Jose zuup ŋnzaafi ŋmpugz
40
Onwan, nyeek bo lemp opoŋ na nyeek bo tiit nliin Ejitu praan bo bi dola un ontuntoi. 2 Ka Faro deuzar botihun lo 2, nyeek bolemp opoŋ na nyeek botiit. 3 Ahilan pdis baka ze kalauz ze ku ksi nyeek boyeŋ ze zun Jose disnozi. 4 Nyeek kalauz zu Jose antom a o nyeek boko, a duk aten boko abaap boko, ka bo bi jon zolo ze ŋkil ŋminzŋu. 5 Boiinz 2 ukun bo hili diiso ze kalauz one nntiit na nleemp opoŋ osi nliin, bo bi zaafi zurim uloŋ; kana ña kzaafi ozaafi lo mpaz, ozaafi na ozaafu olo ze Ejitu, ozaafi oka un onamzani. 6 Kero Jose ya ze boko ze nfa, ka iin boko bo o baña boŋouki. 7 Hunkran ayepdun boyeek botihun Faro bukun: oyezi ka, ka nde joozun hankri?" 8 Ka bo jak lo: "Ndo zaafi, ozi ka ña anhilni pzuup ndo ozaafi. " Jose jak boko: "Uzi unkona wolo uhilnun pzuup ozaafu osi ŋnzaafi.Ozaafi nyeek botiit nliin
9 Nyeek botiit pkem zuup Jose ozaafi lo, jak lo: "zozaafi ni nji iin pzep mhuba zurunin. 10 Ze pzep mhuba bu ka inah 3. Ze minzmun zopundr itoh, pzeñ a kpun, phay a kbuk mhuba minjiijmi. 11 Ka nkopu ksi Faro o ze kñen ni. Ka nji punu mhuba mminzmun pooñ molo ze nkopu Faro, hulo nkopu ze kñen Faro." 12 Ka Jose jak lo: "Un ondai oko mnjaŋzin mnsi ozaafi: "Inah mhuba 3 oko ŋnu 3. 13 Ze mezu ŋnu 3, Faro apbi punu ze kalauz, wo bi pkak ze utihun nu; wo pot bi phula nkopu ze kñen lo ze mi ujoni ze do. 14 Ka lelan Zoyar ŋun anz ze ya na wi na mnjona, antom uñago ni ulado na Faro zonkont ni, antom uzuin mpun zi. 15 Zonkont nji puno na ofooza zosaak osi boyebreu; mbazi do un oloŋ ontuntoi uz onkai ka njo ze kalauz zuir bi."
Ozaafi nyeek bolemp opoŋ
16 Kero nyeek bolemp opoŋ iin ja Jose zuup ozaafi na mnjona, ka jak lo: "Nji zaafi uz, kuŋo knturu 3 ksi opoŋ ofasla duzu weene. 17 Ze pntuuru phopunk duzu weene pka ŋun uzuuz ŋnde ŋnsi nlemp opoŋ ai ka lemp, ŋun ŋnde ŋnsi Faro, nkas ka de ze pntuuru duzu weeni. 18 Jose jak lo: "Un ondai oko mnjaŋzin mnsi ozaafi: "Inturu yun oko ŋnu 3. 19 Mezu ŋnu 3, Faro apfalu weene aphaknu ze punu; nkas ŋoŋun pde oyemz nu.
20 Zonu oajzan, Faro dol onah osi olur abuknoi du botihun bo ya matir. Ka punun nyeek botiit lo pkem na nyeek bolemp opoŋ, zurun bo sinz. 21 Ka Faro kakun nyeek botiit lo pkem zutihun lo, anhili ze tiitr lo pkeme; 22 Ka ahilan psik nyeek bolemp opoŋ na ptala, ze mi Jose zuupmunk lo ozaafi. 23 Ka nyeek botiit pkem zimlo Jose.