onu jiinzi, Faro duko na oatat zoyeke lo. Hilan pdu bokoz uzuuz na boiinz bonlipki uzuuz ze Ejitu. Zuup boko ozaafi lo, ozi ka ña anhilni pzuup lo olo.9 Ka nyeek botiit praan jak Faro: "hankri nji lel pjwa ni. 10 Kero Faro deuzar botihun lo, zundo, nji na nyeek bolemp opoŋ ze kalauz ze ku ksi nyeŋ baña bonhoki ze kalauz. 11 Ndo 2 ndo zaafii zurim uloŋ; kana ozaafi ka mnjaŋzin olo.
12 Oka nmpoz nzala nyebreu anhili ona ndo, nnjuuk nyeek boyeŋ baña bonhoki ze kalauz; ndo zuupa ŋnzaafi ndo, ka zuup ndo ŋnzaafi ndo, ze mi ña zaafimi. 13 Ze mi azuupmunk ndo, hunkran obilun oo: nji bi kakno zutihun ni, ka nyeek bolemp opoŋ bi siko na ptala ze punu.
14 Ka Faro hilan pdu Jose, ka bo punun lo osar ze kalauz zuiir a hili oni; ka tih urun, zymlan yun itiimo. Ya zurun Faro. 15 Ka Faro jak Jose: "Nji zaafi ozaafi an, ozi ka ña anhilni pzuupin na. Nji te ka baka lado zonkont nu,ze ute ozaafi wa kzup ozaafu olo. 16 Ka Jose semb Faro:"Un ominzi ozi on ze nji; Uzi ophul Faro prim psi phyooŋ. 17 Ka Faro jak Jose: "Zozaafi ni nji zaafii nji naz ze kfaar krik Nilu, 18 Ŋmpun ŋiit 7 ŋmagŋi ba nuroo pun ze krik Nilu tep pdoh otun zolo. 19 Ka ŋiit 7 ŋloŋo ŋmboŋi ba huzi, ŋmbi pun ze kfez ŋolo. Mbazo iin ŋiit ŋhuzŋi injaka ŋolo zozaak Ejitu uzuuz . 20 Ŋiit 7 ŋmboŋunk ba huzi, ŋde ŋiit 7 ŋnseke ŋmagŋunk; 21 ŋanu ŋndeŋi ŋolo, ñazi hilun phikran un oloŋ ze ŋa, zonkont ŋhuzi injaka oseke. Ka nji luti. 22 Kero nji pot zaafi, nji iin inah 7 isi trigu imagi, nuro mai ze pzep pmizpun. 23 Ka inah 7 iloŋ isi trigu intiŋzi isi oyook pmair onu turi isa mai uz. 24 Inah intiikyun ide inah imagyunk ba nuroo. Nji zuup bolipl ŋun ŋmizŋi uzuuz , ña loŋ azi hilun pzuupin ŋolo.
25 Ka Jose semb Faro: "Ozaafi Faro o zozaafi oloŋ. Uzi jaŋ Faro un woi bi pdo. 26 Ŋiit 7 ŋnuroŋunk, ŋnlur 7 ŋa; Inah 7 yun isi trigu inuroyunk, ŋnlur 7 ŋa uz. Ŋzaafi ŋmpugz ŋi ŋho zoloŋ. 27 Ŋiit 7 ŋmboŋunk ba huzi, ŋmpuŋunk kero ŋndaŋun puni, ŋoko ŋulur 7, injaka, trigu 7 intik inturoyunk na oyook ompununk ze pmair onu; ŋoko ŋulr 7 ŋnsi ono. 28 "Oladoi oko olado njanka toom pzuup Faro, Uzi jaŋ Faro un boi bi pdo. 29 Ŋlur 7 ŋnsi pyoka pyeek poi pho duzu osaak Ejitu uzuuz ; 30 O bi pka ŋlur 7 ŋnsi ono uz. Pyok pyeek pun duzu osaak Ejitu uzuuz , baña bo bi pzimlo pa, ono o psum zosaak. 31 Pyok pyeek pun duzu osaak pozo bi plelo, zonkont ono oi pbi duzu osaak, o pho un onornorni maakrin. 32 Ozaafi Faro obi ŋyas 2, zonkont oko un Uzi bamnoi pdo; ka Uzi kilo pdol olo. 33 "Un ominzun kaun ka Faro ka pber ñiinz ambambi, ba lipi antom pzu lo duzu osaak Ejitu. 34 Faro ka pzu bomitran duzu osaak uz, antom boseh ojir oñenzan osi kit ze Ejitu, ze ŋnlur 7 ŋun ŋnsi pyoka. 35 Bo ka pkoulan ŋun ŋnde ze ŋnlur ŋi kmbiŋi ŋsi pyoka, antom bo baan trigu ze imbaau zeu philun psi Faro, antom baap olo na mnjona zimbaau. 36 Ŋun ŋnde ŋminzŋun ŋho pbano zonkont ŋnlur 7 ŋnsi ono ŋoi pbi duzu Ejitu, antom baña ki kez zonkont ono."
Faro zu Jose nmitran ze Ejitu
37 Ŋnzaafu ŋminzŋi ŋho na mnjona ze Faro na boyeek bonekunk ze lo uzuuz . 38 Faro yep baka: "Ka nja piin ñiinz injaka, ñai ankai Oyek Uzi? 39 Ka Faro baalo jak Jose: "Ze mi Uzi zuwi wi ka ume ŋun ŋndaaŋi uzuuz, ozi ka ña anhikrani ba ka kme injaka wi. 40 Njo pzuu duzu mez ni; bopugi osaak ni uzuuz bo pho zeu philun nu. Nji nkonanin njoun pho duzu nu, ze mi njomink ze pliin." 41 Hunkran Faro jak dun Jose: "Nji zuink wi duzu osaak Ejitu uzuuz ." 42 Ka Faro punun kmiun ze kñen lo zu kolo ze kñen Jose, Ka tiimun lo yun inurohi, zu lo fiu phuru ze kzuz. 43 Jose pun na okaru opugzan osi Faro hili kaa; ka baña kiik zurun lo ze ja: Nde ŋupun zurun lo! Hunkran Faro zudun lo duzu osaak Ejitu uzuuz . 44 Ka Faro jak Jose: "Njoun Faro, zoampho prim nu, nin ñaloŋ azo pdeŋ kñene o pzima ze Ejitu uzuuz ." 45 Faro zu Jose ktiim Jafenate paneya hul lo nmpili ka mari akndwoi Asenati, awk Potifera, nmpene nnsi Oŋ; Ka Jose ka yaanz osaak Ejitu uzuuz antom pten nolo.
46 Jose hil ka ŋnlur 30 kero ka nej zutihun usi Faro nliin Ejitu, a yaanz zosaak Ejitu uzuuz . 47 Ze ŋnlur 7 ŋun ŋnsi pyoka, ŋun baña jaarŋi maakrin, 48 Jose koulan ŋun ŋnde ŋnjaroŋun ze ŋnlur 7 ŋun ŋnsi pyoka zosaak Ejitu; a baan ŋun ŋnde zimbau. Ze kmbaau abaan ŋun ŋnde ŋnjaroŋi zojir ominzun. 49 Hunkran Jose zoñnu trigu, an ko kint sumi injaka mmbol mnsi kfaar. Mi sum maakrin ka azi bi hilun pfin olo, zonkont azi bi hilun pjau a.
50 Kero ka ŋnlur ŋnsi on ŋun jawi, Jose buk bo poz bo 2 na Asenati, awk Potifera, nmpene ninsi Oŋ. 51 Jose zu ktiim nnsek lo ktiim Manases zonkont a jaa: "Uzi zuin ka nji zimlo onor ni uzuuz , na mez nliini uzuuz . 52 Ka zu ktiim nmpugzan lo ktiim Efraiŋ, jaa: "Uzi zuin ka nji o ña zosaak onorni."
53 Ŋlur 7 ŋun ŋnsi pyoka ze Ejitu ŋi bi toomi. 54 Ŋlur 7 ŋun ŋnsi ono ŋi mbi tep ze mi Jose hili jaa; Ŋnsaak uzuuz ŋmbi ka ono zosaak Egitu ka ŋun ŋnde. 55 Kero ono tep zossak Ejitu, baña Ejitu uzuuz bo ñaun Faro ŋun ŋnde. Faro jak bopugi Ejitu uzuuz : "Nde yan ze Jose, nde dolun un ajaki nde uzuuz . 56 Kero ka ono o zosaak Ejitu uzuuz , Jose hap Ejitu trigu, zonkont on mag maakrin zosaak Ejitu. 57 Bo pugi bosi ŋnsaak ŋloŋ uzuuz ya ze Ejitu antom pganz trigu ze kñen Jose, zonkont on mag maakrin ze ŋnsaak uzuuz .